អន្តរជាតិ
រដ្ឋមន្ត្រីការពារជាតិអាមេរិក ស្នើឲ្យសភាឈប់លូកលាន់រឿងអាមេរិកគាំទ្រអារ៉ាប៊ីសាអូឌីតក្នុងសង្គ្រាមយេម៉ែន រូបភាព Intercept
× រដ្ឋមន្ត្រីការពារជាតិអាមេរិក បានស្នើសុំឲ្យសមាជិកសភាអាមេរិកឈប់លូកដៃក្នុងបេសកកម្មអាមេរិកដែលគាំទ្រអារ៉ាប៊ីសាអូឌីតក្នុងការបន្តអន្តរាគមន៍យោធាតាមផ្លូវការអាកាសនៅប្រទេសយេម៉ែន។ លោក អះអាងថា អាមេរិកមិនអាចដកខ្លួនបានឡើយព្រោះវានឹងធ្វើឲ្យសង្គ្រាមផ្លូវអាកាសនោះឆក់យកជីវិតជនស៊ីវិលកាន់តែច្រើន។
ព្រឹទ្ធសភាអាមេរិកនឹងចាប់ផ្តើមបោះឆ្នោតនៅសប្តាហ៍ក្រោយលើវិធានការដែលអាចរឹតត្បិតសកម្មភាពរបស់រដ្ឋាភិបាលអាមេរិកក្នុងការគាំទ្រសង្គ្រាមផ្លូវអាកាសអារ៉ាប៊ីសាអូឌីតនិងសម្ព័ន្ធមិត្តខ្លួននៅប្រទេសយេម៉ែន។ ប៉ុន្តែមន្ទីរប៉ង់តាហ្កូនបានចេញមុខស្នើសុំឲ្យសមាជិកសភាឈប់លូកលាន់ទៀត។
យោងតាមទីភ្នាក់ងារព័ត៌មាន AFP ប្រមុខការពារជាតិអាមេរិកលោក ជេម ម៉ាធីស (James Mattis) បានផ្ញើសំបុត្រមួយច្បាប់ទៅសមាជិកសភាអាមេរិកដោយស្នើសុំចំៗឲ្យពួកគេឈប់ជ្រៀតជ្រែកក្នុងបញ្ហានេះ ដោយទុកឲ្យរដ្ឋបាលអាមេរិកសម្រេចការងារនេះដោយឯករាជ្យ។
កន្លងមកសមាជិកសភាអាមេរិកជាច្រើនរួមទាំងលោក Bernie Sander ផងនោះបង្ហាញពីក្តីបារម្ភខ្លាំងចំពោះសង្គ្រាមបង្ហូរឈាមរវាងរដ្ឋឈូងសមុទ្រដែលដឹកនាំដោយអារ៉ាប៊ីសាអូឌីត និងក្រុមឧទ្ទាមប្រកាន់និកាយស៊ីអ៊ីតគាំទ្រដោយអ៊ីរ៉ង់ ហ៊ូធី (Houthi) ដែលឆក់យកជីវិតជនស៊ីវិលអស់ច្រើនសន្ធឹក និងបង្កគ្រោះមហន្តរាយមនុស្សជាតិធ្ងន់ធ្ងរនោះ។ ពួកគេក៏ស្នើឲ្យអាមេរិកបញ្ឈប់សកម្មភាពរបស់ខ្លួនផងដែរដើម្បីដោះស្រាយបញ្ហានេះ។
ពាក់ព័ន្ធនឹងការស្នើសុំនេះ លោក ម៉ាធីស បានសង្កត់ធ្ងន់ថា ការកម្រិតសកម្មភាពអាមេរិកក្នុងការគាំទ្រអារ៉ាប៊ីសាអូឌីតនិងបក្សពួកក្នុងការធ្វើសង្គ្រាមនៅយេម៉ែននឹងបង្កបញ្ហាកាន់តែអាក្រក់ទៀតពោលគឺធ្វើឲ្យជនស៊ីវិលស្លាប់កាន់តែច្រើន។
«ការរឹតត្បិតសកម្មភាពយោធារបស់អាមេរិកនឹងបង្កើនចំនួនជនស៊ីវិលដែលស្លាប់និងរបួស ហើយបង្កផលប៉ះពាល់ដល់កិច្ចសហប្រតិបត្តិការវាងអាមេរិកជាមដៃគូដែលរួមគ្នាប្រឆាំងភេរវកម្ម និងធ្វើឲ្យអាមេរិកបាត់បង់ឥទ្ធិពលផង។ ដែលនេះនឹងធ្វើឲ្យមានផលប៉ះពាល់ខ្លាំងលើស្ថាភាព ក៏ដូចជាវិបត្តិមនុស្សជាតិផងដែរ»។ នេះជាសម្តីរបស់លោក ជេម ម៉ាធីស ក្នុងលិខិតរបស់ខ្លួនផ្ញើទៅកាន់សមាជិកសភា។
លោក ម៉ាធីស ក៏ជឿជាក់ផងដែរថា ការដកខ្លួនរបស់អាមេរិកនឹងអនុញ្ញាតឲ្យអ៊ីរ៉ង់បង្កើនតួនាទីកាន់តែធំក្នុងជម្លោះយេម៉ែន និងផ្តល់ឱកាសឲ្យអ៊ីរ៉ង់បង្កើនសកម្មភាពបង្ករឿងដូចជាបាញ់មីស៊ីលបាលីស្ទិកប្រឆាំងអារ៉ាប៊ីសាអូឌីត ដែលវាជាហេតុផលចម្បងដែលនាំឲ្យសង្គ្រាមតំបន់ផ្ទុះឡើងផងដែរ។
តាំពីឆ្នាំ ២០១៥ មកមន្ទីរប៉ង់តាហ្កូនបានផ្តល់ការគាំទ្រមិនមែនប្រយុទ្ធដល់អារ៉ាប៊ីសាអូឌីត ដោយអាមេរិកផ្តល់របាយការណ៍ចារកម្ម និងផ្តល់ការគាំទ្រដោយចាក់ព្រេងដល់យន្តហោះចម្បាំងអារ៉ាប៊ីសាអូឌីតដែលបន្តប្រតិបត្តិការសឹកនៅយេម៉ែនផង។ អ្នករិះគន់អាមេរិកកន្លងមកផ្តល់យោបល់ថា បើសិនជាអាមេរិកឈប់ជួយ អារ៉ាប៊ីសាអូឌីត ក៏មិនមានលទ្ធភាពបន្តយុទ្ធនាការរបស់ខ្លួនបានដែរ៕
Tag:
យេម៉ែន
អាមេរិក
ជេម ម៉ាធីស
© រក្សាសិទ្ធិដោយ thmeythmey.com