ជាតិ
នយោបាយជាតិ
តុលាការ កោះហៅលោក សម រង្ស៊ី ក្រោយសង្ស័យថា សន្យាកាត់ដីឲ្យបរទេស រូបភាព៖ ជំនួបរវាងលោក សម រង្ស៊ី និងលោក កុក ស កាលពីឆ្នាំ២0១៣
× លោក សម រង្ស៊ី អតីតប្រធានគណបក្សសង្គ្រោះជាតិ និងបច្ចុប្បន្នជាប្រធានចលនាសង្គ្រោះជាតិ ដែលកំពុងនិរទេស ត្រូវបានតុលាការកម្ពុជា បង្គាប់ឲ្យចូលបំភ្លឺ ពីដំណើររឿងនៃការចុះកិច្ចព្រមព្រៀងកាត់ទឹកដីឲ្យបរទេស។ យោងតាមដីការបស់លោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ដែលជាអ្នកកាន់សំណុំរឿងនេះ លោក សម រង្ស៊ី ត្រូវចូលបំភ្លឺ នៅថ្ងៃទី៧ ខែឧសភា ឆ្នាំ២0១៨។
លោក សម រង្ស៊ី ទំនងជាមិនធ្វើតាមការបង្គាប់របស់ព្រះរាជអាជ្ញានោះទេ ដោយសាតែលោក កំពុងតែស្ថិតនៅឯបរទេសឯណោះ។ ម្យ៉ាងទៀត លោក ក៏មិនដែលបានចូលបំភ្លឺក្នុងតុលាការដែរ នៅពេលមានដីកាកោះហៅ ចំពោះបណ្តឹងផ្សេងៗ នាពេលកន្លងមក។
អគ្គស្នងការនគរបាលជាតិ ជាដើមបណ្តឹង ក្នុងការប្តឹងលោក សម រង្ស៊ី ពីករណីដែលថាលោក កាត់ទឹកដីឲ្យបរទេស។ នគរបាល បានដាក់បណ្តឹងនេះ ទៅកាន់តុលាការ បន្ទាប់ពីសម្តេច ហ៊ុន សែន ប្រមុខរដ្ឋាភិបាល បញ្ចេញប្រតិកម្មខ្លាំងៗ ចំពោះលោក សម រង្ស៊ី។
ក្នុងពិធីសម្ពោធស្ពានកោះប៉េន ខេត្តកំពង់ចាម នៅថ្ងៃទី១៤ ខែមីនា ឆ្នាំ២0១៨ សម្តេច ហ៊ុន សែន បានលើកឡើង យ៉ាងដូច្នេះថា៖« [លោក សម រង្ស៊ី] បានទទួលស្គាល់ខ្លួនឯងហើយថា កាត់ដីឲ្យគេ៤ខេត្ត។ រឿងនេះមិនតូចទេ។ ក្រសួងមហាផ្ទៃ កំពុងស្រាវជ្រាវលើសំណុំរឿងក្បត់ជាតិមួយនេះ»។
មន្ត្រីជាន់ខ្ពស់ជាច្រើនរបស់រដ្ឋាភិបាល ក៏យល់ឃើញដូចសម្តេច ហ៊ុន សែន ដែរ ដែលថាលោក សម រង្ស៊ី ជាជនក្បត់ជាតិ ដោយមានបំណងចង់កាត់ខេត្ត៤ រួមមាន មណ្ឌគិរី រតនគីរិ ក្រចេះ និងស្ទឹងត្រែង ឲ្យទៅបរទេស។ មន្ត្រីជាន់ខ្ពស់តាមបណ្តាស្ថាប័ន និងក្រសួងនានា ជាពិសេសនគរបាលនិងកងទព័កម្ពុជា បានចេញមកថ្កោលទោសលោក សម រង្ស៊ី ជាបន្តបន្ទាប់។
