កីឡាការិនី វី ស្រីខួច តាំងចិត្តបោះជំហានទៅមុខជានិច្ចក្នុងអាជីពប្រដាល់របស់ខ្លួន

កីឡាជាតិ

ជាតិ

កីឡាការិនី វី ស្រីខួច តាំងចិត្តបោះជំហានទៅមុខជានិច្ចក្នុងអាជីពប្រដាល់របស់ខ្លួន

11, Mar 2018 , 2:39 pm

រូបភាព

ដោយ:

កីឡាការិនី វី ស្រីខួច បានចូលប្រឡូកក្នុងវិស័យកីឡាប្រដាល់គុនខ្មែរតាំងពីនាងមានអាយុ១៦ឆ្នាំ។ តាមរយៈវិស័យនេះ ស្រីខួច បានជួយឲ្យគ្រួសារនាងតាំងពីគ្មានផ្ទះ រហូតមានផ្ទះជាកម្មសិទ្ធិ។ លោកស្រី ហ៊ិន ម៉ៅ ម្តាយបង្កើតរបស់ ស្រីខួច បានរៀបរាប់ថា បច្ចុប្បន្នជីវភាពគ្រួសារលោកស្រីមានភាពល្អប្រសើរជាងមុនតាំងពី ស្រីខួច ចូលប្រឡូកក្នុងវិស័យកីឡានេះ។ តែលោកស្រី ហាក់បង្ហាញការព្រួយបារម្ភចំពោះអនាគតកូនស្រី ពាក់ព័ន្ធរឿងគូស្រករ។

ពីការហាត់ដើម្បីការពារខ្លួនរហូត វី ស្រីខួច បានក្លាយជាកីឡាការិនីប្រដាល់គុនខ្មែរ ដ៏ល្បីល្បាញមួយរូបនៅកម្ពុជា។ ភាពល្បីល្បាញមិនមានតែក្នុងស្រុកនោះទេ ស្រីខួច បានសាងភាពអស្ចារ្យនេះនៅឆាកអន្តរជាតិផងដែរ តាមរយៈការឈ្នះខ្សែក្រវាត់នៅប្រទេសបារាំង។ បច្ចុប្បន្នកីឡាការិនីវ័យ២៣ឆ្នាំរូបនេះ ជាកីឡាការិនីជម្រើសជាតិប្រដាល់សកលរបស់សហព័ន្ធកីឡាប្រដាល់សកលកម្ពុជា។

សំឡេង៖

«ពីដំបូងឡើយហាត់មិនមែនប៉ងចង់ឡើងវាយនោះទេ គ្រាន់តែបងប្រុសខ្ញុំគាត់សួរថា តើខ្ញុំចង់ហាត់(គុនខ្មែរ)អត់? ដោយពេលនោះខ្ញុំធ្វើការពេលយប់ ដូច្នេះខ្ញុំចង់ចេះក្បាច់គុនខ្លះៗដើម្បីទុកការពារខ្លួន។ ពេលខ្ញុំចាប់ផ្តើមហាត់គ្រូសួរថា មានចិត្តចង់ឡើងប្រកួតអត់? ពេលនោះ ខ្ញុំថាចង់សាកចង់ដឹងដែរ..។ គ្រាន់តែឡើងប្រកួតសាកល្បងម្តងមក ខ្ញុំចាប់ផ្តើមចង់ហាត់ចង់វាយរហូតតែម្តង»។ នេះជាការរៀបរាប់របស់កីឡាការិនី វី ស្រីខួច ពេលផ្តល់បទសម្ភាសដល់សារព័ត៌មានថ្មីៗនៅក្នុងពហុកីឡដ្ឋានជាតិ។

ជាកូនស្រីទី២ក្នុងគ្រួសារមានជីវភាពមិនសូវធូរធានៅក្រុងតាខ្មៅ ដែលមានបងប្អូន៧នាក់ កីឡាការិនី វី ស្រីខួច បានចូលប្រឡូកក្នុងវិស័យកីឡាប្រដាល់តាំងពីអាយុ១៦ឆ្នាំ។ ជីវភាពខ្វះខាត និងការស្រលាញ់ដែលមានជីតា និងបងប្រុសបង្កើតជាអ្នកហាត់គុនអាចជាដើមចមដែលជំរុញឲ្យ ស្រីខួច ចូលប្រឡូកក្នុងវិស័យកីឡាខ្សត់មនុស្សស្រីមួយនេះ។

