អន្តរជាតិ
រុស្ស៊ីទំនងជាសាកល្បងសមត្ថភាពប្រយុទ្ធរបស់យន្តហោះចម្បាំងស៊េរីថ្មី Su-57 ក្នុងសង្គ្រាមស៊ីរី
× ខ្សែអាត់វីដេអូមួយបង្ហាញថា យន្តហោះចម្បាំងប្រភេទ Su-57 ដែលជាប្រភេទយន្តហោះស៊េរីទំនើបជំនាន់ទីប្រាំ ត្រូវបានរុស្ស៊ីប្រើប្រាស់ក្នុងប្រតិបត្តិការនៅស៊ីរី។ រុស្ស៊ី ទំនងជាប្រើប្រាស់យន្តហោះប្រភេទនេះ ដើម្បីសាកល្បងសមត្ថភាពវាយប្រហារ នៅក្នុងសង្គ្រាមស៊ីវិលស៊ីរី។
យន្តហោះស៊េរីទំនើបជំនាន់ទីប្រាំ Su-57 ទំនងជាត្រូវបានរុស្ស៊ី បញ្ជូនទៅចូលរួមប្រតិបត្តិការសឹក នៅក្នុងសង្គ្រាមស៊ីរី។ នេះជាការអះអាង របស់សារព័ត៌មានរដ្ឋរុស្ស៊ី RT ដោយសម្អាងលើខ្សែអាត់វីដេអូមួយដែលត្រូវបានគេចែកចាយ តាមបណ្តាញសង្គមហ្វេសប៊ុកកាលពីថ្ងៃ ២២ ខែកុម្ភៈ។
យន្តហោះដែលគេឃើញក្នុងខ្សែអាត់វីដេអូនោះបានចេញប្រតិបត្តិការពីមូលដ្ឋានទ័ពអាកាស Khmeimim នៅទឹកដីស៊ីរី ហើយតាមរូបរាង និងភិនភាគ វាស្រដៀងនឹងប្រភេទយន្តហោះជំនាន់ទីប្រាំ Su-57។ ប៉ុន្តែប្រព័ន្ធផ្សព្វផ្សាយរុស្ស៊ី RT នេះ បានបញ្ជាក់ផងដែរថា ខ្លួនមិនទាន់អាចកំណត់ថា វីដេអូដែលគេផ្សព្វផ្សាយនោះ គួរឲ្យទុកចិត្តបានកម្រិតណាឡើយ។
បើតាមខ្សែអាត់វីដេអូដដែលនោះ យន្តហោះចម្បាំងស៊េរីថ្មីបំផុតរបស់រុស្ស៊ី Su-57 ចំនួនពីរគ្រឿង រួមជាមួយយន្តហោះចម្បាំង Su-35 និងយន្តហោះ Su-25 បានហោះហើរ ដើម្បីចូលរួមប្រតិបត្តិការនៅខេត្ត Latakia។
កាលពីចុងឆ្នាំ ២០១៧ លោក វ្ល៉ាឌីមៀ ពូទីន បានបញ្ជាឲ្យក្រសួងការពារជាតិ ដកកងទ័ពភាគច្រើនចេញពីស៊ីរី ដោយសាររុស្ស៊ីអាចសម្រេចបានជោគជ័យ ក្នុងការកម្ចាត់ក្រុមភេរវជនជ្រុលនិយម។ ប៉ុន្តែវត្តមានយន្តហោះ Su-57 នៅស៊ីរីពេលនេះ ទំនងជារុស្ស៊ី កំពុងប្រើប្រាស់សង្គ្រាមស៊ីរី ដើម្បីសាកល្បងយន្តហោះស៊េរីទំនើបចុងក្រោយ របស់ខ្លួននេះដែរ។
ពាក់ព័ន្ធប្រភេទយន្តហោះចម្បាំង Su-57 នេះ កន្លងមកអនុរដ្ឋមន្ត្រីការពារជាតិរុស្ស៊ី Yuri Borisov បានបង្ហើបកាលពីដើមខែកុម្ភៈថា ក្រសួងការពារជាតិ នឹងចុះកិច្ចព្រមព្រៀងជាលើកដំបូង ដើម្បីទិញយន្តហោះ Su-57 ចំនួន១២ គ្រឿងក្នុងឆ្នាំ ២០១៨។ លោកក៏បន្ថែមថា យន្តហោះនេះ បានសាកល្បងជំហានដំបូង រួចរាល់ហើយ ប៉ុន្តែយន្តហោះចម្បាំងជំនាន់ទីប្រាំ នឹងត្រូវឆ្លងសាកល្បងសមត្ថភាពប្រយុទ្ធបន្ថែមទៀត។ ចន្លោះពីឆ្នាំ ២០២០ ដល់ឆ្នាំ ២០៣០ កងទ័ពអាកាសរុស្ស៊ី នឹងអាចមានយន្តហោះប្រភេទ Su-57 នេះចំនួន ២២០ គ្រឿងសម្រាប់ប្រើប្រាស់។
យន្តហោះ Su-57 ជាប្រភេទយន្តហោះទំនើប និងមានសមត្ថភាពខ្ពស់ ក្នុងការប្រយុទ្ធក្នុងសមរភូមិលំបាកៗ។ យន្តហោះនេះ អាចចាប់បានសញ្ញាគ្រោះថ្នាក់នៅលើអាកាស នៅលើដី និងនៅក្នុងសមុទ្រនៅក្នុងរយៈចម្ងាយឆ្ងាយ។ មិនត្រឹមតែប៉ុណ្ណោះ មានបំពាក់សព្វាវុធទំនើបៗ មានមីស៊ីលរយៈចម្ងាយខ្លី មធ្យម និងចម្ងាយវែង ដែលអាចបាញ់លើអាកាស ក៏ដូចជាពីលើអាកាសទៅដី និងប្រភេទមីស៊ីលប្រឆាំងរ៉ាដាផង៕
Tag:
រុស្ស៊ី
ស៊ីរី
Su-57
© រក្សាសិទ្ធិដោយ thmeythmey.com