អន្តរជាតិ
អូស្ត្រាលី ប្រាប់មេដឹកនាំអាស៊ានឲ្យពង្រឹងការសហការគ្នាទប់ទល់ការគំរាមកំហែងភេរវកម្មដែលប្រើបច្ចេកវិទ្យាទំនើប
លោក Peter Dutton ( រូបភាព៖AFP)
×![]()
ដោយ: ថ្មីៗ
អូស្ត្រាលីបានប្រាប់មេដឹកនាំអាស៊ានដែលចូលរួមកិច្ចប្រជុំពិសេសនៅក្រុងស៊ីដនីថា ការប្រើប្រាស់កម្មវិធីរក្សាសារសម្ងាត់ដើម្បីទាក់ទងគ្នា និងរៀបចំគម្រោងវាយប្រហារភេរវកម្មនោះក្លាយជាបញ្ហាប្រឈមថ្មីសម្រាប់ក្រុមភ្នាក់ងារចារកម្ម។ អូស្ត្រាលីបានអំពាវនាវឲ្យមានការរួបរួមគ្នា និងឯកភាពគ្នារវាងភាគីពាក់ព័ន្ធដើម្បីឆ្លើយតបនឹងបញ្ហាប្រឈមនេះ។
រដ្ឋមន្ត្រីទទួលបន្ទុកកិច្ចការផ្ទៃក្នុងអូស្ត្រាលី Peter Dutton បានប្រាប់មេដឹកនាំនៃបណ្តារដ្ឋអាស៊ានដែលមានវត្តមានក្នុងកិច្ចប្រជុំកំពូលអាស៊ាន អូស្ត្រាលី នៅថ្ងៃសៅរ៍ទី ១៧ ខែមីនាថា ការប្រើប្រាស់គេហទំព័រខុសច្បាប់របស់បណ្តាញក្រុមជ្រុលនិយម និងក្រុមឧក្រិដ្ឋជននោះបានក្លាយជាបញ្ហាធំសម្រាប់សមត្ថភាពចារកម្ម។
«ការប្រើប្រាស់កម្មវិធីផ្ញើសារដែលអាចរក្សាការសម្ងាត់ខ្ពស់ (encrypted messaging apps) ដោយបណ្តាញក្រុមភេរវជន និងក្រុមឧក្រិដ្ឋជនក្លាយជាបញ្ហាប្រឈមចម្បងដែលប៉ះពាល់ដល់សមត្ថភាពចារកម្មនាពេលបច្ចុប្បន្ន»។ លោក Dutton បានលើកឡើងដូច្នេះ។
មន្ត្រីជាន់ខ្ពស់អូស្ត្រាលីរូបនេះបានប្រាប់មេដឹកនាំតំបន់អាស៊ីអាគ្នេយ៍ថា ការពង្រឹងសហប្រតិបត្តិការរវាងអាស៊ាន និង អូស្ត្រាលី ជាដំណោះស្រាយដែលមានប្រសិទ្ធភាពដើម្បីឆ្លើយតបបញ្ហាប្រឈមទាំងនេះរួមទាំងទប់ទល់ការគំរាមកំហែងរបស់ក្រុមភេរវជនរដ្ឋឥស្លាម និងក្រុមដទៃទៀតដែលកំពុងព្យាយាមជ្រើសរើសសមាជិកថ្មីនោះ។
លោក Dutton អះអាងបន្តដូច្នេះ៖ «ខណៈដែលប្រជាជាតិរបស់យើងផ្តោតលើការប្រឆាំងនឹងការគំរាមកំហែងរបស់ក្រុមភេរវជននៅក្នុងប្រទេសរៀងៗខ្លួន វាជាកំហុសឆ្គងដែលយើងនៅព្យាយាមដោះស្រាយបញ្ហាដោយចាត់ទុកវាជាបញ្ហាក្នុងស្រុងសុទ្ធសាធ។ ភេរវកម្ម និងហិង្សាជ្រុលនិយមមិនមានព្រំដែនឡើយ»។
លោកបន្តថា ការប្រឆាំងភេរវកម្មត្រូវការការពង្រងឹងកិច្ចសហប្រតិបត្តិការរួមគ្នា និងត្រូវការប្រឹងប្រែងរួមគ្នាដោយមានការសម្របសម្រួលគ្នារវាងភ្នាក់ងារសន្តិសុខ និងភ្នាក់ងារអនុវត្តច្បាប់ជាតិផងដែរ។
អាស៊ានក្លាយជាគោលដៅសំខាន់របស់បណ្តាញក្រុមភេវជនជាពិសេសក្រុមភេរវជនរដ្ឋឥស្លាមស៊ីរី និងអ៊ីរ៉ាក់ដែលព្យាយាមបង្កើតរដ្ឋឥស្លាមនៅតំបន់អាស៊ីអាគ្នេយ៍នេះ។ កន្លងមកអូស្ត្រាលីបានរួមចំណែកយ៉ាងសំខាន់ក្នុងការជួយគាំទ្របណ្តាប្រទេសអាស៊ានក្នុងការកាត់ផ្តាច់ចរន្តហិរញ្ញវត្ថុរបស់ក្រុងភេរវជន និងប្រឆាំងហិង្សាជ្រុលនិយមទាំងនេះផង។ ដូចឃើញស្រាប់កាលពីឆ្នាំមុន អូស្ត្រាលីបានជួយជ្រោមជ្រែងរដ្ឋាភិបាលក្រុងម៉ានីលក្នុងការប្រយុទ្ធប្រឆាំងក្រុមភេរជនដែលមានភក្តីភាពចំពោះក្រុមរដ្ឋឥស្លាមដែលបានកាន់កាប់ក្រុង Marawi នៅកោះមិនដាណាវនោះរហូតដល់បានជ័យជម្នះ។
នៅក្នុងកិច្ចប្រជុំពិសេសលើកនេះ ក្រៅពីពង្រឹងកិច្ចសហប្រតិបត្តិការទ្វេភាគីលើវិស័យសេដ្ឋកិច្ច ពាណិជ្ជកម្ម និងការទូត អូស្ត្រាលី នឹងចុះហត្ថលេខាលើកិច្ចព្រមព្រៀងរួមគ្នាមួយដើម្បីពង្រឹងសមត្ថភាពប្រឆាំងភេរវកម្មតាមរយៈការចែករម្លែករបាយការណ៍ចារកម្ម និងពង្រឹងសមត្ថភាពអនុវត្តច្បាប់នៅក្នុងការប្រឆាំងភេរវជននេះដែរ៕
Tag:
អូស្ត្រាលី
អាស៊ាន
Peter Dutton
ភេរវជន
© រក្សាសិទ្ធិដោយ thmeythmey.com
