រថយន្ត
អន្តរជាតិ
ម៉ាឡេស៊ី ព្រមានបណ្តេញជនបរទេស ដែលបំពានច្បាប់ចរចរណ៍មិនរាងចាល រូបភាព៖ AFP
× រដ្ឋាភិបាលក្រុងកូឡាឡាំពួរ បានព្រមានជនបរទេស ដែលកំពុងតែធ្វើការ នៅក្នុងប្រទេសម៉ាឡេស៊ីឲ្យមានការប្រុងប្រយ័ត្នក្នុងការធ្វើដំណើរតាមផ្លូវ។ ក្រុងឡាឡាំពួរ ក៏បានត្រៀមចាត់វិធានការក្តៅដោយបណ្តេញរាល់ជនបរទេសទាំងឡាយណា ដែលមិនគោរពច្បាប់ចរាចរណ៍ម៉ាឡេស៊ីច្រើនលើកច្រើនសារនោះ ។
អគ្គនាយកអន្តោប្រវេសន៍ម៉ាឡេស៊ី លោក Mustafar Ali នៅថ្ងៃ១២ កុម្ភៈ បានថ្លែងទៅកាន់អ្នកសារព័ត៌មាន ថាលោក បានទទួលសំណើមួយពីអគ្គនាយដឹកជញ្ជូន និងផ្លូវថ្នល់ ឲ្យបណ្តេញរាល់ជនបរទេសណា ដែលបានបំពានច្បាប់ចរាចរណ៍ម៉ាឡេស៊ីមិនចេះរាងចាល។ នេះបើយោងតាមការចុះផ្សាយរបស់សារព័ត៌មាន The Strait Times ។
តាមការអះអាងរបស់លោកអគ្គនាយកអន្តោប្រវេសន៍រូបនេះ ការណ៍ ដែលអង្គភាពដឹកជញ្ជូន និងផ្លូវថ្នល់ស្នើឲ្យមានវិធានការបែបនេះ ដោយសារតែអង្គភាពមួយនេះ មិនចង់ឃើញជនបរទេសទាំងឡាយ ដែលចូលមកប្រទេសម៉ាឡេស៊ី ហើយបំពានច្បាប់ដោយមិនមានការញញើតសោះនោះ ។
តាមប្រភព័ត៌មានដដែលនោះ បទល្មើសចរាចរណ៍ដែលជនបរទេសបានប្រព្រឹត្តកន្លងមក រួមមាន ការបើកបរក្នុងល្បឿនលឿន, ការបំពានភ្លើងក្រហម, បើកបរដោយមិនមានបណ្ណអនុញ្ញាត និងជាពិសេសនោះពួកគេ មិនបានបង់ពន្ធផ្លូវ ។
ខណៈមិនបញ្ជាក់ពីតួលេខពិតប្រាកដនៃជនល្មើសបរទេស លោកអគ្គនាយកអន្តោប្រវេសន៍ម៉ាឡេស៊ី បានសង្កត់ធ្ងន់ថា ចំនួនអ្នកបង្កមិនមានច្រើនពេកទេ ក៏ប៉ុន្តែព្យសនកម្ម ដែលពួកគេបានបង្កនោះ ពិតជាធំធេងពេក ដែលមិនគួរលើកលែងឡើយ ៕
© រក្សាសិទ្ធិដោយ thmeythmey.com