ជាតិ
សំណុំរឿងវាយតំណាងរាស្ត្របក្សប្រឆាំងកាលពីជាងពីរឆ្នាំមុន ត្រូវបានសើរើឡើងវិញ (ពីឆ្វេងទៅស្តាំ) លោក ញ៉យ ចំរើន និងលោក គង់ សភា ត្រូវបានបញ្ចូនទៅព្យាបាលនៅមន្ទីរពេទប្រទេសថ្ងៃ បន្ទាប់ពីត្រូវបានជនល្មើសវាយដំ
× តាមការកំណត់ សាលាឧទ្ធរណ៍ ត្រូវបើកសវនាការនៅព្រឹកថ្ងៃទី២៣ ខែមីនា ឆ្នាំ២0១៨នេះ ដើម្បីជំនុំជម្រះឡើងវិញ ចំពោះសេចក្តីសម្រេចរបស់សាលាដំបូងរាជធានីភ្នំពេញ ក្នុងការផ្តន្ទាទោសជនល្មើសបីនាក់ ដែលវាយអតីតតំណាងរាស្ត្រពីររូបនៃគណបក្សសង្គ្រោះជាតិ ឲ្យជាប់ពន្ធនាគារត្រឹមមួយឆ្នាំ។ ប៉ុន្តែ មេធាវីរបស់អតីតតំណាងរាស្ត្រទាំងពីរ បែរជាសុំពន្យារពេលនៃការបើកសវនាការទៅវិញ ហើយសាលាឧទ្ធរណ៍ ក៏ធ្វើតាមសំណើរនេះ។
លោក សំ សុគង់ មេធារីមួយរូបរបស់អតីតតំណាងរាស្ត្រទាំពីរ គឺលោក គង់ សភា និងលោក ញ៉យ ចំរើន ដែលជាជនរងគ្រោះ បានប្រាប់សារព័ត៌មានថ្មីៗថា ការស្នើឲ្យពន្យារពេលនៃការបើកសវនាការ គឺដោយសារតែកូនក្តីរបស់លោក មិនទាន់អាចត្រៀមលក្ខណៈឲ្យស្រួលបួល។ លោកមេធាវី និយាយដូច្នេះថា៖«សាលាឧទ្ធរណ៍ ជូនដំណឹងភ្លាម ហើយក៏បើកសវនាការភ្លាម ធ្វើឲ្យកូនក្តីខ្ញុំ មិនមានពេលគ្រាប់គ្រាន់ ក្នុងការរៀបចំខ្លួន»។
យ៉ាងណាក៏ដោយ សាលាឧទ្ធរណ៍ មិនទាន់បញ្ជាក់ពីកាលបរិច្ឆេទសាថ្មី នៃការបើកសវនាការនោះទេ។
តាមពិតទៅ មេធាវី បានដាក់បណ្តឹងសាទុក្ខ តាំងពីអំឡុងខែមិថុនា ឆ្នាំ២0១៦ មកម្ល៉េះ ដើម្បីសុំឲ្យសាលាឧទ្ធរណ៍ ជំនុំជម្រះឡើងវិញ ចំពោះសេចក្តីសម្រេចរបស់សាលាដំបូងរាជធានីភ្នំពេញ។ ប៉ុន្តែ សាលាឧទ្ធរណ៍ ទើបនឹងចាប់ផ្តើមចាត់ការនូវបណ្តឹងរបស់មេធាវីនាពេលនេះ។
លោក សំ សុគង់ ពន្យល់ថា មូលហេតុដែលអតីតតំណាងរាស្ត្រ សុំដាក់បណ្តឹងសាទុក្ខ ដោយសារតែពួកគេ មិនពេញចិត្តនឹងសាលក្រមរបស់សាលាដំបូងរាជធានភ្នំពេញ ដែលឲ្យជនល្មើស ជាប់ទោសត្រឹមបួនឆ្នាំ ដោយក្នុងនោះ អនុវត្តក្នុងពន្ធនាគារមួយឆ្នាំ ហើយបីឆ្នាំទៀត ត្រូវព្យួរ (បីឆ្នាំនេះ តម្រូវឲ្យរស់នៅក្រៅពន្ធនាគារ)។ មកដល់ពេលនេះ ជនល្មើសទាំងនោះ ដែលរួមមាន លោក ចាយ សារិទ្ធ លោក ម៉ៅ ហឿន និងលោក សុត វណ្ណនី ត្រូវបានដោះលែងអស់ហើយ។
លោក សំ សុគង់ បន្តថា ក្រុមមេធាវី បានប្តឹងជនល្មើសពីបទប៉ុនប៉ងមនុស្សឃាត ប៉ុន្តែសាលាដំបូងរាជធានីភ្នំពេញ បែរជាកាត់ទោសនិងចោទពួកគេ ពីបទហិង្សាដោយចេតនា ទៅវិញ។ លោក បន្ថែមថា ជនល្មើស ដែលត្រូវបានកាត់ទោស មានតែបីនាក់ប៉ុណ្ណោះ ដោយរកមិនឃើញអ្នកពាក់ព័ន្ធផ្សេងទៀតនោះទេ។ លោក បញ្ជាក់បែបនេះថា៖«ជនរងគ្រោះ អាចប្តឹងទៅតុលាការជាន់ខ្ពស់ បើយល់ថា តុលាការជាន់ទាប មិនបានផ្តល់យុត្តិធម៌ដល់ខ្លួន»។
គួររម្លឹកថា កាលពីអំឡុងខែតុលា ឆ្នាំ២0១៥ មានក្រុមបាតុករ នាំគ្នាទៅតវ៉ានៅមុខវិមានរដ្ឋសភា ដើម្បីទាមទារឲ្យទម្លាក់លោក កឹម សុខា ចេញពីតំណែងអនុប្រធានរដ្ឋសភា។ កាលនោះ លោក កឹម សុខា ជាអនុប្រធានរដ្ឋសភា និងជាអនុប្រធានគណបក្សសង្គ្រោះជាតិ។ ចំណែក លោក គង់ សភា និងលោក ញ៉យ ចំរើន ដែលកាលនោះនៅជាតំណាងរាស្ត្រគណបក្សសង្គ្រោះជាតិ ដើរចេញពីវិមានរដ្ឋសភា ហើយក៏ត្រូវបានជនល្មើស ព្រួតគ្នាវាយតែម្តង បណ្តាលឲ្យរងរបួសយ៉ាងធ្ងន់ធ្ងរ៕
Tag:
តុលាការ
មេធាវី
តំណាងរាស្ត្រ
© រក្សាសិទ្ធិដោយ thmeythmey.com