ប្រមុខទូតកម្ពុជា៖ អធិបតេយ្យជាតិ រងការគំរាមពីបរទេស ដូច្នេះយើងត្រូវតស៊ូ ដើម្បីការពារខ្លួន»

ជាតិ

ប្រមុខទូតកម្ពុជា៖ អធិបតេយ្យជាតិ រងការគំរាមពីបរទេស ដូច្នេះយើងត្រូវតស៊ូ ដើម្បីការពារខ្លួន»

02, Mar 2018 , 9:39 pm

រូបភាព

លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា ធ្វើជាអធិបតីក្នុងសន្និបាតបូកសរុបការងារឆ្នាំ២0១៧ និងលើកទិសដៅការងារសម្រាប់ឆ្នាំ២0១៨។ រូបពីក្រសួងការបរទេស

ដោយ: ម៉ៅ សុផា

ភ្នំពេញ៖ ការលូកមាត់លូកករបស់សហគមន៍អន្តរជាតិ ត្រូវបានរដ្ឋមន្ត្រីក្រសួងការបរទេសកម្ពុជា ចាត់ទុកថា ជាទង្វើនៃការជ្រៀតជ្រែក និងការគំរាមកំហែងមកលើដែនអធិបតេយ្យរបស់កម្ពុជា។ ប្រមុខការទូតកម្ពុជា ជំរុញឲ្យមានការតស៊ូរួមគ្នា ដើម្បីការពារសិទ្ធិសម្រេចនិងអធិបតេយ្យរបស់ជាតិ។

លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា បានឡើងអានសុទ្ទរកថា ដែលមានកម្រាស់ដល់ទៅ១៣ទំព័រ ក្នុងពិធីបើកសន្និតបូកសរុបការងារប្រចាំឆ្នាំ២0១៧ និងលើកទិសដៅការងារបន្ត សម្រាប់ឆ្នាំ២0១៨។ សន្និបាតនេះ មានរយៈពេល៣ថ្ងៃ គឺចាប់ពីថ្ងៃទី២៨ ខែកុម្ភៈ ដល់ថ្ងៃទី២ ខែមីនា ឆ្នាំ២0១៨។

តាមរយៈខ្លឹមសារនៃសុទ្ទរកថានោះ រដ្ឋមន្ត្រីក្រសួងការបរទេស បានលើកឡើងថា អធិបតេយ្យនៃប្រទេសកម្ពុជា កំពុងស្ថិតក្នុងការគំរាមកំហែងរបស់អង្គការអន្តរជាតិ និងរដ្ឋាភិភាលបរទេសមួយចំនួន។ លោក បានហៅ ទង្វើរបស់អង្គការអន្តរជាតិនិងរដ្ឋាភិបាលបរទេសទាំងនោះ ថាជាការជ្រៀតជ្រែកចូលកិច្ចការផ្ទៃក្នុងរបស់ប្រទេសកម្ពុជា។

ប្រមុខការទូតកម្ពុជារូបនេះ ក៏បានសង្កត់ធ្ងន់ៗថា ស្ថានការណ៍បច្ចុប្បន្ននេះ ជាដំណាក់កាលដ៏សំខាន់និងចាំបាច់ជាងពេលណាទាំងអស់ ដែលត្រូវរួមគ្នាការពារឯករាជ្យ និងអធិបតេយ្យ។ លោក បញ្ជាក់យ៉ាងដូច្នេះ ៖«រយៈពេលប៉ុន្មានខែចុងក្រោយនេះ កម្ពុជា ទទួលរងការរិះគន់ និងការចោទប្រកាន់ពីរដ្ឋាភិបាលនៃបណ្តាប្រទេសលោកខាងលិចមួយចំនួន ដោយសារតែមានការបង្ក្រាបលើបក្សប្រឆាំង សារព័ត៌មាន និងសង្គមស៊ីវិល។ [….] ក្នុងឋានៈជាប្រទេសតូច និងកំពុងអភិវឌ្ឍ ការទប់ស្កាត់ ចំពោះការជ្រៀតជ្រែកពីខាងក្រៅ តែងតែជាការតស៊ូរបស់យើង ដើម្បីរស់រានមានជីវិតបន្តទៀត»។ [….] យើង ត្រូវតែតស៊ូទៅមុខ ដើម្បីការពារសិទ្ធិសម្រេចលើវាសនារបស់ខ្លួន ដោយខ្លួនឯង»។

