កីឡាជាតិ
ជាតិ
NOCC គ្រោងចំណាយ៦០ម៉ឺនដុល្លារ រៀបចំពិធីបើក និងបិទកីឡាជាតិលើកទី២
× គណៈកម្មាធិការជាតិអូឡាំពិកកម្ពុជា (NOCC) គ្រោងចំណាយថវិកាប្រមាណពី៥០ទៅ៦០ម៉ឺនដុល្លារ សម្រាប់រៀបចំពិធីបើកនិងបិទការប្រកួតកីឡាជាតិលើកទី២នៅឆ្នាំនេះ។ ចំនួននេះ កើនឡើងប្រមាណ៥០ភាគរយបើធៀបនឹងលើកទី១ កាលពីឆ្នាំ២០១៦។ ការប្រកួតកីឡាជាតិឆ្នាំនេះ នឹងប្រព្រឹត្តទៅចាប់ពីថ្ងៃទី២៥ ឧសភា ដល់ថ្ងៃទី៦ មិថុនា ដោយមាន២៧ប្រភេទកីឡាចូលរួម។
លោក វ៉ាត់ ចំរើន អគ្គលេខាធិការ NOCC ដែលជាស្ថាប័នកីឡាទទួលបន្ទុករៀបចំពិធីបើកនិងបិទកីឡាជាតិបានអះអាងថា ពិធីបើកនិងបិទកីឡាជាតិលើកទី២ឆ្នាំនេះមានលក្ខណៈប្លែក និងអស្ចារ្យជាងលើកមុន។ «យើងនឹងរៀបចំឲ្យប្លែក និងចម្លែករហូត១៨០ដឺក្រេ មានន័យថាប្លែកលើសពីរដង ដែលយើងមិនធ្លាប់ឃើញកន្លងមក»។ ជាការបញ្ជាក់ពីភាពអស្ចារ្យនៃពិធីបើកនិងបិទកីឡាជាតិលើកទី២របស់លោក វ៉ាត់ ចំរើន ដែល NOCC គ្រោងរៀបចំនៅឆ្នាំនេះ។
ការបង្កើនភាពទាក់ទាញ និងការចាប់អារម្មណ៍សម្រាប់ទស្សនិកជននេះ បានធ្វើឲ្យការចំណាយរបស់ NOCC នៅឆ្នាំនេះក៏កាន់តែប៉ោងធំផងដែរ ពោលគឺ NOCC គ្រោងចំណាយថវិកាប្រមាណពី៥០ទៅ៦០ម៉ឺនដុល្លារ ដែលកើនឡើងប្រមាណ៥០ភាគរយបើធៀបនឹងលើកមុន ដែលមានប្រមាណ៤០ម៉ឺនដុល្លារ។
ការកើនឡើងគម្រោងចំណាយនេះ កំពុងចោទជាបញ្ហាសម្រាប់ថ្នាក់ដឹកនាំ NOCC ព្រោះបច្ចុប្បន្នស្ថាប័ននេះពុំទាន់មានថវិកាគ្រប់គ្រាន់ដូចការគ្រោងទុកនៅឡើយទេ។ តាមរយៈគណៈកម្មការរៀបចំការប្រកួតកីឡាស៊ីហ្គេមឆ្នាំ២០២៣ NOCC នឹងដាក់សំណើរសុំថវិកាមួយចំនួនពីរាជរដ្ឋាភិបាលកម្ពុជា ដើម្បីបង្គ្រប់លើថវិកាឧបត្ថម្ភរបស់ក្រុមហ៊ុនឯកជន សម្រាប់ទ្រទ្រង់ការចំណាយនៅឆ្នាំនេះ។
