អន្តរជាតិ
បច្ចេកវិទ្យា
សំបុត្រមួយរបស់លោក Einstein កាលពីឆ្នាំ១៩២៨ លក់បានក្នុងតម្លៃជាង១០ម៉ឺនដុល្លារអាមេរិក លោក Albert Einstein នៅក្នុងការិយាល័យធ្វើការក្រុងប៊ែរឡាំងកាលពីឆ្នាំ១៩១៩។ រូបថត PD-US
× សំបុត្រមួយច្បាប់ដែលសរសេរដោយរូបវិទូ Albert Einstein ត្រូវលក់នាការដេញថ្លៃមួយក្នុងតម្លៃ ១០៣.៧០០ដុល្លារអាមេរិក កាលពីថ្ងៃទី១៣ ខែមីនា កន្លងមក នៅក្រុងហ្សេរុយសាឡឹម ដែលបច្ចុប្បន្នអ៊ីស្រាអែលប្រកាសថា ជាទីក្រុងរបស់ខ្លួន។ នេះបើតាមការផ្សាយរបស់ទីភ្នាក់ងារព័ត៌មានបារាំង AFP។
លិខិតនោះ បានសរសេរជាភាសាអាល្លឺម៉ង់ ទាក់ទងនឹងទ្រឹស្តីទំនាញ ដែលលោក Albert Einstein បានផ្ញើចេញពីទីក្រុងប៊ែរឡាំងទៅមិត្តភក្តិគណិតវិទូម្នាក់ កាលពីឆ្នាំ១៩២៨ ។ អ្នកដេញថ្លៃបាននោះ មិនត្រូវបានបង្ហើបពីអត្តសញ្ញាណនោះឡើយ។
លោក Gal Wiener នាយកក្រុមហ៊ុនដេញថ្លៃ Winner’s Auctions ក្រៅពីលិខិតរបស់លោក Einstein ហត្ថលេខា និងរូបថតរបស់កំពូលអ្នកប្រាជ្ញរូបវិទ្យា ដែលទទួលបានពានរង្វាន់ណូបែល កាលពីឆ្នាំ១៩២១ រូបនេះ ក៏លក់ដេញថ្លៃបានរាប់ម៉ឺនដុល្លារអាមេរិកផងដែរ។
កាលពីខែតុលា ឆ្នាំ២០១៧ កំណត់ត្រាមួយរបស់លោក Albert Einstein ស្តីពីអាថ៌កំបាំងនៃសុភមង្គល បានលក់ដាច់ក្នុងតម្លៃ ១.៥៦លានដុល្លារអាមេរិក ដែលដំបូងឡើយ គេប៉ាន់ស្មានថា លក់បានតែក្នុងរង្វង់៥០០០ ទៅ៨០០០ដុល្លារអាមេរិកតែប៉ុណ្ណោះ។
បើតាម BBC កាលពីពេលថ្មីៗកន្លងមកផងដែរ កំណត់ត្រាមួយរបស់លោក Einstein នៅឆ្នាំ១៩២១ ដែលសរសេរទៅកាន់នាង Elisabetta Piccini និស្សិតគីមីវិទ្យា ក៏បានលក់ដាច់ក្នុងតម្លៃ៦១០០ដុល្លារអាមេរិកក្នុងការដេញថ្លៃមួយនៅហ្សេរុយសាឡឹមផងដែរ។ Piccini ជនជាតិអ៊ីតាលី ដែលរស់នៅក្នុងអាគារនៅក្រុង Florence ជាមួយ Maja ដែលជាប្អូនស្រីរបស់លោក Einstein។
លោក Einstein បានបដិសេធចំពោះតំណែងប្រធានាធិបតីដំបូងរបស់រដ្ឋអ៊ីស្រាអែល ប៉ុន្តែបានធ្វើជាអភិបាលនៃសាកលវិទ្យាល័យ Hebrew University of Jerusalem រហូតដល់លោកទទួលមរណភាពក្នុងឆ្នាំ១៩៥៥ ។
ឯកសារជាច្រើនរបស់លោក Einstein ត្រូវបានតម្កល់ទុកសម្រាប់អ្នកស្រាវជ្រាវនៅតាមសាកលវិទ្យាល័យ ជាពិសេសកំណត់ត្រាសំខាន់ៗទាក់ទងនឹងទ្រឹស្តី និងរបកគំហើញអ្វីមួយ៕
Tag:
Albert Einstein
រូបវិទូ
© រក្សាសិទ្ធិដោយ thmeythmey.com