អ្នកសារព័ត៌មាន៦ស្ថាប័ន សិក្សាជំនាញរាយការណ៍ និងផ្សាយព័ត៌មានតាមទូរសព្ទដៃ

ជាតិ

អ្នកសារព័ត៌មាន៦ស្ថាប័ន សិក្សាជំនាញរាយការណ៍ និងផ្សាយព័ត៌មានតាមទូរសព្ទដៃ

27, Mar 2018 , 10:50 am

រូបភាព

ដោយ: ថ្មីៗ

ភ្នំពេញ៖ អ្នកសារព័ត៌មានជាង ២០នាក់ មកពីស្ថាប័នចំនួន ៦ បានចូលរួមសិក្ខាសាលាសារព័ត៌មានឌីជីថល ស្ដីពីការរាយការណ៍ និងផ្សាយព័ត៌មានពីទូរសព្ទដៃ។ សិក្ខាសាលានេះ មានរយៈពេល ៣ថ្ងៃ ចាប់ពីថ្ងៃទី ២៥ ដល់ ២៧ ខែមីនា នាសណ្ឋាគារសាន់វ៉េ ដែលរៀបចំដោយ Broadcasting Board of Governors (BBG) សហការជាមួយវិទ្យុ VOA។

សិក្ខាសាលាសារព័ត៌មាន ឌីជីថល (Digital Journalism) រៀបចំឡើងដើម្បីបង្កើនចំណេះដឹងដល់អ្នកសារព័ត៌មានកម្ពុជា ក្នុងការរាយការណ៍ និងផ្សាយព័ត៌មានពីទូរសព្ទដៃ។ សិក្ខាសាលាសារព័ត៌មាននេះ មានការបង្ហាត់បង្រៀនដោយលោក Paul Marszalek មន្ត្រីយុទ្ធសាស្ត្រផ្សព្វផ្សាយព័ត៌មាននៃ BBG និងមានការសម្រួលដោយ VOA។

លោក Paul Marszalek មន្ត្រីយុទ្ធសាស្ត្រផ្សព្វផ្សាយព័ត៌មាននៃ BBG បានលើកឡើងថា សិក្ខាសាលានេះ ចង់ឲ្យអ្នកសារព័ត៌មាន មានចំណេះដឹងបន្ថែម ក្នុងការប្រមូលព័ត៌មានតាមរយៈការប្រើប្រាស់ទូរសព្ទដៃ។ លោក Paul Marszalek និយាយថា៖ «អ្នកសារព័ត៌មានកម្ពុជា គឺមកពីស្ថាប័នខុសគ្នា ពិសេសម្នាក់ៗមានជំនាញខុសៗគ្នា ហើយពួកគេមិនមានជំនាញក្នុងការផលិតវីដេអូទេ។ តាមរយៈសិក្ខាសាលានេះ នឹងជួយដល់អ្នកសារព័ត៌មានចេះផលិតវីដេអូតាមទូរសព្ទដែ សម្រាប់ផ្សព្វផ្សាយលើបណ្ដាញសង្គម ឬ Youtubeជាដើម»។

ក្នុងសិក្ខាសាលាសារព័ត៌មាន ឌីជីថលនេះ អ្នកសារព័ត៌មានដែលចូលរួម បានបង្កើតស្នាដៃរបស់ខ្លួន ក្រៅពីសិក្សាទ្រឹស្ដីពីវាគ្មិន។ អ្នកសារព័ត៌មានដែលចួលរួមក្នុងសិក្ខាសាលាខាងលើ មកពីស្ថាប័នផ្សេងៗគ្នា រួមមានសារព័ត៌មាន ThmeyThmey, ទូរទស្សន៍ជាតិកម្ពុជា, ប៉ុស្តិ៍លេខ៥, សប្បាយ, វិទ្យុស្ត្រី និងវិទ្យុវីអូឌី។

អ្នកសារព័ត៌មាន ThmeyThmey ដែលចូលរួមក្នុងសិក្ខាសាលានេះ មាន៤នាក់ រួមមាន លោក ជាវ សំណាង ប្រធានផ្នែកវីដេអូ កញ្ញា ញឹក ស្រីល័ក្ខ លោក ទូច សុវណ្ណឌី អ្នករាយការណ៍ផ្នែកវីដេអូ និងអ្នកស្រី អ៊ីសា រ៉ហានី អ្នករាយការណ៍ព័ត៌មានប្រចាំខេត្តសៀមរាប។

សូមបញ្ជាក់ថា ក្រៅពីសិក្សាពីរបៀបរាយការណ៍ និងផ្សាយព័ត៌មានពីទូរសព្ទដៃ ដូចជាការផលិតវីដេអូខ្លីតាមទូរសព្ទ អ្នកសារព័ត៌មានដែលបានចូលរួម ក៏បានសិក្សាបន្ថែមពីគោលការណ៍គ្រឹះរបស់អ្នកសារព័ត៌មានផងដែរ៕