«យើងនៅខ្វះទំហំថវិកាដើម្បីរ៉ាប់រងការចំណាយ លើកមុនយើងចំណាយប្រហែលជា៤០ម៉ឺនដុល្លារ សម្រាប់ពិធីបើកនិងបិទ។ តែលើកនេះយើងគ្រោងចំណាយពី៥០ទៅ៦០ម៉ឺនដុល្លារ តែបច្ចុប្បន្នយើងទទួលបានការឧបត្ថម្ភមិនលើសឆ្នាំ២០១៦ នៅឡើយទេ។ បច្ចុប្បន្នយើងមានដៃគូសហការធំៗចំនួនពីរ ដូច្នេះយើងត្រូវដៃគូឧបត្ថម្ភយ៉ាងហោចណាស់ពីរបន្ថែមទៀតទើបអាចគ្រប់»។ នេះជាការបង្ហាញកង្វល់របស់លោក វ៉ាត់ ចំរើន អគ្គលេខាធិការ NOCC។
ការចំណាយរីកប៉ោងធំនៅឆ្នាំនេះ ដោយសារ NOCC គ្រោងបន្ថែមការសម្តែងផែនកីឡាករ យុវជន និងវប្បធម៌។ NOCC គ្រោងដាក់ឲ្យមានការសម្តែងពីក្រុមកីឡាករមកពីសាលាកីឡា, ក្រុមតេក្វាន់ដូ WTF, ក្រុមតេក្វាន់ដូ ITF, ក្រុមល្បុក្កតោ, ក្រុមយុវជន ស.ស.យ.ក និងក្រុមវិចិត្រសិល្បជាដើម ដែលមានសមាជិកសរុបប្រមាណជាង៥ពាន់នាក់។ អ្វីដែលកាន់តែអស្ចារ្យ គឺបន្ថែមការសម្តែងផ្នែកបច្ចេកវិទ្យាភ្លើងពណ៌ និងការបាញ់កាំជ្រួច។
បើយោងតាមអគ្គលេខាធិការ NOCC រូបនេះ ពិធីបើកនិងបិទព្រឹត្តិការណ៍កីឡាជាតិដែលជាការប្រកួតកម្រិតខ្ពស់សម្រាប់ជាតិ គឺដើម្បីកំណត់ភាពជោគជ័យ និងការទាក់ទាញរបស់ជាតិទាំងមូលទៅលើការប្រកួត។ លើសពីនេះ ដើម្បីបង្ហាញសក្តានុពលជាតិ វប្បធម៌ជាតិ ការរីកចម្រើន សេដ្ឋកិច្ចជាតិ សន្តិភាព សន្តិសុខ និងសាមគ្គីភាព។
ការប្រកួតកីឡាជាតិឆ្នាំនេះ នឹងប្រព្រឹត្តទៅចាប់ពីថ្ងៃទី២៥ ឧសភា ដល់ថ្ងៃទី៦ មិថុនា ដោយមាន២៧ប្រភេទកីឡាចូលរួម ដែលកើនឡើងជិកពាក់កណ្តាលបើធៀបនឹងលើកមុនដែលមានត្រឹមតែ១៥ប្រភេទកីឡា។ កីឡាទាំងនោះរួមមាន បាល់ទាត់, បាល់ទះ, បាល់បោះ, អត្តពលកម្ម, ប៉េតង់, វាយសី, វាយកូនបាល់, ចំបាប់, វាយកូនឃ្លីលើតុ, តេក្វាន់ដូ WTF, ហែលទឹក, ល្បុក្កតោ, កាយសម្ព័ន្ធ, ប្រដាល់សកល, សូរិនស្ស៊ិកាំប៉ូ, តេក្វាន់ដូ ITF, ការ៉ាតេ, ប្រដាល់គុនខ្មែរ, យូដូ, ទ្រីយ៉ាត្លុង, វ៉ូវីណាម, បេស្បល, ប្រណាំងទោចក្រយាន, សីដក់, បាញ់កាំភ្លើង, បាល់ឱប និងកីឡាសូហ្វតិន្នីស៕
Tag:
វ៉ាត់ ចំរើន
NOCC
កីឡាជាតិលើកទី២
© រក្សាសិទ្ធិដោយ thmeythmey.com