ពាក់ព័ន្ធការចូលប្រឡូកក្នុងវិស័យកីឡាប្រដាល់របស់ ស្រីខួច ទាំងវ័យត្រូវបំពេញការសិក្សានេះ ម្តាយបង្កើតរបស់នាង លោកស្រី ហ៊ិន ម៉ៅ បាននិយាយថា ដោយសារគ្រួសារអ្នកស្រីមានជីវភាពខ្វះខាតរកព្រឹកខ្វះល្ងាច ទើបត្រូវបង្ខំចិត្តឲ្យកូនចូលប្រឡូកក្នុងវិស័យ ដែលលោកស្រីតែងតែទទួលពាក្យការរិះគន់ពីអ្នកជិតខាងមួយនេះ។

ប៉ុន្តែតាមរយៈការប្រឡូកក្នុងវិស័យនេះរបស់ ស្រីខួច បានជួយឲ្យគ្រួសារមួយដែលធ្លាប់មានជីវភាពខ្វះខាតរកព្រឹកខ្វះល្ងាច និងគ្មានផ្ទះស្នាក់នៅត្រឹមត្រូវ មានជីវភាពល្អប្រសើរ និងមានផ្ទះជាកម្មសិទ្ធិខ្លួនឯង។ «ពីដំបូងឡើយខ្ញុំគ្មានផ្ទះ គ្មានទីលំនៅច្បាស់លាស់នោះទេ ដើរតែជួលផ្ទះជួលដីគេនៅ ដើរតែនៅគ្រប់ទីកន្លែង។ ប៉ុន្តែនៅពេលខ្ញុំចាប់ផ្តើមចូលប្រឡូកក្នុងកីឡានេះ ខ្ញុំមានលុយទិញដីធ្វើផ្ទះខ្លួនឯង មានម៉ូតូជិះជាដើម»។ នេះជាការបញ្ជាក់របស់កីឡាការិនី វី ស្រីខួច។

ជាមួយគ្នានេះម្តាយបង្កើតរបស់កីឡាការិនី វី ស្រីខួច លោកស្រី ហ៊ិន ម៉ៅ បាននិយាយពីទុក្ខលំបាកដូច្នេះថា៖«ពីមុនគ្រួសារខ្ញុំគ្មានផ្ទះផ្ទាល់ខ្លួននោះទេ គឺជួលផ្ទះគេនៅ មានកន្លែងខ្លះខ្ញុំជួលបានពី៤ទៅ៥ខែរួចហើយដូរទៅមួយទៀត។ បន្ទាប់មកខ្ញុំបានជួលដីគេ តែត្រូវបានម្ចាស់គេថា គេត្រូវលក់ដីនេះ គេក៏ឲ្យខ្ញុំចេញ និយាយរួមស្ទើរ១០ត្រឡប់ ទម្រាំ ស្រីខួច ឡើងវាយយកលុយទិញដីធ្វើផ្ទះបានដូចសព្វថ្ងៃនេះ»។

ទម្រាំទទួលបានដូចសព្វថ្ងៃ ស្រីខួច ធ្លាប់រងការរិះគន់ពីមហាជនពាក់ព័ន្ធនឹងការចូលប្រឡូកក្នុងវិស័យនេះផងដែរ ដោយមានអ្នកខ្លះលើកឡើងថា នាងជាស្រីហេតុអ្វីមិនទៅធ្វើការងារផ្សេង បែរជាមកធ្វើជាអ្នកប្រដាល់ឲ្យវាយទៅវិញ។ យ៉ាងនេះក្តី ដោយមានការជំរុញនិងលើកទឹកចិត្តពីឱពុកម្តាយឲ្យកុំខ្វល់នឹងការរិះគន់អ្នកដទៃ ស្រីខួច មិនដែលយកអារម្មណ៍គិតពីបញ្ហានេះឡើយ។ អ្វីដែលសំខាន់ នាង បានខិតខំប្រឹងប្រែងហ្វឹកហាត់សម្រួចទៅរកគោលដៅ រហូតទទួលបានការសរសើរត្រឡប់មកវិញ។

