អន្តរជាតិ
កូរ៉េខាងត្បូងជំទាស់ការសម្រេចរបស់ WTO ដែលទាឲ្យខ្លួនដកបម្រាមនាំចូលអាហារសមុទ្រពីជប៉ុន រូបភាព៖ AFP
× រដ្ឋាភិបាលជប៉ុនប្រកាសស្វាគមន៍សេចក្តីសម្រេចរបស់អង្គការពាណិជ្ជកម្មពិភពលោក (WTO) ដែលត្រួសត្រាយផ្លូវឲ្យមានការបញ្ចាប់ការហាមឃាត់ការនាំចូលអាហារសមុទ្រជប៉ុនចូលកូរ៉េខាងត្បូង។ ការហាមឃាត់អាហារសមុទ្រជប៉ុននេះត្រូវបានកូរ៉េខាងត្បូងដាក់ចេញក្រោយវិបត្តិនុយក្លេអ៊ែរ Fukushima។
ចុងក្រោយអង្គការពាណិជ្ជកម្មពិភពលោកបានសម្រេចឲ្យកូរ៉េខាងត្បូងដកបម្រាមលើការនាំចូលចំណីអាហារសមុទ្រពីជប៉ុន នៅថ្ងៃព្រហស្បតិ៍ទី ២២ ខែកុម្ភៈ។
ទីភ្នាក់ងារព័ត៌មាន AFP ផ្សាយថា រដ្ឋាភិបាលក្រុងតូក្យូ បានស្វាគមន៍យ៉ាងកក់ក្តៅចំពោះសេចក្តីសម្រេចរបស់អង្គការពាណិជ្ជកម្មពិភពលោកពាក់ព័ន្ធបណ្តឹងតវ៉ារបស់ខ្លួនប្រឆាំងក្រុងសេអ៊ូលដែលបានដាក់ស្នើទៅតាំងពីឆ្នាំ ២០១៥នោះ។ តាមសេចក្តីសម្រេចរបស់អង្គការពាណិជ្ជកម្មពិភពលោកនះ ចំណាត់ការរបស់កូរ៉េខាងជើងក្នុងការរឹតបន្តឹងការនាំចូលផលិតចំណីអាហារនេះផ្ទុយពីបទបញ្ញត្តិស្តីពីពាណិជ្ជកម្មសាកលផង។
«ជប៉ុនស្វាគមន៍ការសម្រេចរបស់អង្គការពាណិជ្ជកម្មពិភពលោកដែលឆ្លុះបញ្ចាំងពីគោលជំហររបស់យើង។ យើងក៏ស្នើឲ្យកូរ៉េខាងត្បូងសូមប្រញាប់កែតម្រូវសកម្មភាពខ្លួនជាបន្ទាន់ និងដកការរឹតបន្តឹងលើផលិតផលនាំចូលដែលត្រូវបានអង្គការពាណិជ្ជកម្មពិភពលោករកឃើញថា បានរំលោភលើបទបញ្ញត្តិពាណិជ្ជកម្មពិភពលោកនោះ»។ នេះជាការលើកឡើងរបស់អ្នកនាំពាក្យរដ្ឋាភិបាលជប៉ុនលោក Yoshihide Suga។
តាមពិតទៅ បម្រាមនាំចូលអាហារសមុទ្រពីជប៉ុននេះ ត្រូវបានដាក់ចេញដោយរដ្ឋាភិបាលកូរ៉េខាងត្បូង ក្រោយមានគ្រោះមហន្តរាយនុយក្លេអ៊ែរ Fukushima ដែលកើតនៅឆ្នាំ ២០១១នោះ។
យ៉ាងណាក៏ដោយ កូរ៉េខាងត្បូងនៅតែរឹងទទឹង ដោយប្រកាសថា ខ្លួនគ្មានកម្រោងលុបចោលបម្រាមដែលខ្លួនដាក់ចេញប្រឆាំងផលិតផលជប៉ុនឡើយ។ ផ្ទុយទៅវិញ កូរ៉េខាងត្បូងត្រៀមខ្លួនបន្តដាក់បណ្តឹងតវ៉ាដើម្បីជំទាស់សេចក្តីសម្រេចរបស់អង្គការពិភពលោកនេះថែមទៀត។
ក្រសួងពាណិជ្ជកម្មកូរ៉េខាងត្បូងបានចេញសេចក្តីថ្លែងការណ៍តបនឹងការសម្រេចរបស់អង្គការពាណិជ្ជកម្មពិភពលោកដែលមានខ្លឹមសារដូច្នេះ៖«រដ្ឋាភិបាលកូរ៉េខាងត្បូងបានសម្រេចចិត្តប្តឹងតវ៉ាប្រឆាំងនឹងការសម្រេចរបស់អង្គការពាណិជ្ជកម្មពិភពលោក ដើម្បីការពារសុខភាព និងសុវត្ថិភាពប្រជាជនយើង»។
បើទោះជាមានការការសម្រេចក៏ដោយ ចំណាត់ការហាមឃាត់ការនាំចូលនៅតែមានប្រសិទ្ធភាព ហើយរដ្ឋាភិបាលយើងនឹងប្រឹងប្រែងឲ្យអស់ពីសមត្ថភាពដើម្បីធានាថា អាហារមានផ្ទុកជាតិវិទ្យុសកម្មមិនអាចឆ្លងដែនចូលដល់តុអាហាររបស់ប្រជាជនយើងឡើយ»៕
Tag:
WTO
កូរ៉េខាងត្បូង
ជប៉ុន
Fukushima
© រក្សាសិទ្ធិដោយ thmeythmey.com