ជាតិ
នយោបាយជាតិ
ចលនាសង្គ្រោះជាតិប្រកាសខ្លួនជាផ្លូវការ ទោះរងការព្រមានពីក្រុមមេទ័ពនិងមន្ត្រីជាន់ខ្ពស់នៅកម្ពុជា
លោក សម រង្ស៊ី អតីតប្រធានបក្សសង្គ្រោះជាតិ នៅក្នុងពិធីប្រកាសសុពលភាពចលនាសង្គ្រោះជាតិ
×![]()
ដោយ: ម៉ៅ សុផា
ភ្នំពេញ៖ ទោះជាមានការគំរាមផ្ទួនៗពីអាជ្ញាធរ និងអ្នកនយោបាយនៃគណបក្សកាន់អំណាចក៏ដោយ ក៏ទីបំផុតចលនាសង្គ្រោះជាតិដែលបង្កើតឡើងពីក្រៅប្រទេស ដោយក្រុមអ្នកនយោបាយខាងប្រឆាំង នៅតែហ៊ានប្រកាសសុពលភាពរបស់ខ្លួនជាផ្លូវការ ដើម្បីបន្តការទាមទារ និងសកម្មភាព តស៊ូ។ មន្ត្រីជាន់ខ្ពស់ រដ្ឋាភិបាលកម្ពុជា និងគណបក្សកាន់អំណាច បានចាត់ទុកចលនានេះ ថាជាក្រុមឧទ្ទាម ហើយស្ថិតនៅក្រៅប្រព័ន្ធច្បាប់។
ក្រុមអ្នកនយោបាយខាងប្រឆាំង ដែលកំពុងប្រមូលផ្តុំគ្នានៅឯនាយសមុទ្រ នៅតែបន្តចូលរួមសកម្មភាព ក្នុងចលនាសង្គ្រោះជាតិដដែល ដោយពួកគេហាក់មិនញញើត នឹងការគំរាមផ្លូវច្បាប់ និងការកម្ចាត់ពីសំណាក់មេទ័ព និងមេនគរបាលកម្ពុជានោះទេ។ ក្នុងរដ្ឋកាលីហ្វ័រញ៉ា នៃសហរដ្ឋអាមេរិក នាថ្ងៃទី២៩ ខែមករា ឆ្នាំ២០១៨នេះ ក្រុមអ្នកនយោបាយប្រឆាំង ដោយមានលោក សម រង្ស៊ី ជាអធិបតី បានរៀបចំពិធីប្រកាសសុពលភាពជាផ្លូវការ នៃចលនាសង្គ្រោះជាតិ។ សមាជិក និងអ្នកគាំទ្រជាច្រើននាក់ បានចូលរួមក្នុងពិធីប្រកាសសុពលភាព នៃចលនានេះ។
ចាប់តាំងពីចលនាសង្គ្រោះជាតិ ត្រូវបានបង្កើតឡើងកាលពីថ្ងៃទី១២ ខែមករា ឆ្នាំ២០១៨មក ការព្រមានពីសំណាក់ស្ថាប័នគ្រប់គ្រងកម្លាំងប្រដាប់អាវុធ និងគណបក្សកាន់អំណាច បានកើតឡើងជាហូរហែ។ កងកម្លាំងប្រដាប់អាវុធនៅកម្ពុជា បានបង្ហាញការប្រុងប្រយ័ត្នជានិច្ច ចំពោះចលនាថ្មីរបស់ក្រុមប្រឆាំងនេះ។
សម្តេច ទៀ បាញ់ រដ្ឋមន្ត្រីក្រសួងការពារជាតិ បានប្រកាសខ្លាំងៗថា កងទ័ពនឹងកម្ទេចចលនាសង្គ្រោះជាតិ ប្រសិនបើចលនានេះ បង្កឲ្យមានអំពើហិង្សាក្នុងប្រទេសកម្ពុជា។ រដ្ឋមន្ត្រី ដែលកាន់កាប់ស្ថាប័នកងទព័រូបនេះ សង្កត់ធ្ងន់ៗថា កងទ័ពបានត្រៀមកម្លាំងរួចរាល់ហើយ ដើម្បីទប់ទល់នឹងចលនានេះ។
