ជាតិ
សង្គមជាតិ
×![]()
កុមារប្រមាណ២០នាក់ពីអង្គការផ្ទះបាយកុមារ ត្រូវបាននាំទៅទស្សនកិច្ច និងចូលរួមហាត់រៀនត្បាញក្រមាដែលវែងជាងគេក្នុងពិភពលោក។ យុទ្ធនាការក្រមាបានបង្កប់ន័យនៃសាមគ្គីភាព និងក្តីស្រឡាញ់រវាងខ្មែរនិងខ្មែរ។
ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បាននាំកុមារក្រីក្រប្រមាណ២០នាក់នៃអង្គការផ្ទះបាយកុមារចូលរួមរៀនសូត្រអំពីការត្បាញក្រមាខ្មែរនាល្ងាចថ្ងៃទី១៨ខែកុម្ភៈ។
ចលនា Go Go Cambodia បានរៀបចំយុទ្ធនាការត្បាញក្រមាប្រវែង១០០០ម៉ែត្រ ដើម្បីបំបែកកំណត់ត្រាក្រមាវែងជាងគេក្នុងពិភពលោក។ យុទ្ធនាការនេះដែលត្រូបានរៀបចំនៅលើទីវាលព្រមេរុ មុខសារមន្ទីរជាតិ បានចាប់ផ្តើមនាថ្ងៃទី១៤កុម្ភៈកន្លងទៅ ខណៈពិភពលោកបានប្រារព្ធទិវានៃក្តីស្រឡាញ់។ ព្រះមហាក្សត្រ ព្រះបាទព្រះបរមនាថ នរោត្តម សីហមុនី សម្តេចម៉ែ នរោត្តម មុនីនាថ សីហនុ និងសម្តេច ប៊ុន រ៉ានី បានចូលរួមសម្ពោធបើកយុទ្ធនាការត្បាញក្រមាខ្មែរ១០០០ម៉ែត្រ។
នៅពេលដែលលោក ហ៊ុន ម៉ានី គាំទ្រសកម្មភាព Go Go Cambodia ហើយការត្បាញក្រមាឲ្យបានវែងជាងគេក្នុងពិភពលោកត្រូវការការចូលរួមនោះ លោក ហ៊ុន ម៉ានី ត្រូវជួយបំផុសបំផុលឲ្យពលរដ្ឋខ្មែរគ្រប់ស្រទាប់បានចូលរួមត្បាញក្រមាខ្មែរ ដើម្បីបំបែកកំណត់ត្រាពិភពលោក។
នៅចំពោះមុខអ្នកសារព័ត៌មាន ដែលតាមផ្តិតយករូបភាពលោក និងកុមារផ្ទះបាយកុមារនៅទីវាលព្រះមេរុនោះ លោក ហ៊ុន ម៉ានី បានអធិប្បាយប្រាប់អ្នកកាសែតយ៉ាងដូច្នេះថា៖«កូនៗផ្ទះបាយកុមារ មានសិទ្ធិចូលរួមត្បាញក្រមាដូចមនុស្សទូទៅដែរ។ យើងត្រូវចងចាំថា អ្វីមួយក៏ដោយ ឲ្យតែយើងរួបរួមគ្នា យើងអាចធ្វើបានទាំងអស់»។
ប្រធានសហភាពសហព័ន្ធយុវជនកម្ពុជា ដែលពាក់អាវក្រណាត់ពណ៌សហើយមានក្រមាបង់ក ស្លៀកខោខ្លី និងពាក់ស្បែកជើងផ្ទាត់ បានមើលឃើញថា យុទ្ធនាការក្រមាមានអត្ថន័យជ្រៅតំណាងឲ្យការរួបរួមគ្នា ជួយគ្នា និងស្រឡាញ់គ្នារវាងខ្មែរនិងខ្មែរ។ លោកបានពន្យល់ថា៖«ទីតាំងនេះបានបង្ហាញពីស្នាមញញឹម ភាពស្រឡាញ់គ្នា រាប់អានគ្នា និងគាំទ្រគ្នា។ វេទិកានេះមិនត្រឹមតែផ្តល់ឱកាសឲ្យមានការសាកល្បងបំបែកកំណត់ត្រាក្រមាវែងជាងគេក្នុងពិភពលោកប៉ុណ្ណោះទេ តែវាក៏ជាវេទិកានៃការប្រមូលផ្តុំ និងផ្តល់ភាពកក់ក្តៅរវាងខ្មែរនិងខ្មែរដែរ តាមរយៈយុទ្ធនាការក្រមានេះ»។
ពលរដ្ឋខ្មែរជាច្រើន ព្រមទាំងជនបរទេសផងបានចូលរួមហាត់រៀន និងត្បាញក្រមាខ្មែរដើម្បីបំបែកកំណត់ត្រាជាក្រមាវែងជាងគេក្នុងពិភពលោក។ នៅលើទីវាលព្រះមេរុ នៅពេលនេះបានក្លាយជាទីតាំងពិព័រណ៌ក្រមាយ៉ាងធំ និងជាកន្លែងកម្សាន្តដែលផ្តល់ចំណេះដឹងអំពីក្រមាផងដែរដល់សាធារណជនទូទៅ។ មនុស្សជាច្រើនបានជួបជុំគ្នានៅលើទីវាលព្រះមេរុក្បែរព្រះបរមរាជវាំង។
លើសពីសាមគ្គីភាព និងក្តីស្រឡាញ់ លោក ហ៊ុន ម៉ានី ក៏មានមោទកភាព ដោយបានយល់ដឹងកាន់តែច្រើនអំពីដំណាក់កាលនៃការត្បាញក្រមា ក៏ដូចជាភាពលំបាកនៃកិច្ចការងារនេះ។
ត្រង់ចំនុចនេះ លោក ង៉ូវ ឈីវ ដែលជាប្រធាននៃអង្គការផ្ទះបាយកុមារដែលបានដឹកនាំកុមារទៅក្នុងយុទ្ធនាការក្រមានោះ ក៏បានពន្យល់ប្រាប់អ្នកកាសែតឲ្យដឹងដែរថា លោកចង់ឲ្យកុមារ និងយុវជនយល់ដឹងអំពីការត្បាញក្រមាផង និងអត្ថន័យនៃសាមគ្គីភាពផង ដូចការរៀបរាប់របស់លោក ហ៊ុន ម៉ានី៕
Tag:
ហ៊ុន ម៉ានី ក្រមា world record
Guinness book
© រក្សាសិទ្ធិដោយ thmeythmey.com
