ជាតិ
ឆ្នាំ២០១៧ ទេសចរចិនមកកម្សាន្តខេត្តសៀមរាបជាង ៩១ម៉ឺននាក់
× សៀមរាប៖ ទេសចរជនជាតិចិន ស្ថិតក្នុងលំដាប់កំពូល ដែលមកទស្សនាខេត្តសៀមរាប។ របាយការណ៍របស់មន្ទីរទេសចរណ៍ខេត្ត ជនជាតិចិនមានចំនួនជាង ៩១ម៉ឺននាក់ ដែលបានធ្វើដំណើរមកកម្សាន្តខេត្តសៀមរាបក្នុងឆ្នាំ២០១៧។ អ្វីដែលគួរឱ្យកត់សម្គាល់នោះ គឺថា មានតែទេសចរចិនតែប៉ុណ្ណោះដែលកើនឡើងខ្លាំង ក្រៅពីនេះទេសចរនៅប៉ែកអឺរ៉ុប ដូចជាអង់គ្លេស បារាំង និងអាឡឺម៉ង់ជាដើម មានការធ្លាក់ចុះ និងកើនឡើងបន្តិចបន្តួចតែប៉ុណ្ណោះ។
ឆ្នាំ២០១៧ ខេត្តសៀមរាបទទួលទេសចរណ៍សរុបចំនួន ៥,៥៤៣,៤៣៤នាក់ កើនឡើង ៩.៩៣% ក្នុងនោះទេសចរបរទេសមានចំនួន ២,៤៥៧,២៨២នាក់ កើនឡើងជាង ១១% និងទេសចរជាតិ ៣,០៨៦,១៥២នាក់ កើនឡើងជិត ៩%។ សម្រាប់មធ្យោបាយធ្វើដំណើរវិញ ក្នុងនោះតាមរយៈយន្តហោះមានចំនួន ៨១.៤០% ផ្លូវគោក ១៨.០៨% និងតាមជើងទឹក ០.៥២%។
ទេសចរជនជាតិចិន បានស្ថិតនៅលំដាប់កំពូលដែលមកកម្សាន្តខេត្តសៀមរាបច្រើនជាងគេក្នុងឆ្នាំ២០១៧។ ចិនមានចំនួន ៩១០,១០៧នាក់ កើនឡើង ៣៦.៣៩% លេខ២ គឺទេសចរកូរ៉េ មានចំនួន ២៤៦,៥៣៥នាក់ ធ្លាក់ចុះ ០.០៣% លេខ៣ ទេសចរជនជាតិអាមេរិក មានចំនួន ២២១,៩៦៦នាក់ ថយចុះ ជិត៣០% លេខ៤ ទេសចរអង់គ្លេស មានចំនួន ១៣៨,៩៧២នាក់ ធ្លាក់ចុះ ជាង១០% លេខ៥ ជនជាតិជប៉ុនមានចំនួន ១២៤,៥៥០នាក់ កើនឡើង ជាង១២% លេខ៦ ទេសចរបារាំង មានចំនួន ១០០,៨០០នាក់ កើនឡើង ១.៦៣% លេខ៧ អូស្ត្រាលី មានចំនួន ៩២,១៩៤នាក់ ថយចុះ ០.២០% និងទេសចរអាឡឺម៉ង់ មានចំនួន ៧៣,៣២៨នាក់ ថយចុះ ៥.៨៧%។
ក្នុងសន្និបាតបូកសរុបការងារឆ្នាំ២០១៧ និងលើកទិសដៅ២០១៨ របស់មន្ទីរទេសរណ៍ខេត្តសៀមរាប នារសៀលថ្ងៃទី ២០ ខែកុម្ភៈ ឆ្នាំ២០១៨ នៅរដ្ឋបាលខេត្តសៀមរាប រដ្ឋមន្ត្រីក្រសួងទេសចរណ៍ មើលឃើញពីការបន្តកើនឡើងពីចំនួនទេសចរចិននៅកម្ពុជា។ តាមលោក ថោង ខុន តទៅមុខ ទេសចរចិននឹងមិនថយទេ នាពេលខាងមុខ។ លោករដ្ឋមន្ត្រីបានចោទជាសំណួរថា «តើយើងបានត្រៀមខ្លួនរួចហើយឬនៅ ដើម្បីបំពេញសេវា និងយកលុយពីទេសចរចិន?»៕
© រក្សាសិទ្ធិដោយ thmeythmey.com