លោក ប្រាក់ សុខុន អះអាងថា មូលហេតុ ដែលសហគមន៍អន្តរជាតិទាំងនោះ មើលមកកម្ពុជា ហើយវិនិច្ឆ័យក្នុងផ្លូវអវិជ្ជមានបែបនេះ ដោយសារតែពួកគេ មិនពេញចិត្តនឹងការកម្ចាត់ក្រុមអ្នកប្រឆាំង។ មិនខុសពីប្រមុខរដ្ឋាភិបាលនិងមន្ត្រីជាន់ខ្ពស់កម្ពុជា ដែលបកស្រាយកន្លងមកនោះទេ លោក ប្រាក់ សុខុន បានថ្លែងការពារសាជាថ្មីថា ចំណាត់ការរបស់សមត្ថកិច្ចនិងតុលាការ លើក្រុមអ្នកប្រឆាំង រួមទាំងអង្គការក្រៅរដ្ឋាភិបាលមួយចំនួន គឺធ្វើឡើងតាមផ្លូវច្បាប់សុទ្ធសាធ ដើម្បីគេចផុតពីការជ្រៀតជ្រែតពីខាងក្រៅ ដែលអាចនាំឲ្យកម្ពុជាធ្លាក់ក្នុងភ្លើងសង្គ្រាម ដូចអតីតកាល។

យ៉ាងណាក៏ដោយ រដ្ឋមន្ត្រីក្រសួងការបរទេស បានអរគុណប្រទេសនានា ដែលបានផ្តល់ជំនួយនិងបានជ្រោមជ្រែងកម្ពុជា ក្នុងការអភិវឌ្ឍ។ ប៉ុន្តែ លោក បញ្ជាក់បែបបនេះថា៖«យើងមិនអាចទទួលបានទេ នូវការប្រើប្រាស់ជំនួយ ដោយភ្ជាប់ជាមួយលក្ខខណ្ឌ ដើម្បីជាស្ពានសម្រាប់ជ្រៀតជ្រែកចូលកិច្ចការផ្ទៃក្នុងរបស់យើង»។

លើសពីនេះ លោក ប្រាក់ សុខុន ក៏បានអះអាងដែរថា កម្ពុជា នៅតែសហការជាមួយបណ្តាប្រទេសលើពិភពលោក ដើម្បីរួមគា្នប្រឆាំងនឹង ភេរវកម្ម ការជួយដូរគ្រឿងញៀន ការជួញដូរមនុស្ស និងឧក្រិដ្ឋកម្មឆ្លងដែន ជាដើម។ លោក យល់ថា តម្លៃស្នូលនៃភាពជាដៃគូ គឺទាមទារឲ្យមានការគោរពគ្នាទៅវិញទៅមក ដោយស្មើភាព។

ចាប់តាំងពីចុងឆ្នាំ២0១៧ មក ជាពិសេសក្រោយការរំលាយគណបក្សសង្គ្រោះជាតិ និងការចាប់លោក កឹម សុខា ដែលជាប្រធានគណបក្សនេះ ដាក់ពន្ធនាគារ ការថ្កោលទោស និងការដាក់ទណ្ឌកម្មរបស់សហគមន៍អន្តរជាតិ បានធ្លាក់មកលើរដ្ឋាភិបាលកម្ពុជា ជាហូរហែ។ សហរដ្ឋអាមេរិក និងសហភាពអឺរ៉ុប បានបញ្ចេញសកម្មភាពខ្លាំងក្លាជាងគេ ក្នុងការប្រឈមមុខនឹងរដ្ឋាភិបាលកម្ពុជា ដើម្បីជំរុញឲ្យដោះលែងលោក កឹម សុខា និងអនុញ្ញាតឲ្យគណបក្សរបស់លោករស់ឡើងវិញ មុនការបោះឆ្នោតថ្នាក់ជាតិ ក្នុងខែកក្កដា ឆ្នាំ២0១៨ ឈានមកដល់។ ប្រទេសធំៗទាំងពីរនេះ បាននាំគ្នាផ្តាច់ជំនួយផ្នែកការបោះឆ្នោត រួមទាំងជំនួយផ្សេងៗទៀត មកឲ្យរដ្ឋាភិបាលកម្ពុជា។

ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤នេះ ដែលទើបនឹងបញ្ចប់ ដោយគណបក្សសង្គ្រោះជាតិ មិនបានចូលរួម រឹតតែធ្វើឲ្យសហគមន៍អន្តរជាតិ មិនសប្បាយចិត្ត។ សហគមន៍អន្តរជាតិខ្លះ បានចាត់ទុកការបោះឆ្នោតជ្រើសតាំងសមាជិកព្រឹទ្ធសភានៅកម្ពុជា ថាមិនមានភាពស្របច្បាប់ និងមិនតាមគន្លងប្រជាធិបតេយ្យ៕