ជាតិ
នយោបាយជាតិ
សម្ដេច ហ៊ុន សែន៖ ជំនួយចិន បានជួយពង្រឹងឯករាជ្យនយោបាយកម្ពុជា
× ភ្នំពេញ៖ «ចិនគឺជាមិត្ត និងជាបងប្អូនកម្ពុជា»។ នេះគឺជាគោលនយោបាយការបរទេស របស់រដ្ឋាភិបាលដែលដឹកនាំដោយសម្ដេច ហ៊ុន សែន ប្រធានគណបក្សប្រជាជនកម្ពុជា ក្នុងការបង្កើនទំនាក់ទំនងយ៉ាងជិតស្និតជាមួយចិន។ ក្នុងកែវភ្នែកសម្ដេច ហ៊ុន សែន ចិនគឺជាមិត្ត ដែលជួយអភិវឌ្ឍន៍កម្ពុជា ដោយស្មោះត្រង់អស់ពីចិត្ត ខុសពីប្រទេសដទៃ។
ថ្លែងក្នុងពីធីបើកការដ្ឋានសាងសង់ឡើងវិញ ផ្លូវជាតិលេខ១១ ដែលជាជំនួយរបស់ចិន នៅព្រឹកថ្ងៃទី២៣ មីនា សម្ដេចនាយករដ្ឋមន្ត្រី ហ៊ុន សែន បាននិយាយថា ចិនបានផ្ដល់ជំនួយច្រើនធំធេងមកកម្ពុជា សម្រាប់ដំណើការអភិវឌ្ឍប្រទេស ។ សម្ដេច ហ៊ុន សែន បានសង្កត់ធ្ងន់ថា ជំនួយរបស់ចិនមិនត្រឹមតែលើស្ទួយសេដ្ឋកិច្ចនោះទេ តែវាក៏ជាជំនួយពង្រឹងឯករាជ្យនយោបាយកម្ពុជាផងដែរ។
ក្នុងន័យនេះនាយករដ្ឋមន្ត្រី បានពន្យល់ថា កម្ពុជាមានទំនាក់ទំនងល្អ ជាលក្ខណៈកុងសង់ស៊ីសរបស់រដ្ឋាភិបាល ចាប់តាំងពីជំនាន់ព្រះបរមរតនកោដ្ឋ សម្ដេចនរោត្តម សីហនុ មកដល់បច្ចុប្បន្ន។ ប៉ុន្តែមិនមែនមានន័យថា រដ្ឋាភិបាលបោះបង់នយោបាយការបរទេសទំនាក់ទំនងជាមួយបណ្ដាប្រទេសជុំវិញពិភពលោកនោះទេ។ សម្រាប់សម្ដេច ហ៊ុន សែន គោលនយោបាយការបរទេសកម្ពុជា គឺសម្លឹងទៅមើលប្រទេសណា ដែលជួយកម្ពុជាពិតប្រាកដប៉ុណ្ណោះ។
សូមស្ដាប់សំឡេងនាយករដ្ឋមន្ត្រី៖
ដោយមិននិយាយពីអតីតកាល ទំនាក់ទំនងកម្ពុជា-ចិន កំពុងរីកចម្រើនខ្លាំងលើគ្រប់វិស័យ តាមរយៈកិច្ចសហប្រតិបត្តិការគ្រប់ជ្រុងជ្រោយ ដោយគិតចាប់ពីឆ្នាំ២០១០ មកដល់បច្ចុប្បន្ននេះ។ ប៉ុន្តែទំនាក់ទំនងស្អិតល្មួតរវាងកម្ពុជា-ចិន ក៏បានក្លាយជារូបភាពអាក្រក់ នៅក្នុងក្រសែភ្នែករបស់សាធារណៈជនទូទៅ និងមេដឹកនាំដែលមិនគាំទ្រចិនផងដែរ។
កន្លងមកអ្នកវិភាគមួយចំនួន លើកឡើងថា កម្ពុជា កំពុងមានគោលនយោបាយទន់ទោលទៅរកប្រទេសចិនខ្លាំង ដែលហាក់កំពុងផ្ទុយពីគោលនយោបាយអព្យាក្រឹត្យខ្លួន ដែលមានចែងនៅក្នុងរដ្ឋធម្មនុញ្ញកម្ពុជា។ អ្នកវិភាគព្រួយបាម្ភពីគោលនយោបាយការបរទេសនេះ នឹងអាចឲ្យកម្ពុជាធ្លាក់ចូលទៅក្នុងរូបភាព នាទស្សវត្ស៦០ និងទស្សវត្ស៧០។
បន្ថែមពីនេះ គោលនយោបាយការបរទេសចិន ត្រូវបានប្រទេសនៅលោកខាងលិចមើលឃើញថា ចិនកំពុងពង្រីកឥទ្ធិពលរបស់ខ្លួននៅក្នុងតំបន់អាស៊ីអាគ្នេយ៍ ដោយយកប្រទេសតូចៗដូចជាកម្ពុជា ដើម្បីធ្វើជាឈ្នាន់សម្រាប់ពង្រីកអំណាចរបស់ចិនប៉ុណ្ណោះ។
ងាកមកការវិនិយោគចិននៅកម្ពុជាវិញ ប្រទេសលោកខាងលិច មើលឃើញថា ចិនគ្មានភាពស្មោះត្រង់ជាមួយកម្ពុជាឡើយ ពោលរាល់ការវិនិយោគទាំងនោះ ចិនតែងតែសម្លឹងឃើញទទួលផលច្រើនជាងកម្ពុជាដែលជាម្ចាស់តំបន់។ ហើយអ្វីដែលលោកខាងលិចនេះ សង្កេតឃើញនោះ ភាគច្រើនអ្នកវិនិយោគចិនសម្រុកមកកម្ពុជា ដើម្បីគេចវេះពីការតាមដានរបស់អាជ្ញាធរចិន និងលាងលុយកខ្វក់ជាដើម ។នេះបើតាមសារព័ត៌មាន The New York Times កន្លងមក។
តែយ៉ាងណាសម្ដេច ហ៊ុន សែន ចាត់ទុកសម្តីរបស់បរទេសទាំងនោះ គ្រាន់តែជាការច្រណែន និងចង់បំផ្លាញទំនាក់ទំនងរវាងកម្ពុជា-ចិនប៉ុណ្ណោះ៕
© រក្សាសិទ្ធិដោយ thmeythmey.com