ជាតិ
នយោបាយជាតិ
រូបភាព៖ សមត្ថកិច្ចបានដាក់របាំងការពារ នៅជុំវិញសាលាឧទ្ធរណ៍ ខណៈសវនាការដែលមានវត្តមានលោក កឹម សុខា កំពុងដំណើរការនៅព្រឹកថ្ងៃទី១ ខែកុម្ភៈ ឆ្នាំ២0១៨
×![]()
ភ្នំពេញ៖ លោក កឹម សុខា អតីតប្រធានគណបក្សសង្គ្រោះជាតិ ដែលជាប់ពន្ធនាគារជិត៥ខែមកហើយនោះ កំពុងស្ថិតក្នុងបន្ទប់សវនាការនៃសាលាឧទ្ធរណ៍ នៅព្រឹកថ្ងៃទី១ ខែកុម្ភៈ ឆ្នាំ២0១៨នេះ។ សមត្ថកិច្ច ដឹកលោក មកពន្ធនាគារត្រពាំងផ្លុង ក្នុងខេត្តត្បូងឃ្មុំ មកកាន់រាជធានីភ្នំពេញ ដើម្បីចូលរួមសវនាការនេះ។
ក្រុមមេធាវី ដែលការពារក្តីឲ្យលោក កឹម សុខា ក៏ចូលរួមសវនាការដែរ។ ការបើកសវនាការរបស់សាលាឧទ្ធរណ៍ គឺធ្វើឡើងតាមសំណើរបស់ក្រុមមេធាវី ដែលសុំឲ្យលោក កឹម សុខា រស់នៅក្រៅឃុំជាបណ្តោះអាសន្ន។ មុនឈានដល់សាលាឧទ្ធរណ៍ ក្រុមមេធាវី ធ្លាប់ស្នើនៅសាលាដំបូងរាជធានីភ្នំពេញម្តងរួចមកហើយ ប៉ុន្តែ ត្រូវបានច្រានចោល។
នេះ ជាលើកទីមួយហើយ ដែលលោក កឹម សុខា នឹងត្រូវបាននាំខ្លួនឲ្យចូលរួមក្នុងសវនាការ ដើម្បីតតាំងតាមផ្លូវច្បាប់។ កន្លងមកតុលាការ តែងបើកសវនាការ ដោយគ្មានវត្តមានរបស់លោក កឹម សុខា។
បច្ចុប្បន្ន លោក កឹម សុខា បានស្ថិតនៅក្រោមការសង្ស័យថា ពាក់ព័ន្ធនឹងអំពើក្បត់ជាតិ ព្រោះបានឃុបឃិតជាមួយបរទេសជាសម្ងាត់ ដើម្បីផ្តួលរំលំរដ្ឋាភិបាលកម្ពុជា។ សមត្ថកិច្ចនិងតុលាការ ពឹងផ្អែកលើវីដេអូឃ្លីបមួយ ដែលលោក កឹម សុខា បានថ្លែងសារនយោបាយទៅកាន់អ្នកគាំទ្រនៅក្រៅប្រទេស តាំងពីឆ្នាំ២០១៣មកម្ល៉េះ។ ក្នុងវីដេអូឃ្លីបនោះ លោក កឹម សុខា បានលើកឡើងថា លោក មានអ្នកជំនាញដែលជាជនបរទេសនៅពីក្រោយ ដើម្បីជ្រោមជ្រែងក្នុងការផ្លាស់ប្តូររដ្ឋាភិបាលកម្ពុជា។
ក្រោយវីដេអូឃ្លីបខាងលើ បានបែកធ្លាយលើបណ្តាញសង្គមហ្វេសប៊ុក សមត្ថកិច្ច ក៏បាននាំគ្នាចុះទៅចាប់លោក កឹម សុខា ដល់គេហដ្ឋានតែម្តង កាលពីយប់ថ្ងៃទី២ ឈានចូលថ្ងៃទី៣ ខែកញ្ញា ឆ្នាំ២០១៧។ ភ្លាមៗបន្ទាប់ពីចាប់ខ្លួន សមត្ថកិច្ច ក៏ដឹកលោក ទៅឃុំនៅពន្ធនាគារត្រពាំងផ្លុង ក្នុងខេត្តត្បូងឃ្មុំ៕
Tag:
តុលាការ
កឹម សុខា
មេធាវី
© រក្សាសិទ្ធិដោយ thmeythmey.com
