ជាតិ
ជប៉ុនផ្ដល់ថវិកា១៨៥លានដុល្លារ សម្រាប់សាងសង់កំណាត់ផ្លូវជាតិលេខ៥ ប្រវែង៨៥គីឡូម៉ែត្រ
× ភ្នំពេញ៖ រដ្ឋាភិបាល បើកការដ្ឋានសាងសង់កំណាត់ ផ្លូវជាតិលេខ៥ ដែលមានប្រវែង៨៥គីឡូម៉ែត្រ ពីខេត្តបាត់ដំបង ទៅកាន់ក្រុងសិរីសោភ័ណ ខេត្តបន្ទាយមានជ័យ ដោយចំណាយទឹកប្រាក់ជិត២០០លានដុល្លារ ដែលជាថវិការដ្ឋាភិបាលជប៉ុន។
កំណាត់ផ្លូវជាតិ៥នេះ ជាប្រភេទផ្លូវបេតុងកៅស៊ូ AC កម្រាស់ ១៥សង់ទីម៉ែត្រ និងពង្រីកឲ្យកាន់តែធំជាងមុន ដែលមានទទឹង ២៣ម៉ែត្រ មាន៤គន្លងដោយមានសួនទ្រូងផ្លូវខណ្ឌចែកទិសដៅចរាចរណ៍នៅចំកណ្តាល។ ក្រៅពីការស្តារឲ្យកាន់តែប្រសើរ និងពង្រីកកំណាត់ផ្លូវនេះឲ្យកាន់តែធំហើយនោះ ក៏មានការសាងសង់ផ្លូវវាងក្រុង ០២ខ្សែប្រវែងសរុប ៣៣,២៦គីឡូម៉ែត្រ។ ក្នុងនោះផ្លូវវាងក្រុងបាត់ដំបង ប្រវែង ២៣,៩២គីឡូម៉ែត្រ និងក្រុងសិរីសោភ័ណ ប្រវែង ៩,៣៤គីឡូម៉ែត្រ ដែលត្រូវបានចំណាយថវិកាសាងសង់ប្រមាណ១៩,៩៨៨យ៉េនជប៉ុន ស្មើរនឹង ១៨៥លានដុល្លារអាមេរិក ជាហិរញ្ញប្បទាន ពីរដ្ឋាភិបាលជប៉ុន។ នេះបើតាមហ្វេសប៊ុករបស់សម្ដេចនាយករដ្ឋមន្ត្រី ហ៊ុន សែន ។
សម្តេច ហ៊ុន សែន បានបញ្ជាក់ថា រាជរដ្ឋាភិបាល គ្រោងនឹងបើកការដ្ឋានសាងសង់២កំណាត់ទៀត ចាប់ពីព្រែកក្តាម ទៅខេត្តពោធិសាត់ និងបាត់ដំបងទៅដល់ព្រំដែនថៃ។ បើតាមសម្តេច ហ៊ុន សែន កំណាត់ផ្លូវជាតិលេខ៥នេះ ជាចំណែកមួយជួយដល់ការរីកចម្រើនរបស់សេដ្ឋកិច្ចជាតិ និងគោលនយោបាយកាត់បន្ថយភាពក្រីក្ររបស់ប្រជាពលរដ្ឋ ហើយក៏ជួយសម្រួលដល់ចរាចរណ៍ឲ្យកាន់តែប្រសើរផងដែរ៕
Tag:
ហ៊ុន សែន
ជប៉ុន
បាត់ដំបង
© រក្សាសិទ្ធិដោយ thmeythmey.com