ពីនេះ ពីនោះ
តើឧបករណ៍នេសាទខុសច្បាប់ប្រើប្រាស់ចរន្តអគ្គិសនីឆក់ «យ៉ាំងកាវ» ឬ «ហ្សីប» អាចនឹងបង្កវិនាសកម្មដល់មច្ឆជាតិដល់កម្រិតណា សម្រាប់ថ្ងៃអនាគត?
អ្នកស្រី ឆែម ស្រីណែត លើកបង្ហាញត្រីឆ្តោ ដែលបានរួចរស់ជីវិតក្រោយពីត្រូវរងគ្រោះដោយឧបករណ៍នេសាទ ដែលប្រើប្រាស់ចរន្តអគ្គិសនីឆក់ នៅក្នុងបឹងទន្លេសាប
×![]()
ដោយ: ថ្មីៗ
រូបភាពត្រីឆ្តោ រួចរស់ជីវិតក្រោយពីត្រូវរងគ្រោះដោយឧបករណ៍នេសាទ ដែលប្រើប្រាស់ចរន្តអគ្គិសនីឆក់ នៅក្នុងបឹងទន្លេសាប
រូបភាពត្រីឆ្តោ ធម្មតាដែលមានរស់នៅតាមបឹង ស្ទឹង ទន្លេ អូរ ក្នុងប្រទេសកម្ពុជា
រូបភាពខាងលើ គឺជាត្រីឆ្តោ រងគ្រោះដោយឧបករណ៍នេសាទ ដែលប្រើប្រាស់ចរន្តអគ្គិសនីឆក់។ ជាទូទៅ ត្រីគ្រប់ប្រភេទ ដែលបានរួចរស់ជីវិត ក្រោយពីត្រូវរងគ្រោះដោយសារឧបករណ៍នេសាទឆក់ហើយ ឆ្អឹងខ្នងរបស់វាមានសភាពកោងរួញខុសធម្មតា ដូចមានរូបភាពបង្ហាញខាងលើស្រាប់។ ករណីនេះ នៅមិនទាន់មានការអះអាងពីអ្នកជំនាញណាម្នាក់ ថានឹងមានអ្វីកើតឡើង ចំពោះការបន្តពូជរបស់ត្រី ដែលរងគ្រោះដោយសារឧបករណ៍នេសាទ ដែលប្រើប្រាស់ចរន្តអគ្គិសនីឆក់នេះនៅឡើយទេ។
ចំណែកឯរូបភាពត្រីឆ្តោ ខាងក្រោម គឺជាត្រីធម្មតា តាមលក្ខណៈធម្មជាតិរបស់ត្រី ដែលដងខ្លួនរបស់វាត្រង់ មិនកោងរួញឆ្អឹងខ្នង។
សកម្មភាពនេសាទ ដោយប្រើប្រាស់ចរន្តអគ្គិសនីឆក់ នៅក្នុងបឹងទន្លេសាប ទន្លេសាប ទន្លេមេគង្គ និងតាមបឹង ឬស្ទឹងនានា ត្រូវបានប្រជានេសាទធម្មតា ព្រមទាំងអ្នករស់នៅតាមដងទន្លេផងដែរ តែពួកគាត់មិនចង់បញ្ចេញឈ្មោះ ដែលធ្លាប់ឃើញហេតុការណ៍ទាំងនោះ មានការព្រួយបារម្ភយ៉ាងខ្លាំង អំពីការណ៍ដែលនឹងអាចវិនាសហិចហោចមច្ឆជាតិគ្រប់ប្រភេទនាថ្ងៃអនាគត ដោយសារឧបករណ៍ល្មើសច្បាប់នេះ។ ជារឿយៗ ពួកគាត់អាចមើលឃើញ ពីសកម្មភាពនេសាទខុសច្បាប់ទាំងនោះ ស្ទើរក្លាយជាទម្លាប់ និងស៊ាំភ្នែកទៅហើយ ព្រោះគេអាចប្រព្រឹត្តទៅដោយបើកចំហរ និងសេរី ពិសេស គឺឧបករណ៍នេសាទលក្ខណៈទ្រង់ទ្រាយធំ «យ៉ាំងកាវ» ឬ «ហ្សីប»។ ឧបករណ៍នេសាទ«យ៉ាំងកាវ» ឬ «ហ្សីប» នេះ ប្រើទូកម៉ាស៊ីនពីរគ្រឿងអូសសាច់អួន ដែលមានបង្កប់ចរន្តអគ្គិសនីឆក់ សម្រាប់ចាប់ពពួកត្រីឥតស្រកា ទាំងតូច ទាំងធំ មិនរើសទំហំ នៅតាមបាតទន្លេ ស្ទឹង បឹងជាដើម។ ជាទូទៅ ការនេសាទបែបនេះ ប្រព្រឹត្តទៅនៅពេលយប់ច្រើនជាងពេលថ្ងៃ ព្រោះជាពេលដែលត្រីចេញដើរ។
នេះជាគំនូសបំព្រូញគូរដោយអ្នកនេសាទម្នាក់នៅក្នុងទន្លេមេគង្គ ដែលសុំមិនបញ្ចេញឈ្មោះ អំពីទម្រង់នៃឧបករណ៍នេសាទដ៏មានគ្រោះថ្នាក់សម្រាប់មច្ឆជាតិ «យ៉ាំងកាវ» ឬ «ហ្សីប» ដែលប្រើប្រាស់ចរន្តអគ្គិសនីឆក់។ ឧបករណ៍នេះ ប្រើប្រាស់ទូកម៉ាស៊ីនពីរគ្រឿងអូសសាច់អួន ដោយមានកំសួសសម្រាប់បណ្តែតសាច់អួននៅលើទឹក និងមានបង្កប់ខ្សែភ្លើងនៅជើងអួន សម្រាប់ឆក់យកត្រីគ្រប់ប្រភេទ នៅតាមបាតទន្លេ។
(អត្ថបទៈ Chhut Chheana រូបភាពៈ Chhut Chheana and Tach Phanara / USAID Wonders of the Mekong).
© រក្សាសិទ្ធិដោយ thmeythmey.com
