សម្ដេច ហ៊ុន សែន ព្រមានដករដ្ឋមន្ត្រី ដែលអសកម្ម នៅអាណត្តិទី៦

ជាតិ

សម្ដេច ហ៊ុន សែន ព្រមានដករដ្ឋមន្ត្រី ដែលអសកម្ម នៅអាណត្តិទី៦

23, Feb 2018 , 9:19 pm

រូបភាព

ដោយ: ថ្មីៗ

ភ្នំពេញ៖ រដ្ឋមន្ត្រីដែលអសកម្មភាព នៅក្នុងអាណត្តិទី៥នេះ នឹងប្រឈមការបាត់បង់តំណែង នៅក្នុងអាណត្តិទី៦ ខាងមុខ។ នេះជាសារព្រមានរបស់សម្ដេចនាយករដ្ឋមន្ត្រី ហ៊ុន សែន ក្នុងពិធីបិទសន្និសីទជាតិស្តីពី «កំណែទម្រង់វិមជ្ឈការ និងវិសហមជ្ឈការ មេរៀនបទពិសោធន៍ បញ្ហាប្រឈម និងចក្ខុវិស័យនៅអនាគត» កាលពីថ្ងៃទី២២ កុម្ភៈ។

សម្តេច ហ៊ុន សែន ក៏បានប្រាប់ឲ្យរដ្ឋមន្ត្រីក្រសួងមហាផ្ទៃ សម្ដេច ស ខេង បង្កើតគណៈកម្មការប្រតិបត្តិតាមដាននៅតាមក្រសួងផងដែរ ដើម្បីចង់ដឹងថា តើរដ្ឋមន្ត្រីណាខ្លះ ដែលអសកម្មការងារ និងមិនអនុវត្តឲ្យបានត្រឹមត្រូវតាមតំណែង ដែលរដ្ឋាភិបាលប្រគល់ជូន។

បើតាមសារព័ត៌មានFresh News ដែលស្រង់សម្ដីនាយករដ្ឋមន្ត្រី ហ៊ុន សែន ដូច្នេះ៖«អាណត្តិទី៦ នឹងត្រូវរៀបចំគណៈរដ្ឋមន្ត្រីឡើងវិញ។ ដូច្នេះបើរដ្ឋមន្ត្រីគាត់មិនព្រមធ្វើអាណត្តិទី៥ផង តើចាំបាច់ត្រូវតែងតាំងគាត់ឲ្យធ្វើរដ្ឋមន្ត្រីក្នុងអាណត្តិទី៦ទៀតទេ? និយាយឲ្យត្រង់ៗតែម្តង ចុះបើរដ្ឋមន្ត្រីគាត់មកគ្រាន់តែមកស្តាប់ហើយទៅវិញដដែល តើមានការចាំបាច់ដើម្បីតែងតាំងឲ្យធ្វើរដ្ឋមន្ត្រី នៅអាណត្តិទី៦ទៀតទេ? ដូច្នេះយើងត្រូវមានតារាងតាមដានមើល»។

កន្លងមកសម្ដេច ហ៊ុន សែន ក៏ធ្លាប់ស្តីបន្ទោសមន្ត្រីរដ្ឋាភិបាល ចំពោះភាពទន់ខ្សោយនៃការអនុវត្តច្បាប់ផងដែរ។ សម្ដេចនាយករដ្ឋមន្ត្រី ហ៊ុន សែន បានមើលឃើញថា មន្ត្រីភាគច្រើន រង់ចាំអនុវត្តបទបញ្ជាពីសម្ដេច ជាងការអនុវត្តច្បាប់ឲ្យបានតឹងរឹងទៅវិញ៕

អត្ថបទទាក់ទង

សម្តេច ហ៊ុន សែន រិះគន់មន្ត្រីដែលមិនយកច្បាប់ទៅអនុវត្ត បែរជារង់ចាំតែបទបញ្ជា