សេដ្ឋកិច្ចអន្តរជាតិ
អន្តរជាតិ
ចិន ជាម៉ាស៊ីនជំរុញការងើបឡើងសេដ្ឋកិច្ចពិភពលោក
× មហាយក្សចិន ដែលមានទំហំផលិតផលក្នុងស្រុកសរុប (GDP) ចំនួន១២.៨ទ្រីលានដុល្លារក្នុងឆ្នាំ២០១៧ នឹងនៅបន្តដើរតួនាទីជាម៉ាស៊ីនជំរុញការងើបឡើងសេដ្ឋកិច្ចពិភពលោក។ នេះបើតាមរបាយការណ៍ដែលចេញផ្សាយកាលពីពេលថ្មីៗកន្លងមកនេះ ដោយការិយាល័យជាតិស្ថិតិរបស់ចិន។
ក្នុងទិន្នន័យរបស់ការិយាល័យជាតិស្ថិតិ កាលពីឆ្នាំ២០១៧ សេដ្ឋកិច្ចរបស់ចិនមានទំហំប្រមាណ១៥ភាគរយនៃទំហំសេដ្ឋកិច្ចពិភពលោក និងចូលរួមចំណែកដល់់កំណើនសេដ្ឋកិច្ចពិភពលោកដល់ទៅ៣០ភាគរយ។ ទំហំដ៏ធំនៃសេដ្ឋកិច្ចនេះ បានជួយពង្រឹងកៅអីចិនក្នុងនាមជាមហាអំណាចសេដ្ឋកិច្ចពិភពលោកលំដាប់ទីពីរ។
បើតាមទិន្នន័យដដែលនេះ ពាណិជ្ជកម្មក្រៅប្រទេសរបស់ចិន មានទំហំ២៧.៨ទ្រីលានយ័នក្នុងឆ្នាំ២០១៧ ចំណែកឯទុនបម្រុងសម្រាប់ការផ្លាស់ប្ដូរអន្តរជាតិ បានកើនដល់ទៅ៣.១៤ទ្រីលានយ័នក្នុងឆ្នាំ២០១៧ ដែលជាទុនបម្រុងធំជាងគេរបស់ពិភពលោក។ ជាមួយគ្នានេះ អត្រាមានការងារធ្វើក៏បន្តកើនឡើង ហើយអត្រាអត់ការងារនៅតំបន់ទីក្រុងបានធ្លាក់មកត្រឹម៣.៩ភាគរយ។
ជាមួយគ្នានេះដែរ របាយការណ៍របស់ការិយាល័យស្ថិតតិចិនបង្ហាញដែរថា ទិន្នផលផលិតប្រចាំឆ្នាំបានរក្សានៅកម្រិត៦០០លានតោនរយៈពេល៥ឆ្នាំជាប់គ្នា។ នៅឆ្នាំមុន ចំណូល និងចំណាយសម្រាប់មនុស្សម្នាក់របស់ជនជាតិចិន បានកើនឡើងដូចគ្នា គឺ៩ភាគរយ និង៧.១ភាគរយជាបន្តបន្ទាប់គ្នា។
ចំណែកឯការសាងសង់ផ្លូវ និងប្រព័ន្ធរថភ្លើងក៏ត្រូវបានពង្រីកយ៉ាងខ្លាំងដែរ។ ផ្លូវល្បឿនលឿនដែលត្រូវបានសាងសង់ឡើងវិញមានចម្ងាយដល់ទៅ៦,៧៩៦គីឡូម៉ែត្រ ស្របពេលដែលផ្លូវរថភ្លើងល្បឿនលឿនមានប្រវែងជាងពីរពាន់គីឡូម៉ែត្រឯណោះ ហើយប្រព័ន្ធខ្សែអុបទិកវិញមានប្រវែង៧លានគីឡូម៉ែត្រ។ ការណ៍នេះ ធ្វើឲ្យមហាអំណាចសេដ្ឋកិច្ចលំដាប់ទីពីរនេះ មានប្រព័ន្ធផ្លូវល្បឿនលឿន ផ្លូវរថភ្លើងល្បឿនលឿន និងប្រព័ន្ធអុបទិកធំជាងគេលើពិភពលោក៕
© រក្សាសិទ្ធិដោយ thmeythmey.com