ជាតិ
ជនបរទេសជាង ១ពាន់នាក់ កំពុងជាប់ឃុំនៅកម្ពុជា ដោយសារបទល្មើសផ្សេងៗ រូបភាព៖ សកម្មភាពសមត្ថកិច្ចចាប់ជនបរទេសខុសច្បាប់នៅកម្ពុជានាពេលកន្លងមក
× ភ្នំពេញៈ ដោយគិតត្រឹមខែធ្នូ ឆ្នាំ២0១៧ ជនបរទេស ១១៣០នាក់ (ស្ត្រី២៦៥នាក់) មាន៤៦សញ្ជាតិ កំពុងជាប់ឃុំក្នុងពន្ធនាគារ នៅប្រទេសកម្ពុជា ដោយសារតែបានប្រព្រឹត្តបទល្មើសផ្សេងៗ។ នេះបើតាមរបាយការណ៍របស់អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ដែលត្រូវបានចុះផ្សាយដោយអគ្គស្នងការដ្ឋាននគរបាលជាតិ។
បើតាមអគ្គស្នងការនគរបាលជាតិដដែល សម្តេច ស ខេង រដ្ឋមន្ត្រីក្រសួងមហាផ្ទៃ បានថ្លែង ក្នុងពិធីបិទសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅបន្ដនៃអគ្គនាយកដ្ឋានអន្ដោប្រវេសន៍ កាលពីរសៀលថ្ងៃទី២៧ ខែកុម្ភៈ ឆ្នាំ២0១៨ ថា រដ្ឋាភិបាល មិនអនុញ្ញាតឲ្យមានជនបរទេស ធ្វើការនៅកម្ពុជា ដោយមិនស្របច្បាប់ទៀតឡើយ។ សម្តេច បន្តថា បើនៅតែបន្តទៀត នឹងនាំឲ្យបាត់បង់ដល់ចំណូលថវិកាជាតិ និងបាត់បង់ឱកាសការងាររបស់ប្រជាពលរដ្ឋកម្ពុជា។
សម្តេច ស ខេង លើកឡើងថា ក្នុងចំណោមជនបរទេសអន្តោប្រវេសន៍ជាង ១៦ម៉ឺននាក់ ដែលមកស្នាក់នៅ និងធ្វើការនៅកម្ពុជា គឺមានតែប្រមាណ ៥ម៉ឺន៧ពាន់នាក់ប៉ុណ្ណោះ ដែលមានប័ណ្ណការងារស្របច្បាប់។ អគ្គស្នងការនគរបាលជាតិ ស្រង់ប្រសាសន៍របស់រដ្ឋមន្ត្រីក្រសួងមហាផ្ទៃរូបនេះ មកចុះផ្សាយយ៉ាងដូច្នេះថា៖«ក្នុងមួយឆ្នាំៗ កម្ពុជាបានបាត់ចំណូលជាង ២០លានដុល្លារ ពីការគេចវេសបង់ពន្ធរបស់ពលករបរទេស ដែលមកធ្វើការនៅក្នុងប្រទេសកម្ពុជា។ ជនបរទេសអន្តោប្រវេសន៍ និងពលករបរទេស ដែលមកស្នាក់នៅ ហើយបម្រើការនៅក្នុងប្រទេសកម្ពុជា ត្រូវតែអនុវត្ត ទៅតាមគោលការណ៍ច្បាប់ ដែលបានកំណត់ បើពុំដូច្នោះទេ នឹងត្រូវពិន័យជាប្រាក់ទ្វេគុណ ឬបណ្តេញចេញពីប្រទេសកម្ពុជាតែម្តង»៕
Tag:
ជនបរទេស
បទល្មើស
ពន្ធនាគារ
ស ខេង
© រក្សាសិទ្ធិដោយ thmeythmey.com