ប្រតិកម្មរបស់សម្តេច ហ៊ុន សែន រួមទាំងមន្ត្រីរដ្ឋាភិបាល គឺធ្វើឡើងក្រោយពីមានវីដេអូឃ្លីបមួយ ទើបនឹងបែកធ្លាយ ហើយត្រូវបានបង្ហោះនៅលើបណ្តាញសង្គមហ្វេសប៊ុក ដែលបង្ហាញពីការចុះកិច្ចព្រមព្រៀងមួយតាំងពីឆ្នាំ២0១៣មកម្ល៉េះ រវាងលោក សម រង្ស៊ី និងលោក កុក ស ដែលត្រូវបានអះអាងថា ជាមេដឹកនាំជនជាតិភាគតិចម៉ុងតាញ៉ារបស់វៀតណាម។ លោក សម រង្ស៊ី រងការចោទប្រកាន់ថា ការចុះហត្ថលេខាលើកិច្ចព្រមព្រៀមនោះ ជាការកាត់ខេត្តទាំង៤ ដែលរួមមាន មណ្ឌគិរី រតនគីរិ ក្រចេះ និងស្ទឹងត្រែង ទៅឲ្យបរទេស (វៀតណាម)។
លោក សម រង្ស៊ី បានបង្ហោះនៅលើទំព័រហ្វេសប៊ុកពីក្រៅប្រទេស នៅថ្ងៃទី១៥ ខែមីនា ឆ្នាំ២0១៨ ដើម្បីឆ្លើយតបនឹងសម្តេច ហ៊ុន សែន បែបនេះថា៖«លោក ហ៊ុន សែន បែរជាមកបំភ្លៃទាំងស្រុង នូវគំនិតរបស់ខ្ញុំ ស្តីពីវិមជ្ឈការ ដែលតម្រូវឲ្យយើង ទទួលស្គាល់សិទ្ធិសម្រេចនៅមូលដ្ឋានរបស់ខ្មែរលើ ខ្មែរកណ្តាល និងខ្មែរក្រោម ដែលជាខ្មែរតែមួយ»។
លោក សម រង្ស៊ី បកស្រាយថា លោក គ្រាន់តែចង់ផ្តល់សិទ្ធិនិងអំណាច ទៅដល់ជនជាតិដើមភាគតិច ក្នុងខេត្តទាំង៤នោះ ប៉ុណ្ណោះ។ ប៉ុន្តែ លោក សង្កត់ធ្ងន់ថា ខេត្តទាំង៤ មិនអាចបំបែកឲ្យទៅបង្កើតរដ្ឋផ្សេង ចេញពីកម្ពុជានោះទេ។
ក្នុងបទសម្ភាសជាមួយវីអូអេ នៅថ្ងៃទី១៥ ខែមីនា ឆ្នាំ២0១៨ លោក សម រង្ស៊ី បានថ្លែងការពារខ្លួន យ៉ាងដូច្នេះថា៖«យើងត្រូវអនុវត្តនូវគោលការណ៍វិមជ្ឈការ។ វិមជ្ឈការហ្នឹង គឺយើងត្រូវផ្ទេរសិទ្ធិសម្រេចឲ្យទៅប្រជាពលរដ្ឋក្នុងមូលដ្ឋាន នៅតាមតំបន់ និងនៅតាមខេត្តនីមួយៗ។ [….] ប៉ុន្តែ គោលការណ៍វិមជ្ឈការនេះ គឺត្រូវស្ថិតនៅក្រោមក្របខណ្ឌនៃប្រទេសកម្ពុជា។ អត់មានបង្កើតរដ្ឋ ដោយឡែកនោះទេ។ យើង ជាខ្មែរទាំងអស់គ្នា។ យើង រស់លើទឹកដីខ្មែរទាំងអស់គ្នា ហើយមានដំបូងតែមួយ គឺប្រទេសកម្ពុជា»។
បណ្តឹង ដែលប្តឹងដោយគនរបាលកម្ពុជា គឺជាបណ្តឹងថ្មី១ទៀត ក្នុងចំណោមបណ្តឹងជាច្រើន សម្រាប់លោក សម រង្ស៊ី។ បើគិតមកដល់ពេលនេះ លោក សម រង្ស៊ី រងបណ្តឹងមិនតិចជាង១0នោះទេ។ កាលពីប៉ុន្មានខែមុន លោក សម រង្ស៊ី ទើបនឹងត្រូវបានក្រសួងការពារជាតិ ប្តឹង ពីបទញុះញង់កងទ័ពមិនឲ្យស្តាប់បទបញ្ជា។ បច្ចុប្បន្ន តុលាការ កំពុងចាត់ការបណ្តឹងរបស់ក្រសួងការពារជាតិ៕
© រក្សាសិទ្ធិដោយ thmeythmey.com