ក្រោយអនុសាសន៍សម្តេច ក្រសួងធម្មការណែនាំពីការរៀបចំអាសនៈព្រះសង្ឃ

ជាតិ

សង្គមជាតិ

ក្រោយអនុសាសន៍សម្តេច ក្រសួងធម្មការណែនាំពីការរៀបចំអាសនៈព្រះសង្ឃ

17, Feb 2018 , 9:30 pm

រូបភាព

ដោយ: ថ្មីៗ

ភ្នំពេញ៖ បន្ទាប់ពីមានអនុសាសន៍របស់សម្ដេចនាយករដ្ឋមន្ត្រី ហ៊ុន សែន នាពេលថ្មីៗនេះ ក្រសួងធម្មការ និងសាសនា នៅថ្ងៃទី១៤ខែកុម្ភៈ បានចេញសារាចរណែនាំមួយ សម្រាប់ការរៀបចំអាសនៈឲ្យបានសមរម្យចំពោះព្រះសង្ឃ។

អត្ថបទទាក់ទង

សម្តេច ហ៊‌ុន សែន៖ គ្រប់កម្មវិធី ត្រូវរៀបចំអាសនៈព្រះសង្ឃ ឲ្យខ្ពស់ជាងគ្រហស្ថ

ដើម្បីលើកកម្ពស់សេចក្ដីថ្លៃថ្នូរ កិត្យានុភាពនៃព្រះពុទ្ធសាសនា ស្របតាមរដ្ឋធម្មនុញ្ញ មាត្រា៤៣ ដែលចែងថា ព្រះពុទ្ធសាសនាជាសាសនារបស់រដ្ឋ និងដើម្បីលើកតម្កើងការគោរពប្រតិបត្តិចំពោះព្រះសង្ឃ ក្រសួងធម្មការ និងសាសនា បានណែនាំចំណុចមួយចំនួនក្នុងការរៀចំអាសនៈរបស់ព្រះសង្ឃ។

ទី១, ឧបាសក ឧបាសិកា គប្បីរៀបចំអាសនៈព្រះសង្ឃឲ្យបានសមគួរ ទោះបីអាសនៈនោះក្រាលដោយកន្ទេល ភួយ ព្រំចៀម ក្រមា ជាដើមក្ដី។ ទី២ ក្នុងពិធីផ្លូវការរបស់រដ្ឋ ឬពិធីសាសនា មានបុណ្យទានធំៗ អាសនៈរបស់ព្រះសង្ឃ ត្រូវរៀបចំឲ្យបានខ្ពស់យ៉ាងតិច ២តឹក ជាងកន្លែងអង្គុយរបស់គ្រហស្ថ និងភ្ញៀវទាំអស់។ ទី៣ ក្នុងករណីអាសនៈព្រះសង្ឃ ត្រូវបានចាប់ភ្ជាប់រួចជាស្រេច មិនអាចរុះរើបាន នោះគ្រាន់តែបែងចែកអាសនៈសម្រាប់ព្រះសង្ឃគង់ឲ្យដាច់ហត្ថបាស (ឲ្យដាច់ចេញពីគ្រហស្ថ) ជាការស្រេច។

ទី៤ ក្នុងពិធីរាប់បាត្រ ឬប្រគល់ទេយ្យទានដល់ព្រះសង្ឃ គ្រហស្ថគប្បីដោះទ្រនាប់ជើងជាដរាប ដើម្បីជាការគោរពចំពោះព្រះសង្ឃដែលជាឧត្តមភេទ និងទី៥ ពេលដែលគ្រហស្ថគោរពសំពះព្រះសង្ឃ ព្រះសង្ឃគ្រប់អង្គមិនគួរលើកព្រះហស្តសំពះតបវិញទេ ដោយគ្រាន់តែសម្ដែងអាការៈគោរពសង្រួមឥន្ទ្រីយ៍សំវរៈ បន្ទន់ព្រះកាយបន្តិចជាការសមគួរ ដើម្បីឲ្យស្របនឹងទំនៀមទម្លាប់ព្រះពុទ្ធសាសនា និងព្រះវិន័យបញ្ញត្តិផង៕