ជាតិ
កម្ពុជាស្នើឲ្យរដ្ឋាភិបាលអូស្ត្រាលី ធានាដល់កិត្តិយសសម្ដេច ហ៊ុន សែន
× ភ្នំពេញ៖ ជាថ្មីម្ដងទៀត ក្រសួងការបរទេស និងសហប្រតិបត្តិការអន្តរជាតិ ប្រកាសថ្កោលទោសសកម្មភាពពលរដ្ឋខ្មែរនៅក្រៅប្រទេស ដែលដុតរូបទីងមោងសម្ដេចនាយករដ្ឋមន្ត្រី ហ៊ុន សែន។ ក្រសួងការបរទេស កំពុងចរចាការទូតជាមួយប្រទេសអូស្ត្រាលី ដើម្បីដោះស្រាយបញ្ហានេះ។
ពលរដ្ឋខ្មែរ ដែលកំពុងរស់នៅលើទឹកដីអូស្ត្រាលី បាននាំគ្នាដុតរូបទីងមោងសម្ដេចនាយករដ្ឋមន្ត្រី ហ៊ុន សែន ដើម្បីបង្ហាញក្តីមិនពេញចិត្តចំពោះការដឹកនាំរបស់ប្រមុខរដ្ឋាភិបាលកម្ពុជា។ សកម្មភាពរបស់ពលរដ្ឋទាំងនោះ ត្រូវបានក្រសួងការបរទេសកម្ពុជា ចាត់ទុកជាសកម្មភាពខុសឆ្គងខាងសីលធម៌ ប្រមាថដល់កិត្តិយសប្រមុខរដ្ឋាភិបាល និងជាន់ពន្លិចជាតិសាសន៍ខ្លួនឯង។ អ្នកនាំពាក្យក្រសួងការបរទេស លោក ជុំ សុន្ទរី បាននិយាយថា ក្រសួងកំពុងចរចាការទូតជាមួយភាគីអូស្ត្រាលី ដើម្បីឲ្យធានាដល់កិត្តិយសសម្ដេច ហ៊ុន សែន ដែលនឹងអញ្ជើញចូលរួមកិច្ចប្រជុំអាស៊ាន-អូស្ត្រាលី ក្នុងខែមីនា ខាងមុខនេះ។
ថ្លែងក្រោយពីចុះហត្ថលេខារវាងរដ្ឋាភិបាលនិងប្រធានមជ្ឈមណ្ឌលកម្ចាត់មីនអាស៊ាននៅព្រឹកថ្ងៃទី២៧ កុម្ភៈ អ្នកនាំពាក្យក្រសួងការបរទេសលោក ជុំ សុន្ទរី បានបញ្ជាក់ដូច្នេះថា៖ បញ្ហានេះក្រសួងការបរទេស ចាត់ទុកជាសកម្មភាពមួយ ដែលធ្វើឲ្យប៉ះពាល់យ៉ាងខ្លាំងដល់កិត្តិយស និងសេចក្តីថ្លៃថ្នូររបស់ថ្នាក់ដឹកនាំកំពូលកម្ពុជា ។ ហើយក្រសួងការបរទេស សុំធ្វើការថ្កោលទោសចំពោះករណីនេះ។ ហើយសូមជម្រាបថា នៅពេលនេះក្រសួងការបរទេស និងសហប្រតិបត្តិការអន្តរជាតិ កំពុងសម្របសម្រួលតាមផ្លូវការទូតជាមួយប្រទេសអូស្ត្រាលី ដើម្បីធានាឲ្យមានការគោរព ចំពោះកិត្តិយស និងភាពថ្លៃថ្នូររបស់ថ្នាក់ដឹកនាំកម្ពុជា»។
តែយ៉ាងណាលោក ជុំ សុន្ទរី មិនទាន់អាចបញ្ជាក់ពីការលក្ខខណ្ឌ ដែលរដ្ឋាភិបាលអូស្ត្រាលី ត្រូវធានាសុវត្ថិភាព និងកិត្តិយស ប្រមុខរដ្ឋាភិបាលកម្ពុជា ដែលនឹងមានវត្តមាននៅក្នុងកិច្ចប្រជុំ នាទីក្រុងស៊ីដនី នោះឡើយ។
សម្ដេចនាយករដ្ឋមន្ត្រី ហ៊ុន សែន នឹងចូលរួមកិច្ចប្រជុំពិសេសអូស្ត្រាលី-អាស៊ាន នៅថ្ងៃទី១៧-១៨ មីនាខាងមុខនេះ។ មុននឹងអញ្ជើញទៅចូលរួមកិច្ចប្រជុំ សម្ដេច ហ៊ុន សែន ដឹងខ្លួនច្បាស់ថា ប្រាកដជាមានក្រុមប្រឆាំងរដ្ឋាភិបាល នឹងចេញមកបាតុកម្មតវ៉ាចំពោះវត្តមានសម្ដេច នៅលើទឹកដីអូស្ត្រាលី។
ថ្លែងក្នុងពិធីជួបសំណេះសំណាលជាមួយកម្មកររោងចក្រជាង១ម៉ឺននាក់នៅតំបន់វត្តទឹកថ្លា កាលពីថ្ងៃ២១ កុម្ភៈ នាយករដ្ឋមន្ត្រី ហ៊ុន សែន ហាក់មិនព្រួយបារម្ភពីក្រុមអ្នកតវ៉ា ប្រឆាំងវត្តមានសម្ដេចឡើយ ព្រោះសម្ដេចយល់ថា វាជាការសម្ដែងអារម្មណ៍ និងមតិរបស់ក្រុមអ្នកមិនគាំទ្ររដ្ឋាភិបាល។ ប៉ុន្តែអ្វីដែលប្រមុខរដ្ឋាភិបាល មិនចង់ឃើញនោះ គឺការតវ៉ាដោយដុតរូបភាពសម្ដេច នៅទីធ្លាសាធារណៈ ព្រោះវាជារឿងអបិយជំនឿមិនល្អរបស់ខ្មែរ។ នាយករដ្ឋមន្ត្រី ព្រមានចាត់វិធានការលើអ្នកតវ៉ាដុតរូបសម្ដេចផងដែរ។
ប៉ុន្តែការព្រមានរបស់ប្រមុខរដ្ឋាភិបាលនេះ បែរជាទទួលបានការចំអកពីប្រជាពលរដ្ឋខ្មែរ ដែលរស់នៅក្នុងប្រទេសអូស្ត្រាលី អាមេរិក និងកាណាដា ជាដើម ។ ពួកគេទាំងនោះ បានប្រើរូបទីងមោងសម្ដេច ហ៊ុន សែន ចង់ជាប់ខ្សែអូសនៅលើដី ឬឆ្នេរសមុទ្រ អមជាមួយសំឡេងស្រែករិះគន់ចំពោះការដឹកនាំរបស់រដ្ឋាភិបាលកម្ពុជា មុននឹងពួកគេប្រើភ្លើងដុតរូបទីងមោងនោះ។ នេះបើតាមវីដេអូ ដែលបានបង្ហោះនៅលើបណ្ដាញហ្វេសប៊ុកជាបន្តបន្ទាប់ ក្នុងរយៈពេលប៉ុន្មានថ្ងៃមកនេះ៕
Tag:
ជុំ សុន្ទរី
ហ៊ុន សែន
អូស្ត្រាលី
អាមេរិក
© រក្សាសិទ្ធិដោយ thmeythmey.com