អន្តរជាតិ
នាយករដ្ឋមន្ត្រីវៀតណាម ដាស់តឿនមន្ត្រីរដ្ឋកុំយក«លេសបុណ្យជាតិ»ពន្យារពេលការងារ
× រដ្ឋាភិបាលក្រុងហាណូយ បានក្រើនរម្លឹកដល់ស្ថាប័នការងារ ជាពិសេសមន្ត្រីរបស់អង្គភាពរដ្ឋឲ្យបំពេញការងារឲ្យបានខ្ជាប់ខ្ជួនតាមបទបញ្ជា និងវិន័យ ។ ក្រុងហាណូយ មិនចង់ឃើញភាពអសកម្ម និងការថយចុះនៃផលិតភាពការងាររបស់មន្ត្រីសាធារណៈ ដោយយកហេតុផលថា ជាប់រវល់រៀបចំ និងប្រារព្ធបុណ្យជាតិឡើយ ។
លោកនាយករដ្ឋមន្ត្រីវៀតណាម Nguyễn Xuân Phúc នៅថ្ងៃ២២ កុម្ភៈ បានទទូចឲ្យមន្ត្រីសាធារណៈចាប់ផ្តើមការងាររបស់ពួកគេជាបន្ទាន់ បន្ទាប់ពីថ្ងៃបុណ្យចូលឆ្នាំចិនវៀតណាមបានបញ្ចប់ទៅកាលពីសប្តាហ៍មុន។ លោកនាយករដ្ឋមន្ត្រី ចង់ឲ្យមន្ត្រីទាំងអស់ធ្វើការពេញដៃពេញជើង និងមិនត្រូវគិតថា ខែ ដែលប្រារព្ធពិធីបុណ្យចូលឆ្នាំ គឺជាពេលសម្រាប់តែប្រារព្ធប៉ុណ្ណោះនោះទេ ។ នេះបើយោងតាមការចុះផ្សាយរបស់សារព័ត៌មាន Vietnam News ។
លោកនាយករដ្ឋមន្ត្រី បានបន្តទៀតថា មន្ត្រីរដ្ឋការស៊ីវិល និងភ្នាក់ងារសារធារណៈទាំងអស់ ត្រូវតែគោរពតាមបទបញ្ជារដ្ឋបាល និងច្បាប់ការងារ ក្នុងការបំពេញការងារ ។ លោកនាយករដ្ឋមន្ត្រី លើកឡើងបែបនេះ ក្នុងគោលដៅដាស់តឿនមន្ត្រីសាធារណៈមួយចំនួន ដែលនៅតែពន្យារពេលចូលបម្រើការងារវិញ ដ្បិតពួកគេ នៅតែបន្តប្រារព្ធពិធីបុណ្យចូលឆ្នាំនោះ ។ នេះបើយោងតាមប្រភពព័ត៌មានដដែល ។
អ្វីដែលគួរឲ្យកត់សម្គាល់នោះ ប្រមុខរដ្ឋាភិបាលវៀតណាមរូបនេះ ក៏បានផ្ញើលិខិតទៅកាន់គ្រប់អង្គភាពនៅថ្ងៃបម្រើការងារដំបូង ក្រោយនៃការប្រារព្ធពិធីបុណ្យ ដោយលោក បានហាមប្រាម មន្ត្រីគ្រប់ក្រសួងទាំងអស់ ចូលរួមពិធីបុណ្យនានានៅម៉ោងការងារ និងប្រើប្រាស់យានយន្តរដ្ឋដើម្បីចូលរួមពិធី លើកលែង មានការអនុញ្ញាតដើម្បីបំពេញកាតព្វកិច្ចនៅទីនោះ ។
ជាងនេះទៅទៀតនោះ លោកនាយករដ្ឋមន្ត្រី ក៏បានស្នើឲ្យសមាជិកគណៈរដ្ឋមន្ត្រីរបស់លោកជួយពិនិត្យ និងតាមដានមើលវិស័យ និងអង្គភាពរបស់ខ្លួន ដោយត្រូវបំពេញការងារជាមួយនៃការតាំងចិត្តដ៏មុតមាំ និងត្រូវមានបទបញ្ជាឲ្យបានតឹងរឹងបំផុត ដើម្បីជាវិធានការសម្រាប់មន្ត្រី ដែលមានការយឺតយ៉ាវក្នុងការបំពេញមុខងាររបស់ពួកគេ ៕
Tag:
វៀតណាម
មន្ត្រីរដ្ឋការ
អាស៊ាន
© រក្សាសិទ្ធិដោយ thmeythmey.com