អន្តរជាតិ
ទីប្រឹក្សាUN ៖ «បើជនជាតិរូហ៊ីងយ៉ា ត្រឡប់ទៅមីយ៉ាន់ម៉ាវិញ ពួកគេនឹងត្រូវគេសម្លាប់»
× អ្នកប្រឹក្សាអង្គការសហប្រជាជាតិ នៅតែមានការព្រួយបារម្ភខ្លាំងពីជោគវាសនា និង អាយុជីវិតរបស់ជនភៀសខ្លួនជនជាតិភាគតិចរ៉ូហ៊ីងយ៉ា និង បានព្រមានពីបទឧក្រិដ្ឋប្រល័យពូជសាសន៍ដែលប្រព្រឹត្តដោយអាជ្ញាធរមីយ៉ាន់ម៉ាទៀតផង ។ អ្នកប្រឹក្សាអង្គការសហប្រជាជាតិ ថែមទាំងព្រមាន ថា បើជនភៀសខ្លួនទាំងនោះ ត្រឡប់ទៅមីយ៉ាន់ម៉ាវិញ ពួកគេប្រឈមនឹងការបាត់បង់ជីវិត ។
«ជនជាតិមូស្លីមរ៉ូហ៊ីងយ៉ា ត្រូវបានគេសម្លាប់ ធ្វើទារុណកម្ម រំលោភ និងដុតទាំងរស់»។ នេះជាសេចក្តីថ្លែងការណ៍របស់ លោក Adama Dieng អ្នកប្រឹក្សាពិសេសអង្គការសហប្រជាជាតិជំនាញការទប់ស្កាត់ប្រល័យពូជសាសន៍ បន្ទាប់ពីលោកបានបំពេញទស្សនកិច្ចទៅកាន់បង់ក្លាដែស និងជំរំរបស់ជនភៀសខ្លួនរបស់ជនជាតិភាគតិចរ៉ូហ៊ីងយ៉ានៅថ្ងៃ៧ ដល់ថ្ងៃ១៣ មីនា ។
តាមការចុះផ្សាយរបស់មជ្ឈមណ្ឌលព័ត៌មានអង្គការសហប្រជាជាតិនៅថ្ងៃ១៤ មីនា អ្នកប្រឹក្សារូបនេះ បានប្រើពាក្យធ្ងន់ៗ ដើម្បីពណ៌នាពីទុកលំបាករបស់ជនភៀសខ្លួន ក៏ដូចជា អំពើឃោរឃៅរបស់អាជ្ញាធរមីយ៉ាន់ម៉ា ទៅលើក្រុមជនភៀសខ្លួន ។ លោក ថែមទាំងហ៊ានអះអាងថា តាមរយៈភស្តុតាង និងរបាយការណ៍ដែលលោកទទួលបាន អំពើដែលកើតឡើងលើជនភៀសខ្លួន អាចចូលក្នុងបទឧក្រិដ្ឋប្រល័យពូជសាសន៍បានទៀត។
មិនខុសពីមន្ត្រីជំនាញសិទ្ធិមនុស្សផ្សេងទៀតឡើយ អ្នកប្រឹក្សាជំនាញបទល្មើសព្រហ្មទណ្ឌរបស់អង្គការសហប្រជាជាតិរូបនេះ ក៏មើលមិនឃើញពីកិច្ចប្រឹងប្រែងរបស់រដ្ឋាភិបាលមីយ៉ាន់ម៉ាក្នុងការទទួលយកជនភៀសខ្លួនត្រឡប់ទៅវិញផងដែរ ។ លោកថែមទាំងបានសង្កត់ធ្ងន់ថា៖« តាមរយៈស្ថានភាពបច្ចុប្បន្ន ការត្រលប់ទៅមីយ៉ាន់ម៉ាវិញ ប្រៀបដូចរុញច្រាន ជនជាតិរ៉ូហ៊ីងយ៉ា ឲ្យប្រឈមនឹងការបទល្មើសកាន់តែអាក្រក់ជាងនេះទៅទៀត » ។
ខណៈពណ៌នាពីជោគវាសនាអភ័ព្វរបស់ជនជាតិរ៉ូហ៊ីងយ៉ាតាំងពីកើតមក អ្នកប្រឹក្សាក៏បានបន្ទោសសហគមន៍អន្តរជាតិដែលនៅតែបន្តលាក់មុខ និងបណ្តែតបណ្តោយឲ្យជនជាតិរ៉ូហ៊ីងយ៉ាបន្តបាត់បង់ជីវិត បាត់បង់តម្លៃ និងផ្ទះសម្បែងជាបន្តបន្ទាប់ បើទោះបីសហគមន៍អន្តរជាតិបានដឹងលឺពីបទល្មើសឃោរឃៅទៅលើជនជាតិទាំងនោះហើយក៏ដោយ។
គួរជម្រាបផងដែរថា ការរត់ភៀសខ្លួនរបស់ជនជាតិភាគតិចរ៉ូហ៊ីងយ៉ាពីរដ្ឋ Rakhine របស់មីយ៉ាន់ម៉ា រាប់សិបម៉ឺននាក់ទៅកាន់បង់ក្លាដែស ដោយសារតែអសន្តិសុខក្នុងប្រទេស។ មន្ត្រី និងអ្នកជំនាញសិទ្ធិមនុស្សជាច្រើន បន្តដាក់សំណួរទៅកាន់រដ្ឋាភិបាលមីយ៉ាន់ម៉ា ថាតើពួកគេធ្លាប់បានឃើញពីស្ថានភាពរស់នៅរបស់ជនជាតិភាគតិចទាំងនោះឬយ៉ាងណា បានជានៅតែមិនសូវអើពើជាមួយបញ្ហានេះ៕
Tag:
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com