កីឡាអន្តរជាតិ
អន្តរជាតិ
អភិបាលក្រុងនៅស៊ែប៊ី ដាក់ឈ្មោះផ្លូវមួយខ្សែថា «Nemanja Matic»
× Nemanja Matic ខ្សែបម្រើក្រុម Manchester United ត្រូវបានប្រទេសស៊ែប៊ីធ្វើផ្លូវមួយខ្សែដាក់ឈ្មោះថា Nemanja Matic ក្នុងក្រុង Ub ដែលជាទីកំណើតរបស់គេ។ នេះបើតាមសម្តីរបស់មន្ត្រីមូលដ្ឋានម្នាក់ដោយលោកបញ្ជាក់ថា នេះជាការតបស្នងចំពោះរឿងជាច្រើនដែល Matic បានធ្វើនៅប្រទេសកំណើត។
អភិបាលក្រុងលោក Darko Grisic បានលើកឡើងកាលពីថ្ងៃទី ១ ខែមីនាថា ការដាក់ឈ្មោះនៅតាមផ្លូវគឺជាអ្វីដែលយើងអាចធ្វើបានសម្រាប់ Matic។ នេះជាអ្វីដែលពួកយើងចង់បង្ហាញពីការដឹងគុណចំពោះសមិទ្ធផលជាច្រើនដែលគេបានធ្វើសម្រាប់តំបន់ដែលជាទីកំណើតរបស់គេ។
អតីតសមាជិកក្រុមតោខៀវ Chelsea និង Benfica រូបនេះ កើតនៅក្នុងភូមិ Vrelo នៅក្បែក្រុង Ub ដែលមានចំងាយ ៦០គីឡូម៉ែត្រភាគខាងលិចក្រុងប៊ែលក្រាដ។ Matic បានទៅកាន់ក្លិបកីឡាបាល់ទាត់ក្នុងស្រុករបស់ខ្លួន Jedinstvo Ub ជាទីដែលរូបគេធ្លាប់លេងកាលពីនៅវ័យកុមារ និងបានផ្តល់ថវិកាផ្ទាល់ខ្លួនសម្រាប់សាងសង់ស្មៅសិប្បនិម្មិត និងជួសជុលកីឡដ្ឋានថ្មីទៀតផង។
ខ្សែបម្រើរបស់ក្រុមជម្រើសជាតិស៊ែប៊ីវ័យ ២៩ ឆ្នាំនេះធ្លាប់ឈ្នះជើងឯក Premier League ជាមួយ Chelsea មុនពេលផ្លាស់ទីក្រុមបិសាចក្រហមនៅដើមរដូវកាល ២០១៧-២០១៨នេះ ក្រោមការដឹកនាំរបស់អ្នកចាត់ការទូទៅចាស់លោក Jose Mourinho៕
Tag:
បាល់ទាត់
Nemanja Matic
Manchester United
ស៊ែប៊ី
© រក្សាសិទ្ធិដោយ thmeythmey.com