កីឡាអន្តរជាតិ
អន្តរជាតិ
Neymar រម្លឹកកាលពី Barca វាយបកឈ្នះ PSG ៦-១ ដើម្បីលើកទឹកចិត្តក្រុមផ្តួល Real វិញ
× Neymar ជឿជាក់ថា Paris Saint-Germain នៅតែអាចឈានទៅប្រកួតវគ្គ ៨ក្រុមផ្តាច់ព្រ័ត្រនៃក្របខណ្ឌ UEFA Champions League បាន បើទោះបីចាញ់ Real Madrid ៣-១ នៅជើងទីមួយនៃវគ្គ ១៦ក្រុមចុងក្រោយរបស់ពួកគេកាលពីរាត្រីថ្ងៃពុធទី ១៤ ខែកុម្ភៈក៏ដោយ។
កីឡាករដែលមានតម្លៃខ្លួនថ្លៃបំផុតលើលោកបានប្រាប់បណ្តាញព័ត៌មានប្រេស៊ីលដូច្នេះថា៖«ការវិភាគរបស់ខ្ញុំគឺថាយើងបានប្រព្រឹត្តកំហុសមួយចំនួនដោយខ្លួនឯងអំឡុងការប្រកួត។ យើងមិនមានភាពរឹងមាំគ្រប់គ្រាន់នៅពេលជិតបញ្ចប់ការប្រកួតនោះ ហើយកីឡាករ PSG បានខ្ជះខ្ជាយការរកគ្រាប់បាល់បញ្ចូលទីជាច្រើនគ្រាប់នៅទឹកដី Santiago Bernabeu ទៀតផង»។
Adrien Rabiot បានរកគ្រាប់បាល់ឲ្យក្រុមមកពីលីកកំពូលបារាំងនាំមុខមុន ប៉ុន្តែការស៊ុតបញ្ចូលទីពីរគ្រាប់របស់ Cristiano Ronaldo និងមួយគ្រាប់របស់ Marcelo បានធ្វើឲ្យ Real Madrid នាំមុខ ៣-១ នៅជើងទី១។
ខ្សែប្រយុទ្ធអន្តរជាតិប្រេស៊ីល វ័យ២៦ឆ្នាំរូបនេះបានបន្ថែមទៀតថា៖«ទម្រង់លេងរបស់ក្រុមយើងគឺល្អហើយ ប៉ុន្តែខ្ញុំគិតថាយើងចាំបាច់ត្រូវលេងឲ្យល្អជាងនេះទៀត ប្រសិនបើយើងចង់ទម្លាក់ Real Madrid ឲ្យបាននោះ»។
Neymar បានផ្តល់ក្តីសង្ឃឹមដល់ក្រុមទាំងមូលមុនជំនួបជើងទី២ ដោយរម្លឹកកាលពីរូបគេលេងនៅ Barcelona ដែលចាញ់ PSG ៤-០ នៅជើងទីមួយ នៃវគ្គ១៦ក្រុមចុងក្រោយកាលពីរដូវកាលមុន ប៉ុន្តែពួកគេនៅតែអាចវាយបកយកឈ្នះវិញដោយទទួលជ័យជម្នះ ៦-១៕
Tag:
បាល់ទាត់
Neymar
Paris Saint-Germain
UEFA Champions League
© រក្សាសិទ្ធិដោយ thmeythmey.com