ជាតិ
សម្ដេច ហ៊ុន សែន នឹងចូលរួមកិច្ចប្រជុំកំពូលមហាអនុតំបន់មេគង្គលើកទី៦នៅវៀតណាម
× ភ្នំពេញ៖ សម្ដេចនាយករដ្ឋមន្ត្រីកម្ពុជា ហ៊ុន សែន នឹងដឹកនាំគណៈប្រតិភូចូលរួមកិច្ចប្រជុំកំពូលមហាអនុតំបន់មេគង្គ លើកទី៦ ស្របជាមួយកិច្ចប្រជុំកំពូលកម្ពុជា ឡាវ វៀតណាម លើកទី១០ ស្ដីពីតំបន់ត្រីកោណអភិវឌ្ឍន៍ នៅទីក្រុងហាណូយ ប្រទេសវៀតណាម រយៈពេល ២ថ្ងៃ ចាប់ពីថ្ងៃទី ៣០ ដល់ ៣១ ខែមីនា។ នេះបើតាមសេចក្ដីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។
តបតាមការអញ្ជើញរបស់ លោក ង្វៀន សួនហ្វ៊ុក នាយករដ្ឋមន្ត្រី នៃសាធារណរដ្ឋសង្គមនិយមវៀតណាម សម្ដេច ហ៊ុន សែន នឹងដឹកនាំគណៈប្រតិភូជាន់ខ្ពស់ចូលរួមកិច្ចប្រជុំសំខាន់ៗ នៅទីក្រុងហាណូយ ប្រទេសវៀតណាម ចាប់ពីថ្ងៃទី ៣០ ដល់ ៣១ ខែមីនា ។ សម្ដេច ហ៊ុន សែន នឹងចូលរួមកិច្ចប្រជុំកំពូលមហាអនុតំបន់មេគង្គ លើកទី៦ និងកិច្ចប្រជុំកំពូល កម្ពុជា ឡាវ វៀតណាម លើកទី១០។
បើតាមសេចក្ដីជូនព័ត៌មានខាងលើ កិច្ចប្រជុំកំពូលមហាអនុតំបន់មេគង្គ លើកទី៦ ប្រព្រឹត្តទៅក្រោមប្រធានបទ «សមិទ្ធិផលរយៈពេល២៥ឆ្នាំ» នៃកិច្ចសហប្រតិបត្តិការ និងការកសាងមហាអនុតំបន់មេគង្គប្រកបដោយចីរភាព សមាហរណកម្ម និងវិបុលភាព។ បន្ថែមលើនេះ ថ្នាក់ដឹកនាំ នឹងអនុម័តជាផ្លូវការផែនការសកម្មភាពទីក្រុងហាណូយ ឆ្នាំ២០១៨-២០២២ និងក្របខណ្ឌវិនិយោគតំបន់ ២០២២ រួមទាំងសេចក្ដីថ្លែងការណ៍រួម។
ទាក់ទងនឹងកិច្ចប្រជុំកំពូល កម្ពុជា ឡាវ វៀតណាម លើកទី១០ ស្ដីពីតំបន់ត្រីកោណអភិវឌ្ឍន៍ ថ្នាក់ដឹកនាំ នឹងពិនិត្យសមិទ្ធិផល នាឆ្នាំកន្លងមក នៃគំនិតផ្ដួចផ្ដើមនានា នឹងកំណត់ទិសដៅអភិវឌ្ឍនាពេលអនាគត។ តាមរយៈកិច្ចប្រជុំនេះ ថ្នាក់ដឹកនាំ នឹងអនុម័តផែនការសកម្មភាពសម្រាប់ការតភ្ជាប់សេដ្ឋកិច្ចកម្ពុជា ឡាវ វៀតណាម ដល់ឆ្នាំ២០៣០ រួមទាំងចុះហត្ថលេខាលើសេចក្ដីថ្លែងការណ៍រួម ៕
© រក្សាសិទ្ធិដោយ thmeythmey.com