ក្នុងពិធីបិទសន្និបាតបូកសរុបលទ្ធផលការងារ នៃកងរាជអាវុធហត្ថប្រចាំឆ្នាំ២០១៧ ដែលរៀបចំនៅទីបញ្ជាជាការដ្ឋានកងរាជអាវុធហត្ថលើផ្ទៃប្រទេស នាព្រឹកថ្ងៃទី២៣ ខែមករា ឆ្នាំ២០១៨ ប្រមុខការពារជាតិរូបនេះ បាននិយាយយ៉ាងម៉ឺងម៉ាត់ថា៖«ចលនាសង្គ្រោះជាតិ ថារៀបចំឲ្យមានហិង្សានៅកម្ពុជា។ ដូច្នេះត្រៀមឲ្យហើយទៅ បើឃើញរៀបចំបង្កើតអំពើហិង្សា យើងដាក់មុនហើយ»។
ក្រោយរដ្ឋមន្ត្រីក្រសួងការពារជាតិថ្លែងបែបនេះចប់ លោក សៅ សុខា ដែលជាមេបញ្ជាការកងរាជអាវុធហត្ថ លើផ្ទៃប្រទេស ក៏ឡើងថ្លែងបន្ត ដោយលោក ហៅចលនាសង្គ្រោះជាតិ ថាជាសកម្មភាពភេវរកម្ម។ លោក អះអាងថា កងរាជអាវុធហត្ថ ត្រូវត្រៀមខ្លួនដើម្បីទប់ស្កាត់ ដោយមិនបណ្តោយឲ្យចលនានេះ ធ្វើសកម្មភាពលើទឹកដីកម្ពុជាតាមអំពើចិត្តឡើយ។
រីឯលោក ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ ក៏ចេញមុខព្រមានចលនាសង្គ្រោះជាតិដែរ។ ថ្លែងក្នុងពិធីបូកសរុបលទ្ធផលការងារយោធាឆ្នាំ២០១៧ កាលពីថ្ងៃទី២៧ ខែ មករា ឆ្នាំ២០១៨ អគ្គមេបញ្ជាការកងទ័ពរូបនេះ បានផ្ញើសារទៅកាន់ក្រុមអ្នកប្រឆាំងនៅក្រៅប្រទេសយ៉ាងដូច្នេះថា៖«ក្នុងនាមជាកងយោធពលខេមរភូមិន្ទ យើងត្រូវតែប្រឆាំង និងកម្ចាត់ចោលភ្លាម ចំពោះចលនាសង្គ្រោះជាតិ ដែលមានបំណងបំផ្លិចបំផ្លាញសន្តិភាព និងសុខដុមរមនារបស់ប្រជាជនកម្ពុជា»។
ចលនាសង្គ្រោះជាតិ ក៏បានរងនូវការព្រមានពីកម្លាំងគរបាលផងដែរ។ សម្តេច ស ខេង រដ្ឋមន្ត្រីក្រសួងមហាផ្ទៃ ដែលគ្រប់គ្រងកម្លាំងនគរបាល បានអះអាងថា អតីតមេដឹកនាំគណបក្សសង្គ្រោះជាតិ រាប់ចាប់តាំងពីលោក សម រង្ស៊ី រួមទាំងអ្នកពាក់ព័ន្ធផ្សេងទៀត ត្រូវប្រឈមនឹងផ្លូវច្បាប់ ដោយសារតែចូលរួមក្នុងចលនានេះ។ មែនទែទៅ សូម្បីតែលោក កឹម សុខា ដែលប្រកាសមិនចូលរួមក្នុងចលនានេះ អាចនឹងមានទោសដូចគ្នា។
ធ្វើជាអធិបតី ក្នុងពីធីបូកសរុបការងារឆ្នាំ២០១៧ នៅខេត្តបាត់ដំបងកាលពីថ្ងៃទី២៣ ខែមករា ឆ្នាំ ២០១៨ រដ្ឋមន្ត្រីក្រសួងមហាផ្ទៃរូបនេះ បានលើកឡើងបែបនេះថា៖«ចូលរួម ឫមិនចូលរួមក៏ដោយ ក៏ខុសច្បាប់ដូចតែគ្នាទេ»។
