កីឡាជាតិ
ជាតិ
បឹងកេតត្រូវប្រជែងជាមួយក្រុមសិង្ហបុរី ដែលយកស្មើ Ceres Negros ល្ងាចនេះ សកម្មភាពប្រកួតរវាងក្រុមបឹងកេតជាមួយក្រុម Shan United នៅពហុកីឡដ្ឋានជាតិកាលពីពេលកន្លងទៅ
× ក្រុមបឹងកេតត្រូវបើកទ្វារពហុកីឡដ្ឋានជាតិទទួលស្វាគមន៍ក្រុមភ្ញៀវ Home United របស់សិង្ហបុរី សម្រាប់ជំនួបពូល F នៃព្រឹត្តិការណ៍ AFC Cup 2018 នាវេលាម៉ោង៦:៣០នាទីល្ងាចថ្ងៃទី៦ មីនា នេះ។ គ្រូបង្វឹក Home United ដែលជាក្រុមមិនទាន់ស្គាល់បរាជ័យបានអះអាងថា ក្រុមលោកបានត្រៀមខ្លួនយ៉ាងល្អក្នុងការតទល់ជាមួយក្រុមបឹងកេតល្ងាចនេះ។ តែយ៉ាងណាគ្រូបង្វឹករូបនេះមិនបានមើលស្រាលលើសមត្ថភាពបឹងកេតនោះឡើយ ទោះបីរងបរាជ័យពីរប្រកួតជាប់គ្នាយ៉ាងធ្ងន់ធ្ងរក៏ដោយ។
ក្រោយរងការខកចិត្តជាបន្តបន្ទាប់សម្រាប់ពីរប្រកួតដំបូង ក្រុមជើងឯកលីគកំពូលកម្ពុជាបឹងកេត ត្រូវតទល់ជាមួយជើងខ្លាំងមិនដែលស្គាល់បរាជ័យ Home United របស់សិង្ហបុរី សម្រាប់ជំនួបលើកទី៣ក្នុងពូល F នៃព្រឹត្តិការណ៍ AFC Cup ឆ្នាំ២០១៨ នាវេលាម៉ោង៦:៣០នាទីល្ងាចថ្ងៃអង្គារ៍ នេះ នៅពហុកីឡដ្ឋានជាតិ។
សម្រាប់ពីរប្រកួតកន្លងមកក្រុម Home Unite បានយកឈ្នះក្រុម Shan United របស់មីយ៉ាន់ ១-០ ក្នុងជំនួបបើកឆាក និង ស្មើ ១-១ ជាមួយក្រុម Ceres Negros របស់ហ្វីលីពីនក្នុងជំនួបទី២។ បច្ចុប្បន្នក្រុមនេះ កំពុងឈរលេខរៀងទី២ក្នុងពូល F ដោយមាន៤ពិន្ទុ។ ចំណែកក្រុមបឹងកេតបានបរាជ័យ ៩-០ ក្នុងជំនួបបើកឆាកក្រោមថ្វីជើង Ceres Negros របស់ហ្វីលីពីន និងបានបន្តចាញ់ក្រុម Shan United របស់មីយ៉ាន់ម៉ាក្នុងលទ្ធផល ២-១ ជំនួបលើកទី២។
ទន្ទឹមនឹងនេះ លោក Aidil Sharin គ្រូបង្វឹកក្រុម Home United បាននិយាយថា ក្នុងបាល់ទាត់អ្វីៗអាចកើតឡើងគ្រប់ពេលវេលាបើសិនមានការធ្វេសប្រហែស។ ក្នុងន័យនេះ លោកចង់ក្រើនរំឮកឲ្យកូនក្រុមត្រូវមានការប្រុងប្រយ័ត្នខ្ពស់ក្នុងជំនួបបឹងកេត ទោះបីក្រុមនេះបានរងបរាជ័យពីរប្រកួតជាប់គ្នាក៏ដោយ។
«ជាទូទៅយើងត្រូវតែគោរពរាល់ក្រុមដែលយើងប្រកួតជាមួយ។ អ្វីៗគ្រប់យ៉ាងក្នុងការប្រកួតតែងតែអាចកើតមានឡើងប្រសិនបើយើងមើលលើតែលទ្ធផលគូប្រកួត និងមើលស្រាលលើការប្រកួតថាស្រួល។ ទោះបីបឹងកេតបានបរាជ័យ ៩-០ ក្រោមស្នាដៃក្រុមហ្វីលីពីន តែខ្ញុំជឿជាក់ថា ទាំងគ្រូនិងកីឡាករបឹងកេតនឹងខិតខំប្រឹងប្រែងឲ្យអស់ពីសមត្ថភាពសម្រាប់ជំនួបថ្ងៃនេះ»។ នេះជាការលើកឡើងរបស់លោក Aidil Sharin នាសន្និសីទសារព័ត៌មានមុនការប្រកួតកាលពីថ្ងៃទី៤ មីនា។
គ្រូបង្វឹករូបនេះបានអះអាងថា ក្រុម Home United បានត្រៀមខ្លួនរួចជាស្រេចក្នុងការតទល់ជាមួយក្រុមបឹងកេត។ មិនត្រឹមតែប៉ុណ្ណោះ លោកប្តេជ្ញាប្រឹងប្រែងឲ្យអស់ពីសមត្ថភាព១០០ភាគរយ ដើម្បីដណ្តើមជ័យជម្នះឲ្យបាននាល្ងាចនេះ។ លោកបានបន្ថែមថា ក្រុមលោកមិនដែលមើលស្រាលថាការប្រកួតមួយមានការងាយស្រួលនោះទេ ពោលគឺតែងតែគិតថាលំបាកជានិច្ច។ ព្រោះការមើលស្រាលសមត្ថភាពគូប្រកួត ជាកត្តានាំទៅរកបរាជ័យ។
ក្រៅពីជំនួបនៅលើទឹកដីកម្ពុជាក្នុងពូល F នេះ ក៏មានការប្រកួត១ទៀតផងដែរ គឺរវាងក្រុម Ceres Negros របស់ហ្វីលីពីនជាមួយក្រុម Shan United របស់មីយ៉ាន់ម៉ា ដែលធ្វើឡើងនាវេលាម៉ោង៦:៣០នាទី(ម៉ោងនៅកម្ពុជា)នៅកីឡដ្ឋាន Panaad Park and Stadium ប្រទេសហ្វីលីពីន៕
Tag:
បឹងកេត
AFC Cup 2018
Home United
© រក្សាសិទ្ធិដោយ thmeythmey.com