ជាតិ
នយោបាយជាតិ
អតីតបក្សប្រឆាំង ស្នើឲ្យអន្តរជាតិ កុំទទួលស្គាល់ការបោះឆ្នោតព្រឹទ្ធសភា ទីស្នាក់ការកណ្តាលរបស់គណបក្សសង្គ្រោះជាតិ កាលពីមិនត្រូវបានរំលាយ
× ភ្នំពេញ៖ មិនត្រឹមតែខ្លួនឯងនោះទេ ដែលមិនទទួលស្គាល់ការបោះឆ្នោតព្រឹទ្ធសភានីតិកាលទី៤នេះ ប៉ុន្តែអតីតបក្សប្រឆាំង ថែមទាំងចង់ឲ្យសហគមន៍អន្តរជាតិ មិនទទួលស្គាល់ផងដែរ។ មន្ត្រីជាន់ខ្ពស់បក្សកាន់អំណាច ឆ្លើយតបថា ទង្វើរបស់បក្សប្រឆាំង គឺគ្មានតម្លៃអ្វីឡើយ។
ខណៈការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ កំពុងដំណើរការនៅថ្ងៃទី២៥ ខែកុម្ភៈ ឆ្នាំ២0១៨នេះ គណបក្សសង្គ្រោះជាតិ ដែលត្រូវបានរំលាយចោលហើយនោះ ហើយមិនចូលរួមជាមួយគេ ក៏បានចេញសេចក្តីថ្លែងការណ៍ ដោយអំពាវនាវដល់បណ្តាប្រទេសនានា រួមទាំងអង្គការសហប្រជាជាតិផង កុំឲ្យទទួលស្គាល់។ អវត្តមានរបស់ខ្លួន គឺជាហេតុផលមួយ ដែលគណបក្សសង្គ្រោះជាតិ ជំទាស់នឹងការបោះឆ្នោតនេះ។
អតីតបក្សប្រឆាំងដ៏ធំមួយនេះ អះអាងក្នុងសេចក្តីថ្លែងការណ៍ថា សមាសភាពនៃគណៈកម្មាធិការជាតិរៀបចំការបោះឆ្នោត (គ.ជ.ប) គឺកើតឡើងដោយមិនស្របច្បាប់ និងផ្ទុយពីស្មារតីនៃរដ្ឋធម្មនុញ្ញ។ លើសពីនេះ អតីតបក្សប្រឆាំង យល់ថា អ្នកបោះឆ្នោតជាង៥ពាន់នាក់ ដែលជិតពាក់កណ្តាលនៃអ្នកបោះឆ្នោតទាំងអស់ ពុំមែនកើតចេញពីការបោះឆ្នោតដោយប្រជាពលរដ្ឋនោះទេ។ អតីតបក្សប្រឆាំង ចង់បញ្ជាក់ថា អ្នកបោះឆ្នោតជាង៥ពាន់នាក់ គឺជាតំណាងរាស្ត្រនិងសមាជិកក្រុមប្រឹក្សាឃុំ សង្កាត់របស់ខ្លួន ដែលប្រជាពលរដ្ឋបោះឆ្នោតឲ្យ ប៉ុន្តែត្រូវបានដកចេញ ហើយយកតំណែងទាំងនោះ ទៅឲ្យគណបក្សដទៃ។
ក្រៅពីនេះ អតីតគណបក្សសង្គ្រោះជាតិ ក៏ឆ្លៀតសុំឲ្យសហគមន៍អន្តរជាតិ ជួយធ្វើអន្តរាគមន៍ ដើម្បីស្តារឡើងវិញនូវលទ្ធិប្រជាធិបតេយ្យ និងការបោះឆ្នោតដោយត្រឹមត្រូវនៅឆ្នាំ២0១៨ ដោយទាមទារឲ្យមានវត្តមានរបស់ខ្លួន។ អតីតគណបក្សសង្គ្រោះជាតិ ក៏បន្តទាមទារឲ្យដោះលែងលោក កឹម សុខា ដែរ។
សេចក្តីថ្លែងការណ៍របស់អតីតគណបក្សសង្គ្រោះជាតិ រងការវាយប្រហារយ៉ាងដំណំពីលោក សុខ ឥសាន អ្នកនាំពាក្យគណបក្សប្រជាជនកម្ពុជា។ លោក បានសរសេរសារចូលទៅក្នុងបណ្តាញទំនាក់ទំនងតេឡេក្រាម ដែលប្រមូលផ្តុំដោយអ្នកកាសែត យ៉ាងដូច្នេះថា៖«ការចេញសេចក្តីថ្លែងការណ៍ណាមួយរបស់ក្រុម ដែលបានស្លាប់ទៅហើយ គឺជាខ្យល់និងគ្មានតម្លៃអ្វីទាល់តែសោះ»។
លោក សុខ ឥសាន បកស្រាយថា ការបោះឆ្នោតនៅកម្ពុជា គឺប្រព្រឹត្តទៅដោយស្របតាមរដ្ឋធម្មនុញ្ញ និងស្របតាមគោលការណ៍លទ្ធិប្រជាធិបតេយ្យ។ អ្នកនាំពាក្យបក្សកាន់អំណាចរូបនេះ បន្តថា ការបោះឆ្នោតនៅកម្ពុជា ដែលប្រព្រឹត្តទៅតាមការកំណត់របស់ច្បាប់ និងស្ថិតនៅក្រោមការរៀបចំរបស់គ.ជ.ប គឺជាការសម្តែងចេញនូវឆន្ទៈរបស់ប្រជាពលរដ្ឋ។ លោក បញ្ជាក់ចុងក្រោយយ៉ាងដូច្នេះ៖«អ្នកនិយាយថា ជាការបោះឆ្នោតក្លែងក្លាយ គឺគ្រាន់តែដើម្បីបន្លប់សាធារណជនប៉ុណ្ណោះ ដោយសារខ្លួន គ្មានសិទ្ធិចូលរួមការបោះឆ្នោត»។
សូមបញ្ជាក់ថា មានគណបក្សតែ៤ប៉ុណ្ណោះ គឺគណបក្សប្រជាជនកម្ពុជា គណបក្សហ្វ៊ុនស៊ិនប៉ិច គណបក្សខ្មែររួបរួមជាតិ និងគណបក្សយុវជនកម្ពុជា ដែលចូលរួមប្រកួតប្រជែងក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤នេះ។ សាធារណជនមួយចំនួន ជឿជាក់ថា គណបក្សប្រជាជនកម្ពុជា នឹងទទួលបានអាសនៈច្រើនជាងគេក្នុងការបោះឆ្នោតនេះ។ ចំណែក គណបក្សភ្លើងទៀង ដែលពីមុនមានឈ្មោះថា គណបក្ស សម រង្ស៊ី និងចាត់ទុកជាគណបក្សប្រឆាំងក្នុងស្ថាប័នព្រឹទ្ធសភា មិនបានចូលរួមនោះទេ៕
Tag:
បោះឆ្នោតព្រឹទ្ធសភា
CNRP
សុខ ឥសាន
© រក្សាសិទ្ធិដោយ thmeythmey.com