ជាតិ
សង្គមជាតិ
×![]()
ចាប់តាំងពីពាក់កណ្តាលឆ្នាំ២០១៧មក កម្ពុជា និងបណ្តាប្រទេសជាប់ព្រំដែន បានសម្រេចបង្កើតផែនការ «ភូមិស» ដើម្បីទប់ស្កាត់ការរាលដាលគ្រឿងញៀននៅតាមភូមិ។ អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងពីផលវិជ្ជមាននៃការបង្កើនផែនការ ភូមិស នេះ ប៉ុន្តែលោកទទួលស្គាល់ថា ការចូលរួមរបស់ពលរដ្ឋនៅមានកម្រិតនៅឡើយ។
«កាលពីឆ្នាំ២០១៧កន្លងទៅ បញ្ហាគ្រឿងញៀនមានការថយចុះ»។ នេះបើតាមការលើកឡើងរបស់ លោក ថោង សុគន្ធា នាសន្និបាតបូកសរុបលទ្ធផលការងារត្រួតពិនិត្យគ្រឿងញៀន ឆ្នាំ២០១៧ និងទិសដៅការងារ ឆ្នាំ២០១៨ ដោយលោកបានបន្ថែមថា ការបង្កើតផែនការភូមិស បានរួមចំណែកផងដែរក្នុងការទប់ស្កាត់បញ្ហាសង្គមមួយនេះ។
កាលពីឆ្នាំ២០១៦ នាកិច្ចប្រជុំថ្នាក់រដ្ឋមន្ត្រី នៅប្រទេសថៃ ស្ដីពីការទប់ស្កាត់គ្រឿងញៀន បីភាគី កម្ពុជា-ឡាវ-ថៃ បានសម្រេចរួមគ្នាបង្កើតផែនការ ភូមិស នៅតាមបន្ទាត់ព្រំដែន។ «ភូមិស» ដែលមានន័យថា ជាតំបន់គ្មានគ្រឿងញៀននៅតាមព្រំដែន ត្រូវបានអនុវត្តសាកល្បងចាប់តាំងពីពាក់កណ្តាលឆ្នាំ២០១៧ មក។
លោក ថោង សុគន្ធា បានអះអាងថា គម្រោងនៃការបង្កើតផែនការភូមិសនេះមានរយៈពេលយូរមកហើយ ហើយផែនការនេះ ទើបតែរៀបចំជាក់លាក់ ដាក់ឲ្យអនុវត្តសាកល្បង កាលពីពាក់កណ្ដាលឆ្នាំ២០១៧ ដោយមិនទាន់បានបូកសរុប និងវាយតម្លៃលទ្ធផលច្បាស់លាស់នៅឡើយទេ។
អគ្គលេខាធិការរង អាជ្ញាធរជាតិប្រយុទ្ធប្រឆាំងគ្រឿងញៀន បានបន្ថែមថា ចលនាចូលរួមរបស់ពលរដ្ឋនៅមានកម្រិតនៅឡើយ ដែលតម្រូវឲ្យអាជ្ញាធរមានសមត្ថិកិច្ចបន្តធ្វើកិច្ចការនេះដដែល។ «ភូមិស» មានការកំណត់លក្ខណៈសម្បត្តិ ដូចជា គ្មានការដាំដុះ កែច្នៃ ប្រើប្រាស់ ទោះបីមានអ្នកប្រើប្រាស់នៅក្នុងភូមិនោះក៏ពិតមែន ប៉ុន្តែស្ថិតក្នុងការគ្រប់គ្រង ហើយបានទទួលការព្យាបាល និងធ្វើឲ្យជាប់រហូត។
លោក ថោង សុគន្ធា បានលើកឡើងថា៖ «យើងបង្កើតផែនការ ភូមិស នៅតាមព្រំដែន ដើម្បីទប់ស្កាត់កុំឲ្យមានការនាំចូលគ្រឿងញៀន ហើយអ្វីដែលសំខាន់នោះ យើងចង់បង្កើនការយល់ដឹងរបស់ពលរដ្ឋ ឲ្យពួកគាត់សហការផ្តល់ព័ត៌មានដល់សមត្ថកិច្ចជំនាញ»៕
© រក្សាសិទ្ធិដោយ thmeythmey.com
