Son អាចអវត្តមាននៅ Spurs ពីររដូវកាល ព្រោះត្រូវបំពេញកាតព្វកិច្ចយោធា

កីឡាអន្តរជាតិ

អន្តរជាតិ

Son អាចអវត្តមាននៅ Spurs ពីររដូវកាល ព្រោះត្រូវបំពេញកាតព្វកិច្ចយោធា

16, Mar 2018 , 5:06 pm

រូបភាព

ដោយ: ទេព ពិទូរ្យ

Heung-min Son ខ្សែប្រយុទ្ធកំពុងឡើងជើងរបស់កូរ៉េខាងត្បូង អាចអវត្តមានឲ្យក្រុម Tottenham Hotspur រហូតដល់ទៅ ២រដូវកាល ដោយសារត្រូវជាប់បំពេញកិច្ចការយោធានៅក្នុងប្រទេសកំណើត។

នៅក្រោមច្បាប់របស់ប្រទេសកូរ៉េខាងត្បូង បុរសទាំងអស់ត្រូវមានកាតព្វកិច្ចយោធារយៈពេល ២១ខែ នៅមុនអាយុ ២៨ឆ្នាំ។ ដូច្នេះ Son សមាជិករបស់ក្រុមកីឡាបាល់ទាត់ជម្រើសជាតិកូរ៉េខាងត្បូងដែលបច្ចុប្បន្នមានវ័យ ២៥ឆ្នាំ ក៏នឹងត្រូវជាប់ភារកិច្ចមួយនេះផងដែរ។

អតីតខ្សែប្រយុទ្ធ Bayer Leverkusen នឹងឈានដល់ពេលវេលាត្រូវបំពេញកាតព្វកិច្ចយោធាជូនជាតិចាប់ពីខែកក្កដា ឆ្នាំ២០១៩ តទៅ ដែលវានឹងជះឥទ្ធិពលអាក្រក់ដល់ក្រុមរហស្សនាមមាន់ខ្នាយមាសចំនួន២រដូវកាល ពោលគឺក្នុងរដូវកាល ២០១៩-២០២០ និង ២០២០-២០២១។

Son បានបង្ហាញទម្រង់លេងដ៏អស្ចារ្យក្នុងរយៈពេលចុងក្រោយនេះ ដោយតែងតែរកគ្រាប់បាល់ឲ្យ Spurs ស្ទើគ្រប់ការប្រកួត និងជួយកូរ៉េខាងត្បូងបានកៅអីទៅ World Cup នៅរុស្ស៊ីទៀតផង។ ប្រសិនបើមិនអាចគេចផុតពីកាតព្វកិច្ចនេះ រូបគេក៏អាចប៉ះពាល់ដល់អាជីពកីឡាករបាល់ទាត់នេះដែរ។

យ៉ាងណាក៏ដោយ បើតាមច្បាប់ខាងលើ រដ្ឋាភិបាលកូរ៉េខាងត្បូងក៏បានផ្តល់ការលើកលែងវិញដែរចំពោះអត្តពលិករូបណាដែលអាចជួយក្រុមឈ្នះការប្រកួតធំៗបាន។

នេះមានន័យថា ប្រសិនបើជម្រើសជាតិកូរ៉េខាងត្បូង និង Son អាចឈ្នះការប្រកួតក្នុងព្រឹត្តិការណ៍កីឡាអាស៊ី (Asian Game) ឆ្នាំ ២០១៨ ឬការប្រកួត Asian Cup 2019 នោះរូបគេ នឹងត្រូវបានផ្តល់ការលើកលែងពីកាតព្វកិច្ចយោធានេះមិនខាន៕