ជាតិ
ប្រធាន គ.ជ.ប ប្រាប់មន្ត្រីតាមរាជធានី-ខេត្ត ឲ្យប្រកាន់អព្យាក្រឹត ពេលបោះឆ្នោតព្រឹទ្ធសភា លោក ស៊ិក ប៊ុនហុក ប្រធានគ.ជ.ប ដឹកនាំកិច្ចប្រជុំនាពេលកន្លងមក
× លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានផ្ញើលិខិតទៅកាន់ប្រធានគណៈកម្មការរាជធានី ខេត្តរៀបចំការបោះឆ្នោតគ្រប់រូប ដើម្បីដាស់តឿន ឲ្យប្រកាន់ខ្ជាប់នូវអព្យាក្រឹត ក្នុងអំឡុងនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ ដែលនឹងចាប់ផ្តើមពីម៉ោង៧ព្រឹក ដល់ម៉ោង៣រសៀល នាថ្ងៃទី២៥ ខែកុម្ភៈ ឆ្នាំ២0១៨។ ចាប់ពីម៉ោង៣រសៀលទៅ គ.ជ.ប នឹងរៀបចំប្រកាសលទ្ធផលបឋមនៃការបោះឆ្នោតជ្រើសតាំងសមាជិកព្រឹទ្ធសភា។
តាមរយៈលិខិត លោក ស៊ិក ប៊ុនហុក បានប្រាប់ប្រធានទាំងនោះ ដែលគ្រប់គ្រងការបោះឆ្នោតតាមរាជធានី-ខេត្ត ថា មិនត្រូវឲ្យមានសកម្មភាពឃោសនាបោះឆ្នោត នៅថ្ងៃទី២៤ ខែកុម្ភៈ ឆ្នាំ២0១៨ ដែលជា «ថ្ងៃស» ឡើយ។
មានគណបក្ស៤ គឺគណបក្សប្រជាជន គណបក្សហ្វ៊ុនស៊ិនប៉ិច គណបក្សខ្មែររួបរួមជាតិ និងគណបក្សយុវជនកម្ពុជា ដែលចូលរួមប្រកួតប្រជែងក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤នេះ។ អង្គបោះឆ្នោត (អ្នកបោះឆ្នោត) គឺតំណាងរាស្ត្រ១២៣នាក់ និងសមាជិកក្រុមប្រឹក្សាឃុំ សង្កាត់ ១១៥៧២នាក់៕
© រក្សាសិទ្ធិដោយ thmeythmey.com