អន្តរជាតិ
នាយករដ្ឋមន្ត្រីសិង្ហបុរី៖ ប្រទេសនៅក្បែរចិន មានទស្សនវិស័យខុសពីប្រទេសនៅឆ្ងាយពីចិន នាយករដ្ឋមន្រ្តីសិង្ហបុរី លី សៀនឡុង ឈរក្បែរនាយករដ្ឋមន្រ្តីអូស្ត្រាលី ម៉ាល់ខម ធើនប៊ូល (រូបភាព AFP)
× នាយករដ្ឋមន្ត្រីសិង្ហបុរីលោក លី សៀនឡុង នៅថ្ងៃទី១៦ ខែមីនា បានបង្ហាញការយល់ឃើញខុសគ្នាក្នុងចំណោមប្រទេសសមាជិកអាស៊ានទាំងអស់ជុំវិញការកើនឡើងឥទ្ធិពលរបស់ចិននៅក្នុងតំបន់។ បើតាមលោក លី សៀនឡុង ការងើបឡើងរបស់ចិន មិនត្រឹមតែបង្កើតការខ្វែងគំនិតគ្នាសម្រាប់ប្រទេសក្នុងតំបន់ឡើយ តែក៏បានផ្លាស់ប្ដូរតុល្យភាពយុទ្ធសាស្ត្រសកលដែរ។ យ៉ាងណាមិញ អាស៊ានមិនមានការរើសអើងអ្វីមហាអំណាចណាទាំងអស់។
នាសន្និសីទសារព័ត៌មាននៅទីក្រុងស៊ីដនី នាយករដ្ឋមន្ត្រីសិង្ហបុរីលោក លី សៀនឡុង និយាយថា សមាជិកអាស៊ានទាំងង១០ បានឆ្លើយតបផ្សេងៗគ្នាចំពោះការកើនឡើងឥទ្ធិពលរបស់ចិនទាំងក្នុងតំបន់ និងនៅលើឆាកអន្តរជាតិ។ លោក លី ហាក់មិនភ្ញាក់ផ្អើលនឹងរឿងនេះ ព្រោះសមាជិកទាំងអស់មានផលប្រយោជន៍រៀងៗខ្លួន តែប្រទេសអាស៊ានក៏មិនបានមើលពិភពលោកសផង ខ្មៅផងឡើយ។ ពោល គឺសមាជិកទាំងអស់ចាប់ដៃជាមួយមហាអំណាចទាំងអស់។
បើតាមទូរទស្សន៍សិង្ហបុរី Channel NewsAsia លោក លី សៀនឡុង និយាយបែបនេះ ជាចម្លើយ ទៅ សំណួររបស់សារព័ត៌មានអូស្ត្រាលីដែលសួរលោកថា អាស៊ានបែកបាក់ដោយសារចិនឬយ៉ាងណា។ ប្រមុខរដ្ឋាភិបាលសិង្ហបុរីរូបនេះបកស្រាយថា ប្រសិនប្រទេសមួយគ្មានព្រំដែនសមុទ្រហើយជាប់ ជាមួយចិន ប្រទេសនោះនឹងឃើញពិភពលោកផ្សេងពីប្រទេសកោះដែលនៅឆ្ងាយពីចិន ហើយរកស៊ី ជាមួយដៃគូធំៗជាច្រើន។
«ដូច្នេះនេះជាកត្តាមួយដែលនាំឲ្យសមាជិកអាស៊ានមានទស្សនវិស័យខុសគ្នា ប៉ុន្តែមិនមែនជាកត្តាតែមួយគត់ដែលធ្វើឲ្យរដ្ឋអាស៊ានមានគំនិតផ្សេងគ្នាដែរ ហើយយើងត្រូវតែរំពឹងបែបនេះ ព្រោះវាជាការពិតដែលកើតឡើងលើពិភពលោក»។ នេះជាសម្ដីរបស់លោក លី សៀនឡុង ដែលជាប្រធានអាស៊ានសម្រាប់ឆ្នាំ២០១៨ ។
នាយករដ្ឋមន្ត្រីសិង្ហបុរី ទំនងចង់បានន័យថា ប្រទេសអាស៊ានទាំង១០ មើលឃើញចិនក្នុងផ្លូវផ្សេងគ្នា។ សមាជិកខ្លះមើលឃើញផលប្រយោជន៍ធំក្នុងទំនាក់ទំនងជាមួយចិន ព្រោះរកស៊ីជាមួយចិនបានជំរុញកំណើនសេដ្ឋកិច្ច និងការអភិវឌ្ឍប្រទេសខ្លួន ប៉ុន្តែប្រទេសខ្លះមើលចិនជាការគំរាមកំហែង ឬជាដៃគូប្រជែងទៅវិញ។
ជាការពិត ការកើនឡើងយ៉ាងឆាប់រហ័សរបស់ចិន ពិតជាធ្វើឲ្យអាស៊ានជួបបញ្ហាប្រឈមមុខមែន។ ទោះជាមើលពីក្រៅ អាស៊ានរួបរួមគ្នាមែន តែសមាជិកនៃសមាគមប្រទេសចំនួន១០នេះ មានគំនិតខុសគ្នាលើបញ្ហាជាច្រើនដែលទាក់ទងជាមួយចិន។ ឧទាហរណ៍ជាក់ស្ដែង គឺជម្លោះសមុទ្រចិនខាងត្បូងតែម្ដង។ រដ្ឋអាស៊ានបួនមានជម្លោះជាមួយចិននៅតំបន់នេះ និងចង់ឲ្យសមាជិកផ្សេងទៀតបញ្ចេញសំឡេងរួមតែមួយ ប៉ុន្តែប្រទេសអាស៊ានខ្លះយល់ថា បញ្ហានេះមិនមែនជារឿងរបស់អាស៊ានឡើយ៕
Tag:
ចិន
អាស៊ាន
សិង្ហបុរី
លី សៀនឡុង
© រក្សាសិទ្ធិដោយ thmeythmey.com