ជាតិ
សេដ្ឋកិច្ច
ទំនិញខ្មែរទៅកាន់ទីផ្សារអាម៉េរិក និងពីអាម៉េរិកមកខ្មែរវិញ កើនឡើងនៅឆ្នាំ២០១៧ សម្តេចនាយករដ្ឋមន្ត្រី ហ៊ុន សែន នាជំនួបចុះសួរសុខទុក្ខកម្មករតាមរោងចក្រកន្លងមក។( រូបថត AFP)
×
ក្រសួងពាណិជ្ជកម្ម បានបង្ហាញពីតួលេខដ៏វិជ្ជមានលើការនាំចេញទំនិញកម្ពុជាទៅកាន់ទីផ្សារសហរដ្ឋអាម៉េរិក និងពីទីផ្សារអាម៉េរិក មកកាន់កម្ពុជា។ តាមតួលេខដែលដកស្រង់ដោយទីភ្នាក់ងារព័ត៌មាន AKP ការផ្លាស់ប្តូរពាណិជ្ជកម្មរវាងកម្ពុជា និងមហាអំណាចអាម៉េរិក មានកំណើនជាងឆ្នាំ២០១៦ ។
នៅឆ្នាំ២០១៧ កម្ពុជាបាននាំទំនិញទៅកាន់សហរដ្ឋអាម៉េរិក ក្នុងទំហំទឹកប្រាក់សរុប ៣.០៦៤លានដុល្លារអាម៉េរិក ពោលគឺកើនឡើង ៨,៨៨ភាគរយ បើធៀបនឹងឆ្នាំ២០១៦ ដែលមានចំនួនទឹកប្រាក់ ២.៨១៤លានដុល្លារអាម៉េរិក។ ទិន្នន័យបានបង្ហាញថា ទំនិញដែលនាំចេញពីកម្ពុជាទៅទីផ្សារអាម៉េរិកភាគច្រើនជាផលិតផលវាយនភណ្ឌកាត់ដេរ និងស្បែកជើង និងកាបូបយួរអ្នកដំណើរជាដើម។
ស្របពេលជាមួយគ្នានេះ ការនាំចូលទំនិញពីសហរដ្ឋអាមេរិក មកកម្ពុជាវិញក៏មានការកើនឡើងផងដែរ។ នៅឆ្នាំ២០១៧ ទំហំនៃការនាំចូលទំនិញពីអាម៉េរិកមកកម្ពុជា មានតម្លៃទឹកប្រាក់ប្រមាណ ៤០០លានដុល្លារអាម៉េរិក ដោយកើនឡើង ១១ភាគរយ បើធៀបនឹងឆ្នាំ២០១៦ ដែលមានចំនួនទឹកប្រាក់ ៣៦០លានដុល្លារអាម៉េរិក។ ទំនិញសំខាន់ៗដែលកម្ពុជានាំចូលពីសហរដ្ឋអាមេរិកមានដូចជា គ្រឿងអេឡិចត្រូនិក យានយន្ត គ្រឿងចក្រ ឱសថ និងបរិក្ខារពេទ្យ។
សហរដ្ឋអាមេរិក គឺជាទីផ្សារធំបំផុតលំដាប់ទី២សម្រាប់កម្ពុជាបន្ទាប់ពីទីផ្សារ សហគមន៍អឺរ៉ុប ក្នុងនោះសហរដ្ឋអាមេរិកបានស្រូបយកក្នុងរង្វង់ពី ២០ ទៅ៣០ភាគរយ នៃទំនិញសរុបដែលបាននាំចេញពីកម្ពុជា។
ជាការកត់សម្គាល់ កាលពីឆ្នាំ្ម២០១៧ រដ្ឋាភិបាលសហរដ្ឋអាម៉េរិក បានផ្តល់ការអនុគ្រោះពាណិជ្ជកម្មពន្ធទាំងស្រុង ដល់ប្រទេសកម្ពុជា សម្រាប់ប្រភេទកាបូបយួរអ្នកដំណើរ ចូលទៅកាន់ទីផ្សាររបស់ខ្លួន៕
Tag:
ទីផ្សារកម្ពុជា
អាម៉េរិក
ពាណិជ្ជកម្ម
© រក្សាសិទ្ធិដោយ thmeythmey.com