អន្តរជាតិ
អគ្គិភ័យនៅសណ្ឋាគារដ៏ធំមួយក្នុងក្រុងម៉ានីល សម្លាប់មនុស្ស៤នាក់
× មនុស្សយ៉ាងហោច៤នាក់ស្លាប់ ហើយ១៩នាក់ទៀតត្រូវបានរាយការណ៍ថា កំពុងជាប់ក្នុងគ្រោះអគ្គិភ័យក្នុងសណ្ឋាគារដ៏ធំមួយនៅទីក្រុងម៉ានីល ប្រទេសហ្វីលីពីននៅថ្ងៃអាទិត្យនេះ។ បើតាមការផ្សាយរបស់ AFP ក្រុមសង្គ្រោះ បានរំដោះមនុស្សជាច្រើនតាមឧទ្ធម្ភាគចក្រពីលើដំបូល។
សណ្ឋាគារ និងកាស៊ីណូ ឈ្មោះ Waterfront Manila Pavilion ត្រូវភ្លើងលេបត្របាត់តាំងពីព្រឹកថ្ងៃអាទិត្យមក ហើយក្រុមពន្លត់អគ្គិភ័យ និងក្រុមសង្គ្រោះ បានព្យាយាមជម្លៀសមនុស្សជាង៣០០នាក់ ដោយប្រើរយៈពេលប្រមាណ៦ម៉ោង ក្នុងនោះ៦នាក់ត្រូវបានបញ្ជូនទៅមន្ទីរពេទ្យ។
តាមរបាយការណ៍បឋម មនុស្ស៤នាក់ស្លាប់ ដែលក្នុងនោះ ២នាក់ជាបុគ្គលិកសណ្ឋាគារ។ លោក Yu Johnny ប្រធានគ្រប់គ្រងគ្រោះមហន្តរាយក្រុងម៉ានីល បានបញ្ជាក់ថា មនុស្ស១៩នាក់ កំពុងជាប់នៅក្នុងសណ្ឋាគារនៅឡើយ។
អាជ្ញាធរ បានសន្និដ្ឋានថា អគ្គិភ័យបានចាប់ផ្តើមពីកន្លែងកាស៊ីណូនៅជាន់ទី២១ ដែលសំបូរទៅដោយភ្ញៀវក្នុងស្រុក និងបរទេស៕
© រក្សាសិទ្ធិដោយ thmeythmey.com