កីឡាអន្តរជាតិ
អន្តរជាតិ
អ៊ីរ៉ាក់សុំ FIFA ឲ្យផ្តល់សិទ្ធិខ្លួនឡើងវិញក្នុងការធ្វើជាម្ចាស់ផ្ទះសម្រាប់ជំនួបអន្តរជាតិ លោក Abdulhussein Abttan រដ្ឋមន្ត្រីយុវជន និងកីឡាអ៊ីរ៉ាក់ បទសម្ភាសដល់ AFP នៅកីឡដ្ឋាន Najaf International Stadium ។ រូបថត AFP
× អ៊ីរ៉ាក់ដែលមានកីឡដ្ឋានល្អៗតាមស្តង់ដារ សង្ឃឹមថា សហព័ន្ធកីឡាបាល់ទាត់អន្តរជាតិ (FIFA) ពិចារណាលុបការហាមប្រាម ដើម្បីឲ្យពួកគេមានឱកាសធ្វើជាម្ចាស់ផ្ទះឡើងវិញសម្រាប់ជំនួបអន្តរជាតិនានា ក្រោយខកខានរាប់សិបឆ្នាំ។ នេះបើតាមការផ្សាយរបស់ AFP។
ប្រទេសដែលញាំញីដោយសារសង្គ្រាមមួយនេះ បានអាក់ខានការប្រកួតអន្តរជាតិនៅលើទឹកដីខ្លួនឯងអស់រយៈពេលជិត ៣ទសវត្សរ៍ចាប់តាំងពីការលុកលុយរបស់កូវ៉ែតកាលពីឆ្នាំ ១៩៩០ មក។
រហូតដល់ឆ្នាំ២០០៣ FIFA បានដាក់បម្រាមមិនឲ្យមានការប្រកួតដែលធ្វើឡើងក្នុងដីរបស់អ៊ីរ៉ាក់បន្តទៀត បន្ទាប់ពីមានសង្គ្រាមដែលដឹកនាំដោយអាមេរិកដើម្បីផ្តួលរំលំរបបផ្តាច់ការរបស់លោក សាដាមហ៊ូសេន។
ការហាមនេះ ត្រូវបានដកចេញម្តងដែរក្នុងឆ្នាំ ២០១២ ប៉ុន្តែការដាច់ចរន្តអគ្គិសនីក្នុងអំឡុងការប្រកួតរវាងអ៊ីរ៉ាក់ និងហ្ស៊កដានីនៅទីក្រុង Arbil ប្រទេសអ៊ីរ៉ាក់នោះ បាននាំឲ្យអង្គភាពគ្រប់គ្រងកីឡាបាល់ទាត់ពិភពលោកសម្រេចបន្តដាក់បម្រាមរហូតដល់ប្ចុប្បន្ន។
រហូតមកដល់ពេលនេះ អ៊ីរ៉ាក់ត្រូវបានអនុញ្ញាតឲ្យធ្វើជាម្ចាស់ផ្ទះការប្រកួតមិត្តភាពអន្តរជាតិមួយប្រកួតជាមួយក្រុមជម្រើសជាតិអារ៉ាប៊ីសាអូឌីត នៅទីក្រុង Arbil នៅថ្ងៃទី ២៨ ខែកុម្ភៈខាងមុខនេះ ដែលជាការជួបគ្នាលើកដំបូងផងដែររវាងប្រទេសទាំងពីរក្នុងរយៈពេល ៤០ឆ្នាំចុងក្រោយ។
ការប្រកួតអន្តរជាតិលើកនេះ ជាឱកាសល្អសម្រាប់អ៊ីរ៉ាក់ដើម្បីព្យាយាមលួងលោម FIFA ដើម្បីឲ្យបញ្ឈប់ការដាក់បម្រាមមកលើខ្លួនបន្តទៀត។
Tag:
បាល់ទាត់
FIFA
អ៊ីរ៉ាក់
© រក្សាសិទ្ធិដោយ thmeythmey.com