ជាតិ
លោក សុខ ទូច ប្រាប់ក្រុមអង្គការអន្តរជាតិថា កម្ពុជា លែងមានហើយពាក្យ «កាប់ឈើ» លោក សុខ ទូច ថ្លែងក្នុងពិធីបិទទិវាចម្លាក់ឈើពិភពលោក នៅថ្ងៃទី២៥ ខែមីនា ឆ្នាំ២0១៨
× លោក សុខ ទូច ប្រធានរាជបណ្ឌិត្យសភាកម្ពុជា បានសរសើរកម្ពុជាថា ជាប្រទេសដែលស្រឡាញ់និងថែរក្សា បរិស្ថាននិងព្រៃឈើ។ ការលើកឡើងបែបនេះរបស់លោក សុខ ទូច ធ្វើឡើង នៅថ្ងៃទី២៥ ខែមីនា ឆ្នាំ២០១៨ ក្នុងឱកាសដែលលោក ចូលរួមបិទទិវាចម្លាក់ឈើពិភពលោក ដោយមានតំណាងអង្គការ សមាគម និងភាគីពាក់ព័ន្ធនានា មកពីបណ្តាប្រទេសជាង១០០ ចូលរួម។
ប្រធានរាជបណ្ឌិត្យសភាកម្ពុជារូបនេះ បានបញ្ជាក់យ៉ាងដូច្នេះថា៖«កម្ពុជា មិនមែនជាប្រទេសបំផ្លាញបរិស្ថានទេ។ កម្ពុជា មានឧស្សាហកម្មតូចណាស់ [ខាងព្រៃឈើ]។ កម្ពុជា ចាត់ទុកវិស័យទេសចរណ៍ ជាឧស្សាហកម្មឥតផ្សែង។ ដូច្នេះ ចាប់ពីពេលនេះតទៅ លែងមានហើយពាក្យថាកាប់ឈើ។ ប៉ុន្តែយើងត្រូវតែអភិរក្ស និងបណ្តុះដើមឈើ»។
លោក សុខ ទូច អះអាងថា បើគ្មានព្រៃឈើនិងធម្មជាតិទេ ក៏គ្មានជម្រកសត្វដែរ ហើយអាចនឹងប៉ះពាល់ជីវិតមនុស្សថែមទៀត។ លោក បន្តថា កម្ពុជា ព្យាយាមបណ្តុះយុវជនជំនាន់ក្រោយ ឲ្យស្រឡាញ់ធម្មជាតិ។
សូមបញ្ជាក់ថា ទិវាចម្លាក់ឈើពិភពលោក (World Wood Day) តែងតែប្រារម្ភឡើងជារៀងរាល់ឆ្នាំ ពីប្រទេសមួយទៅប្រទេស។ សម្រាប់ឆ្នាំនេះ កម្ពុជា ធ្វើជាម្ចាស់ផ្ទះ ក្នុងការរៀបចំទិវាចម្លាក់ឈើពិភពលោក ដែលប្រព្រឹត្តនៅក្រុងសៀមរាប ចាប់ពីថ្ងៃទី២១ ដល់ថ្ងៃទី២៥ ខែមីនា ឆ្នាំ២០១៨ ក្រោមប្រធានបទ «ព្រៃឈើ និងជីវិត»៕
Tag:
សុខ ទូច
ព្រៃឈើ
ធម្មជាតិ
ទិវាចម្លាក់ឈើពិភពលោក
© រក្សាសិទ្ធិដោយ thmeythmey.com