ជាតិ
មេប៉ូលិសភ្នំពេញ បញ្ជាឲ្យបង្ក្រាបចលនាសង្គ្រោះជាតិភ្លាម បើមានការប្រមូលផ្តុំគ្នា លោក ជួន សុវណ្ណ ដឹកនាំកម្លាំង ទៅការពារនៅក្រៅបរិវេនតុលាការកំពូល ពេលតុលាការកំពូល បើកសវនាការរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២0១៨
× ភ្នំពេញ ៖ នាយឧត្តមសេនីយ៍ ជួន សុវណ្ណ អគ្គស្នងការរងនៃអគ្គស្នងការនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាអធិការ ដែលគ្រប់គ្រងកម្លាំងតាមខណ្ឌទាំង១២ ក្នុងរាជធានីភ្នំពេញ ឲ្យទប់ស្កាត់ការជួបជុំគ្នារបស់ក្រុមចលនាសង្គ្រោះជាតិ ដោយបារម្ភថា អាចប៉ះពាល់ដល់សណ្តាប់ធ្នាប់ និងសន្តិសុខសង្គម។ នេះបើតាមការចុះផ្សាយក្នុងគេហទំព័ររបស់អគ្គស្នងការនគរបាលជាតិ។
បញ្ជារបស់មេនគរបាលរាជធានីភ្នំពេញរូបនេះ គឺធ្វើឡើងក្នុងសន្និបាតបូកសរុបលទ្ឋផលនៃកិច្ចសហប្រតិបត្តិការរក្សាសន្តិសុខ និងសណ្តាប់ធ្នាប់ប្រចាំឆ្នាំ២០១៧ នាព្រឹកថ្ងៃទី២៧ ខែមីនា ឆ្នាំ២០១៨នេះ។ គេហទំព័ររបស់អគ្គស្នងការនគរបាលជាតិ បានស្រង់ប្រសាសន៍របស់លោក ជួន សុវណ្ណ ទៅចុះផ្សាយយ៉ាងដូច្នេះថា៖«យើង ជាអ្នកអនុវត្តផ្ទាល់ ក្នុងការទប់ស្កាត់បដិវត្តន៍ពណ៌ និងចលនាអសន្តិសុខសង្គម ដែលក្រុមបក្សប្រឆាំង ចង់ធ្វើ។ យើង ត្រូវទប់ស្កាត់ឲ្យបានរាល់ចលនាណាមួយ ដែលក្រុមនេះប៉ុនប៉ងចង់ធ្វើ» ។
អគ្គស្នងការនគរបាលជាតិ ចុះផ្សាយពីការលើកឡើងរបស់លោក ជួន សុវណ្ណ ទៀតថា ទោះជាត្រូវបានរំលាយចោលហើយក៏ដោយ ប៉ុន្តែក្រុមប្រឆាំង នៅតែចិញ្ចឹមចិត្តចង់ធ្វើចលនា ដើម្បីឲ្យមានអសន្តិសុខ និងមានភាពវឹកវរដល់សង្គម។ ផ្អែកតាមប្រភពដដែល លោក ជូន សុវណ្ណ បានព្រមានបែបនេះថា៖«ក្នុងនាមជាកងកម្លាំងប្រតិបត្តិការផ្ទាល់ ត្រូវតែកម្ចាត់ចោលភា្លម មិនត្រូវបង្អង់យូរឡើយ»។
ក្រោយគណបក្សសង្គ្រោះជាតិ ត្រូវបានរំលាយចោល ចលនាសង្គ្រោះជាតិ ក៏កើតឡើងនៅក្រៅប្រទេស ក្រោមគំនិតផ្តួចផ្តើមរបស់លោក សម រង្ស៊ី ។ លោក សម រង្ស៊ី អះអាងថា ការបង្កើតចលនាសង្គ្រោះជាតិ គឺដើម្បីបន្តទាមទារឲ្យដោះលែងលោក កឹម សុខា និងទាមទារឲ្យផ្តល់សុពលភាពដល់គណបក្សសង្គ្រោះជាតិ ឡើងវិញ។
លោក សម រង្ស៊ី ធ្លាប់ផ្ញើសារពីបរទេស មកកាន់អ្នកគាំទ្រចលនាសង្គ្រោះជាតិ នៅកម្ពុជាថា កុំឲ្យបញ្ចេញអត្តសញ្ញាណ។ លោក យល់ថា ការលាក់អត្តសញ្ញាណបែបនេះ គឺអាចការពារអ្នកគាំទ្រនៅកម្ពុជា ពីការធ្វើទុក្ខបុកម្នេញរបស់អាជ្ញាធរ។
រហូតមកដល់ពេលនេះ គេ មិនទាន់ឃើញមានសកម្មភាពណាមួយរបស់ចលនាសង្គ្រោះជាតិ ដែលកើតឡើងនៅកម្ពុជានោះទេ។ សកម្មភាពរបស់ចលនាសង្គ្រោះជាតិ កើតមានតែនៅក្រៅប្រទេសប៉ុណ្ណោះ។ ក្រុមប្រឆាំង ដោយមានលោក សម រង្ស៊ី ជាបង្គោល បានប្រើឈ្មោះគណបក្សសង្គ្រោះជាតិផង និងឈ្មោះចលនាសង្គ្រោះជាតិផង ដើម្បីជំរុញឲ្យសហគមន៍អន្តរជាតិ បន្តដាក់ទណ្ឌកម្ម មកលើរដ្ឋាភិបាលកម្ពុជា ដើម្បីឲ្យកែប្រែស្ថានការណ៍ ឲ្យល្អប្រសើរដូចដើម មុនការបោះឆ្នោតមកដល់៕
Tag:
ជួន សុវណ្ណ
ចលនាសង្គ្រោះជាតិ
© រក្សាសិទ្ធិដោយ thmeythmey.com