ក្នុងសម្លៀកបំពាក់កីឡាដែលទើបហាត់ចប់ជាមួយក្រុមជម្រើសជាតិប្រដាល់សកលនៅក្នុងពហុកីឡដ្ឋានជាតិ វី ស្រីខួច បានរៀបរាប់យ៉ាងដូច្នេះថា៖«ពេលខ្ញុំហាត់ប្រដាល់សេរី គេឃើញខ្ញុំឡាំគ្នាឱបគ្នាកាច់គ្នាជាមួយប្រុសៗ គេថាខ្លួនស្រីទៅហាត់អីចឹង វាអត់សមអត់ទំនងអីណា..។ តែក្រោយមក ខ្ញុំបានឡើងប្រកួតទទួលបានជ័យជម្នះ និងបានចេញទៅប្រកួតនៅក្រៅប្រទេស គេសរសើរខ្ញុំវិញ គេថាតាំងពីដើមមិនដែលមានស្រីណាមានសមត្ថភាព ហើយបានចេញទៅប្រកួតនៅប្រទេសដូចនេះទេ»។

មិនត្រឹមតែ ស្រីខួច នោះទេ ដែលទទួលរងនូវការរិះគន់ទាំងនេះពីមហាជន សូម្បីតែម្តាយនាង ក៏រងការរិះគន់នេះផងដែរ។ លោកស្រី ហ៊ិន ម៉ៅ បានរៀបរាប់ដូច្នេះថា៖«អ្នកស្រុកគេរិះគន់យើង គេថាអត់ម្តេចមិនទៅរកការងារធ្វើផ្សេងពីនឹង(ប្រដាល់) សុខចិត្តឲ្យកូនស្រីឡើងប្រដាល់លើរេញ។ តែខ្ញុំតបវិញថា មិនដឹងធ្វើម៉េចទេបើវាចង់ចឹង ហើយណាមួយវាបានជួយដោះស្រាយជីវភាពយើងឲ្យមានភាពប្រសើរឡើង ពីទុក្ខលំបាក១០០ភាគរយ មកសល់ត្រឹមតែ៤០ភាគរយ»។

ទន្ទឹមនឹងនេះ លោកស្រីវ័យ៥១ឆ្នាំរូបនេះ ហាក់បង្ហាញក្តីបារម្ភចំពោះអនាគតរបស់ ស្រីខួច ដោយលោកស្រីព្រួយបារម្ភខ្លាចគ្មានអ្នកស្រលាញ់ស្រីជាអ្នកប្រដាល់ដូចកូនរបស់លោកស្រី។ តែការព្រួយបារម្ភនេះហាក់ផ្ទុយពីការយល់ឃើញរបស់សាម៉ីខ្លួន ខណៈ វី ស្រីខួច អះអាងថា នាងមិនខ្វល់ពីបញ្ហានេះឡើយ សំខាន់នាងអាចគ្រួសារឲ្យមានជីវភាពល្អប្រសើរជាងមុន។

តាមរយៈការចូលប្រឡូកក្នុងវិស័យកីឡាប្រដាល់របស់កីឡាការិនី វី ស្រីខួច បានទាក់ទាញកីឡាការិនីជាច្រើនឲ្យចូលរួមកីឡាមួយនេះ។ «ប្រុសអាចធ្វើបានស្រីក៏អាចធ្វើបាន ប្រុសអាចវាយបាន ស្រីក៏អាចវាយបាន»។ ជាសាររបស់ ស្រីខួច ចង់ផ្តាំទៅស្ត្រីៗកម្ពុជាកុំឲ្យខ្លាចនឹងពាក្យរិះគន់របស់មហាជន សម្រាប់វិស័យកីឡាមួយនេះ។ ជាមួយគ្នានេះ ស្រីខួច ស្នើដល់ស្ត្រីៗកម្ពុជាកុំមានការខ្មាសអៀន និងចូលរួមជាមួយកីឡាប្រដាល់នេះឲ្យបានច្រើន ដើម្បីធ្វើជាធនធានតំណាងឲ្យប្រទេសជាតិក្នុងព្រឹត្តិការណ៍អន្តរជាតិ កុំឲ្យចាញ់បរទេស។

ក្រៅពីកីឡាការិនី វី ស្រីខួច ក៏មានបងប្អូន៤នាក់ផ្សេងទៀតផងដែរ ដែលប្រឡូកក្នុងវិស័យកីឡាប្រដាល់នេះ។ បងប្អូនទាំង៤នោះរួមមានកីឡាករ វី សាវុធ, វី សុភាស់, កីឡាការិនី វី ស្រីឆាយ និងកីឡាការិនី វី ស្រីស្រស់៕