លើសពីនេះ លោក ខៀវ សុភ័គ អ្នកនាំពាក្យក្រសួងមហាផ្ទៃ ធ្លាប់ប្រាប់សារព័ត៌មានថ្មីៗថា អ្នកដែលចូលរួមបង្កើតចលនានេះ ច្បាស់ជាគេចមិនផុតពីពន្ធនាគារនោះទេ ឲ្យតែត្រឡប់មកដល់ប្រទេសកម្ពុជាវិញ។ លោក ខៀវ សុភ័គ បង្ហើបថា ប្រសិនបើក្នុងកាលៈទេសៈណាមួយ ដែលមើលទៅអាចប៉ះពាល់ធ្ងន់ធ្ងរ ដល់សន្តិសុខនៅប្រទេសកម្ពុជា រដ្ឋាភិបាលកម្ពុជា អាចនឹងស្នើធ្វើបត្យាប័ន ដើម្បីឲ្យរដ្ឋាភិបាលនៃប្រទេសនានា បញ្ជូនអតីតអ្នកនយោបាយ ដែលចូលរួមក្នុងចលនានេះ មកដោះស្រាយតាមផ្លូវច្បាប់នៅកម្ពុជា។
ក្រៅពីមេទ័ព និងមេនគរបាល អ្នកនយោបាយខាងគណបក្សកាន់អំណាច ក៏ប្រតិកម្មនឹងចលនាសង្គ្រោះជាតិដែរ។ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានចេញមុខច្រើនលើកច្រើនសារជាងគេ ក្នុងការវាយប្រហារ និងការរិះគន់ចលនាសង្គ្រោះជាតិ។
ក្នុងចំណោមសារជាច្រើន សារមួយដែលលោក សុខ ឥសាន បានសរសេរទៅកាន់អ្នកកាសែតក្នុងបណ្តាញទំនាក់ទំនងតេឡេក្រាម មានន័យបែបចំអកថា អតីតក្រុមអ្នកប្រឆាំង បានបរាជ័យផ្ទួនៗ ក្នុងការរត់ទៅឱបដៃ ឱបជើងបរទេស ហើយក៏ទាល់ច្រក ទើបបណ្តាលឲ្យមានគំនិតបង្កើតចលនានេះឡើង ដើម្បីបំភាន់សាធារណជនថា ក្រុមខ្លួននៅតែខ្លាំង និងអាចត្រឡប់មកកម្ពុជាវិញ។ បន្ទាប់មក លោកក៏ព្រមានថា រដ្ឋាភិបាលកម្ពុជា មានលទ្ធភាពគ្រប់គ្រាន់និងពេញសិទ្ធិ ក្នុងការចាត់វិធានការ ចំពោះអង្គការចាត់តាំងក្រៅច្បាប់បែបនេះ។
អ្នកនាំពាក្យគណបក្សកាន់អំណាចរូបនេះ យល់ឃើញដូច្នេះថា៖«ការបង្កើតអង្គការចាត់តាំងខុសច្បាប់ គឺគ្មានការគាំទ្រពីប្រជាជននិងមជ្ឈដ្ឋានខាងក្រៅឡើយ។ [តែផ្ទុយទៅវិញ] កាន់តែបន្ថែមទម្ងន់ទោសដាក់ខ្លួន...»។
លោក សម រង្ស៊ី ដែលជាមនុស្សបង្គោល ក្នុងការបង្កើតចលនាសង្គ្រោះជាតិ បានបកស្រាយថា បំណងធំបំផុតនៃចលនានេះ គឺទាមទារឲ្យដោះលែងលោក កឹម សុខា និងអ្នកទោសនយោបាយផ្សេងទៀត រួមទាំងទាមទារឲ្យគណបក្សសង្គ្រោះជាតិ អាចធ្វើសកម្មភាពតាមផ្លូវច្បាប់ឡើងវិញ ដើម្បីបានចូលរួមការបោះឆ្នោតក្នុងឆ្នាំ២០១៨។ លោក បញ្ជាក់ថា នៅពេលបំណងទាំងនេះទទួលបានជោគជ័យ ចលនាសង្គ្រោះជាតិ នឹងរំលាយចោលដោយខ្លួនឯងតែម្តង៕
Tag:
ចលនាសង្គ្រោះជាតិ
© រក្សាសិទ្ធិដោយ thmeythmey.com
