រថយន្ដតន្ត្រីទិព្វ យកខេត្តឆ្ងាយៗជាគោលដៅផ្សព្វផ្សាយទម្រង់សិល្បៈបុរាណ

ជាតិ

សិល្បះ

រថយន្ដតន្ត្រីទិព្វ យកខេត្តឆ្ងាយៗជាគោលដៅផ្សព្វផ្សាយទម្រង់សិល្បៈបុរាណ

03, Feb 2018 , 8:19 pm

រូបភាព

រូបភាពពី Cambodian Living Arts (CLA)

ដោយ: ប៉ូ សាគុន

ភ្នំពេញ៖ ដោយបារម្ភខ្លាចឧបករណ៍ភ្លេងបុរាណខ្មែរត្រូវបាត់បង់ ក្រុមរថយន្តតន្ត្រីទិព្វ បានកំណត់យកបណ្តាខេត្ត ពិសេសខេត្តឆ្ងាយៗ ជាគោលដៅចម្បងផ្សព្វផ្សាយឧបករណ៍ភ្លេងទាំងនោះ ទៅកាន់បណ្ដាខេត្តជាច្រើន ជាពិសេសនៅតំបន់ឆ្ងាយៗ។

សហស្ថាបនិករថយន្តតន្ត្រីទិព្វអ្នកស្រី ថន សីម៉ា បានប្រាប់សារព័ត៌មានថ្មីៗថា ក្រុមរថយន្តតន្ត្រីទិព្វ មានគោលដៅធំបំផុតគឺផ្សព្វផ្សាយទម្រង់ឧបករណ៍ភ្លេងបុរាណខ្មែរ ទៅដល់ប្រជាជននៅតាមបណ្ដាខេត្តឆ្ងាយៗឱ្យពួកគេបានស្គាល់ផង និងចូលរួមថែរក្សាផង។ លើសពីនេះ បណ្តាខេត្តឆ្ងាយៗទាំងនោះ ក៏មានគោលដៅស្រាវជ្រាវឧបករណ៍ភ្លេងកម្រៗផងដែរ។ អ្នកស្រី សីម៉ាបញ្ជាក់ ៖«យើងពិតជាព្រួយបារម្ភមែន ពេលយើងយកឧបករណ៍ភ្លេងទៅលេងនៅតាមបណ្ដាខេត្ត អ្នកនៅទីនោះមិនស្គាល់ថាជាឧបករណ៍អ្វី សូម្បីតែជារបស់ខ្មែរ ឬមិនមែនក៏គាត់មិនដឹង។ ដូច្នេះបានយើងព្យាយាមផ្សព្វផ្សាយ ឱ្យពួកគាត់បានស្គាល់»។

ក្រៅពីនេះ ក្រុមរថយន្តតន្ត្រីទិព្វ ក៏បារម្ភទៅលើកង្វះខាតថវិកាដែរ ដោយសារកន្លងមកគឺទទួលបានជំនួយពីអាមេរិក ហើយរាល់សកម្មភាព គឺមានតែចំណាយ គ្មានចំណូលនោះទេ។ «បើមិនមានជំនួយបន្តក្រុមនេះអាចនឹងមានវិបត្តិ»។ នេះជាការបញ្ជាក់របស់អ្នកស្រី ថន សីម៉ា ដែលបានបន្តស្នើដល់យុវជន ឲ្យរួមគ្នាគាំទ្រ និងថែរក្សាឧបករណ៍ភ្លេងបុរាណខ្មែរឱ្យបានគង់វង្ស។

តាមសហស្ថាបនិកដដែល រថយន្តតន្ត្រីទិព្វធ្លាប់បានផ្សព្វផ្សាយឧបរណ៍ភ្លេងខ្មែរជាង៣០ ប្រភេទរួចហើយ ទៅតាមបណ្ដាខេត្តផ្សេងៗ។ បច្ចុប្បន្ន រថយន្តតន្ត្រីទិព្វស្រាវជ្រាវបានអ្នកចេះឧបករណ៍២ទៀត គឺគែន និងភ្លយបន្ថែមទៀត ហើយក្រុមរថយន្តតន្ត្រីទិព្វ នឹងនឹងបើកថ្នាក់បង្រៀនឧបករណ៍គែនដល់ក្មេងៗ នៅក្នុងខេត្តឧត្ដរមានជ័យ និងថ្នាក់បង្រៀនឧបករណ៍ភ្លយ នៅតំបន់អារ៉ែង។

លោក យឹង យន សិល្បករមួយរូបក្នុងក្រុមរថយន្តតន្ត្រីទិព្វ បានបញ្ជាក់ថា លោកចូលរួមជាមួយរថយន្តតន្ត្រីទិព្វ ដោយសារតែចូលរួមផ្សព្វផ្សាយទម្រង់សិល្បៈបុរាណ ទៅដល់ប្រជាពលរដ្ឋខ្មែរ និងជួយដល់សិល្បករបុរាណមួយចំនួន ឱ្យមានការងារធ្វើផងដែរ។

លោក ម៉ុន ហៃ តន្ត្រីករឧបករណ៍គែនមកពីខេត្តឧត្តរមានជ័យ ដែលបានចូលរួមជាមួយក្រុមរថយន្តតន្ត្រីទិព្វជិត៥ឆ្នាំមកហើយនោះ កត់សម្គាល់ថាពលរដ្ឋខ្មែរមួយចំនួន បានយល់ច្រឡំថា គែន ជាឧបករណ៍របស់ប្រទេសដទៃ។ ខណៈដែលពលរដ្ឋខ្មែរយល់ច្រឡំ ប៉ុន្តែប្រជាជននៅខេត្តសុរិន្ទ្រ នៅរក្សាបានយ៉ាងល្អ។ នេះបើតាម លោក ម៉ុន ហៃ ដែលលោក បន្តទៀតថាជិត៥ឆ្នាំ លោក បានផ្សព្វផ្សាយឧបករណ៍គែននេះ នៅតាមបណ្ដាខេត្តជាច្រើនក្នុងប្រទេសកម្ពុជា។

ក្រុមរថយន្តតន្ត្រីទិព្វ បង្កើតឡើងនៅចុងឆ្នាំ២០១៣ មានសមាជិកដំបូង៥នាក់ មានទាំងសិល្បករ និងតន្ត្រីករ។ នៅពេលថ្មីៗនេះ ក្រុមរថយន្តតន្ត្រីទិព្វ បានសហការជាមួយអង្គការសិល្បៈខ្មែរអមតៈ ដើម្បីផ្សព្វផ្សាយទម្រង់សិល្បៈបុរាណខ្មែរច្រើនទម្រង់ ទៅដល់ប្រជាពលរដ្ឋខ្មែរ៕