ជាតិ
សិល្បះ
លោក ឆាយ បូរ៉ា៖ វិស័យភាពយន្តទន់ខ្សោយ ធ្វើឲ្យកម្ពុជាខាតថវិការាប់លានដុល្លារក្នុង១ឆ្នាំ រូបពីហ្វេសប៊ុកលោក ឆាយ បូរ៉ា ប្រធានសមាគមភាពយន្ត
× ភ្នំពេញ៖ លោក ឆាយ បូរ៉ា បន្តជាប់ជាប្រធានសមាគមភាពយន្តអាណត្តិថ្មីទៀត (២០១៨-២០១៩) ក្រោយពីមានការបោះឆ្នោតគាំទ្រ ពីសំណាក់ម្ចាស់ផលិតកម្មធំៗចំនួន ២១ តំណាងឲ្យរោងភាពយន្ត និងក្រុមហ៊ុនចែកចាយភាពយន្តទូទាំងប្រទេសកម្ពុជា។ ក្នុងនាមជាប្រធានសមាគមភាពយន្តអាណត្តិថ្មីទៀតនេះ លោក ឆាយ បូរ៉ា ប្ដេជ្ញាបន្តដោះស្រាយបញ្ហាក្នុងវិស័យភាពយន្ត ដែលនៅសេសសល់ ហើយត្រៀមយុទ្ធសាស្ត្រថ្មី ដើម្បីទប់ស្កាត់ហានិភ័យ (ក្ស័យធន ឬដួលរលំ) ដែលអាចកើតឡើងចំពោះផលិតករភាពយន្ត។
ដើម្បីលម្អិតព័ត៌មានឲ្យកាន់តែច្បាស់ សូមលោក-អ្នកនាង ស្ដាប់បទសម្ភាសរវាងលោក រំដួល ចិត្រា អ្នកសារព័ត៌មានអេឡិចត្រូនិចថ្មីៗ ជាមួយលោក ឆាយ បូរ៉ា ប្រធានសមាគមភាពយន្ត ដូចតទៅ៖
បញ្ហាដែលលោក ឆាយ បូរ៉ា មើលឃើញនោះ គឺបណ្ដាមកពីកត្តាផលិតករភាពយន្ត នៅខ្វះសមត្ថភាពគ្រប់គ្រាន់ក្នុងការផលិត ខណៈពួកគេមានមហិច្ឆតាខ្ពស់ពេក ភ្លេចគិតពីភាពបរាជ័យខ្លួន, បញ្ហាលំហូរខ្សែភាពយន្តបរទេសកើនឡើងយ៉ាងគំហុក គួបផ្សំពលរដ្ឋខ្មែរឲ្យតម្លៃខ្សែភាពយន្តបរទេសខ្ពស់ ជាងភាពយន្តខ្មែរ, បញ្ហាពន្ធដារក្នុងវិស័យភាពយន្ត និងកង្វះការយកចិត្តទុកពីរដ្ឋាភិបាលលើវិស័យភាពយន្តជាដើម។
និយាយត្រង់ចំណុចនេះ លោក ឆាយ បូរ៉ា បានបញ្ជាក់ថា កម្ពុជាបានខាតបង់ថវិកាជាតិ មិនតិចជាង១០លានដុល្លារក្នុងមួយឆ្នាំ ដោយសារការនាំចូលភាពយន្តបរទេស មកចាក់បញ្ចាំងនៅក្នុងប្រទេសកម្ពុជា។
ទាំងនេះជាបញ្ហាចម្បង ដែលលោក ឆាយ បូរ៉ា ព្រួយបារម្ភពីការបាត់បង់ភាពយន្តខ្មែរនាពេលអនាគត ដោយសារផលិតករបាត់បង់ជំនឿចិត្តក្នុងការផលិតខ្សែភាពយន្ត បើសិនជារដ្ឋាភិបាលមិនយកចិត្តទុកដាក់ឲ្យបានខ្ពស់លើបញ្ហាទាំងនេះ។ បើតាមលោក ឆាយ បូរ៉ា រដ្ឋាភិបាលគួរមានកញ្ចប់ថវិកាមួយ សម្រាប់ជួយដោះស្រាយ និងលើកស្ទួយវិស័យភាពយន្តនៅកម្ពុជា៕
© រក្សាសិទ្ធិដោយ thmeythmey.com