អតីតតំណាងរាស្ត្របក្សប្រឆាំង ត្រូវបានបដិសេធ ក្នុងការចូលជួបអ្នកជាប់ឃុំ

ជាតិ

អតីតតំណាងរាស្ត្របក្សប្រឆាំង ត្រូវបានបដិសេធ ក្នុងការចូលជួបអ្នកជាប់ឃុំ

23, Mar 2018 , 3:56 pm

រូបភាព

លោក អ៊ូ ច័ន្ទរ័ត្ន អតីតតំណាងរាស្រ្តគណបក្សសង្គ្រោះជាតិ

ដោយ: សារព័ត៌មានថ្មីៗ

សំណើសុំចូលជួបលោក អ៊ុំ សំអាន អតីតតំណាងរាស្ត្រគណបក្សសង្គ្រោះជាតិ និងលោក មាជ សុវណ្ណារ៉ា អតីតមន្ត្រីជាន់ខ្ពស់គណបក្សនេះ រួមទាំងសកម្មជនជាង១0នាក់ផ្សេងទៀត ដែលកំពុងជាប់ឃុំក្នុងពន្ធនាគារ ត្រូវបានច្រានចោល។ លោក អ៊ូ ច័ន្ទរ័ត្ន អតីតតំណាងរាស្ត្រមួយរូប ដែលតំណាងឲ្យអតីតតំណាងរាស្ត្រមួយចំនួន ក្នុងការដាក់សំណើនេះ បានអះអាងថា មូលហេតុនៃការបដិសេធ គឺដោយសារតែពួកលោក ប្រើពាក្យថា «តំណាងរាស្ត្រ»។

បើតាមលោក អ៊ូ ច័ន្ទរ័ត្ន អគ្គនាយកដ្ឋានពន្ធនាគារ យល់ថា ការបន្តប្រើតួនាទីជាតំណាងរាស្ត្រក្នុងលិខិតបទដ្ឋានបែបនេះ គឺមិនត្រឹមត្រូវឡើយ ពីព្រោះពួកលោក លែងជាតំណាងរាស្ត្រទៀតហើយ។ លោក ប្រាប់សារព័ត៌មានថ្មីៗ យ៉ាងដូច្នេះ ៖«គេ ថាមិនអាចទទួលយកបាន ព្រោះយើងនៅប្រើពាក្យតំណាងរាស្ត្រ»។

សារព័ត៌មានថ្មីៗ មិនអាចសុំការបកស្រាយពីលោក នុត សាវនា អ្នកនាំពាក្យពន្ធនាគារបានទេ ដោយសារលោក មិនលើកទូរសព្ទ។

លោក អ៊ូ ច័ន្ទរ័ត្ន បន្តថា នៅថ្ងៃចន្ទ សប្តាហ៍ក្រោយ លោក នឹងដាក់សំណើសាជាថ្មី ដោយមិនប្រើតួនាទីជាតំណាងរាស្ត្រទៀតឡើយ។ លោក បញ្ជាក់បែបនេះថា៖«ពេលលុបពាក្យតំណាងរាស្ត្រចោលហើយ ខ្ញុំសង្ឃឹមថា គេ នឹងមិនបដិសេធទៀតទេ។ គ្រាន់តែសុំជួបសួរសុខទុក្ខ ដូចជាមិនមានអ្វីធ្ងន់ធ្ងរទេ»។

គួររម្លឹកថា កាលពីអំឡុង ខែតុលា ឆ្នាំ២០១៦ លោក អ៊ុំ សំអាន ត្រូវបានតុលាការ កាត់ទោសជាប់ពន្ធនាគារ ២ឆ្នាំ ៦ខែ និងពិន័យជាប្រាក់៤លានរៀល ពីបទ«ញុះញង់នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍» ទាក់ទងនឹងការរិះគន់ពីបញ្ហាព្រំដែន។

រីឯ លោក មាជ សុវណ្ណារ៉ា រួមទាំងសកម្មជនបក្សប្រឆាំងជាង១០នាក់ទៀត ត្រូវបានកាត់ទោសឲ្យជាប់ពន្ធគារ ពី៧ឆ្នាំ ទៅ២០ឆ្នាំ។ តុលាការ បានចោទពួកគេថា បានចូលរួម និងដឹកនាំធ្វើកុបកម្មប្រឆាំងអាជ្ញាធរសាធារណៈ នៅក្បែរទីលានប្រជាធិបតេយ្យ កាលពីខែកក្កដា ឆ្នាំ២០១៤៕