ជាតិ
អ្នកប្រមាថព្រះមហាក្សត្រ នឹងត្រូវជាប់ពន្ធនាគារពី ១ ទៅ ៥ឆ្នាំ
× ភ្នំពេញ៖ បុគ្គលណា ដែលប្រមាថព្រះមហាក្សត្រ នឹងត្រូវផ្តន្ទាទោសឲ្យជាប់ពន្ធនាគារពី ១ ទៅ ៥ឆ្នាំ និងពិន័យជាប្រាក់ពី ២លានរៀល ទៅ១០លានរៀល។ នីតីបុគ្គល ដែលសំដៅលើអង្គភាព ស្ថាប័ន អង្គការ ឬក្រុមហ៊ុន ជាដើម អាចនឹងត្រូវពិន័យជាប្រាក់ពី ១០លានរៀល ទៅ៥០លានរៀល ព្រមទាំងទោសផ្សេងៗទៀត ក្នុងករណីប្រមាថព្រះមហាក្សត្រ។
ខ្លឹមសារថ្មីនេះ ទើបនឹងត្រូវបានតាក់តែងឡើងដោយរដ្ឋាភិបាល ដើម្បីបញ្ចូលទៅក្នុងក្រមព្រហ្មទណ្ឌ។ កិច្ចប្រជុំគណៈរដ្ឋមន្ត្រីមន្ត្រី នៅព្រឹកថ្ងៃទី២ ខែកុម្ភៈ ឆ្នាំ២០១៨ ដែលប្រព្រឹត្តទៅក្រោមការដឹកនាំរបស់សម្តេច ហ៊ុន សែន បានអនុម័តរួចហើយ ចំពោះខ្លឹមសារថ្មីនេះ។ យ៉ាងណា ខ្លឹមសារថ្មីខាងលើ នឹងក្លាយជាច្បាប់ ឬមាត្រាថ្មីក្នុងក្រមព្រហ្មទណ្ឌ ហើយដាក់ឲ្យអនុវត្តទៅបាន លុះត្រាតែស្ថាប័ននីតិបញ្ញត្តិ អនុម័ត ហើយព្រះមហាក្សត្រ ចេញព្រះរាជក្រម ប្រកាសឲ្យប្រើប្រាស់ជាមុនសិន។
លោក ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្ត្រី បានសរសេរសារលើគណនីហ្វេសប៊ុកយ៉ាងដូច្នេះថា៖«អំពើប្រមាថព្រះមហាក្សត្រ ត្រូវកំណត់ជាបទល្មើសព្រហ្មទណ្ឌ។ [ការតាក់តែងច្បាប់បែបនេះ] គឺដើម្បីលើកស្ទួយ និងការពារព្រះចេស្ដា និងព្រះកិត្តិនាមរបស់ព្រះមហាក្សត្រ»។
អ្នកនាំពាក្យនៃទីស្តីការគណៈរដ្ឋមន្ត្រីរូបនេះ បន្តថា តាមការសិក្សាស្រាវជ្រាវពីច្បាប់នៅបណ្ដាប្រទេសរាជានិយមមួយចំនួន អំពើប៉ះពាល់ដល់ព្រះមហាក្សត្រ ទោះបីតាមរូបភាពណាក៏ដោយ ត្រូវបានចាត់ទុកជាបទឧក្រិដ្ឋ ឬជាបទមជ្ឈិម ដែលត្រូវផ្ដន្ទាទោសយ៉ាងធ្ងន់ធ្ងរ។
ក្រមព្រហ្មទណ្ឌបច្ចុប្បន្ន បានចែងអំពីទោស នៃការធ្វើឃាត ការធ្វើទារុណកម្ម និងការប្រព្រឹត្តអំពើហិង្សា ជាដើម លើព្រះមហាក្សត្រនៃប្រទេសកម្ពុជា។ ប៉ុន្តែ ការដាក់ទោស ដោយសារការប្រមាថព្រះមហាក្សត្រ មិនទាន់មានចែងក្នុងក្រមព្រហ្មទណ្ឌឡើយ។
រដ្ឋធម្មនុញ្ញកម្ពុជា បានចែងថា ព្រះមហាក្សត្រ ជាព្រះប្រមុខរដ្ឋមួយជីវិត ដោយមិនអាចនរណា រំលោភបំពានបានឡើយ៕
Tag:
ព្រះមហាក្សត្រ
ច្បាប់
© រក្សាសិទ្ធិដោយ thmeythmey.com