ជាតិ
សិល្បះ
ទម្រង់សិល្បៈជាច្រើន, ល្ខោនខោលឈុត «សម្បថពាលី» នឹងបង្ហាញខ្លួនក្នុងកម្មវិធី«ផ្ទះសិល្បៈ» រូបភាពពីហ្វេសប៊ុកក្រុមយុវជនល្ខោនខោល
× ភ្នំពេញ៖ កម្មវិធី «ផ្ទះសិល្បៈ» លើកទី២ នឹងត្រូវរៀបចំឡើងនៅថ្ងៃទី ១ ខែមេសានេះ ដើម្បីចូលរួមផ្សព្វផ្សាយវប្បធម៌ ខ្មែរ និងលើកស្ទួយសិល្បៈបុរាណខ្មែរ និងចូលរួមអបអរពិធីបុណ្យចូលឆ្នាំថ្មី ប្រពៃណីជាតិខ្មែរ។ កម្មវិធីនេះ នឹងមានការសម្ដែងសិល្បៈគ្រប់ទម្រង់ ការតាំងពិព័រណ៍ស្នាដៃ ការលេងល្បែងប្រជាប្រិយ និងរាំលេងកម្សាន្ត ជាពិសេសការសម្ដែងសិល្បៈរួមគ្នារវាងសាលាមធ្យមវិចិត្រសិល្បៈ និងហ្វារពន្លឺសិល្បៈ និងការសម្ដែងល្ខោនខោលឈុត «សម្បថពាលី»ផងដែរ។
សាលាមធ្យមវិចិត្រសិល្បៈ សហការជាមួយក្រុមយុវជនល្ខោនខោលកម្ពុជា នឹងរៀបចំកម្មវិធី«ផ្ទះសិល្បៈ» លើកទី២ នៅថ្ងៃទី១ ខែមេសា នៅសាលាមធ្យមវិចិត្រសិល្បៈ ដើម្បីចូលរួមផ្សព្វផ្សាយវប្បធម៌ ខ្មែរ និងលើកស្ទួយសិល្បៈបុរាណខ្មែរ។
«ផ្ទះសិល្បៈ» នឹងប្រមូលផ្តុំសិល្បៈជាច្រើនទម្រង់ រួមមានការសម្តែងរបាំបុរាណ របាំប្រពៃណី ល្ខោនយីកេ ល្ខោនបាសាក់ ល្ខោននិយាយ ល្ខោនខោល ត្រង់ឈុត «សម្បថពាលី»ចាប៉ីដងវែង ចម្រៀងសម័យ សៀក ក្បាច់គុណល្បុក្កតោ ការតាំងពិព័រណ៌ ការលេងល្បែងប្រជាប្រិយជាដើម រួមទាំងការប្រគំតន្ត្រីដែលចូលរួមពីតារាចម្រៀងផ្សេងៗផងដែរ។ នេះបើតាម លោក ខុន ច័ន្ទសិទ្ធិការ្យ ប្រធានក្រុមយុវជនល្ខោនខោលកម្ពុជា ដែលបញ្ជាក់ប្រាប់សារព័ត៌មានថ្មីៗតាមទូរសព្ទ។
លោក ខុន ច័ន្ទសិទ្ធិការ្យ សង្ឃឹមថាព្រឹត្តិការណ៍«ផ្ទះសិល្បៈ» លើកទី២នេះ នឹងមានអ្នកចូលរួមច្រើនជាងឆ្នាំមុន ដើម្បីលើកទឹកចិត្តដល់សិល្បករនានា ខណៈកាលពីលើកទី១ មានការចូលរួមគាំទ្រយ៉ាងច្រើនពីសាធារណជន ក្នុងនោះជាង៧០ភាគរយជាយុវជន៕
Tag:
ផ្ទះសិល្បៈ
ល្ខោនខោល
© រក្សាសិទ្ធិដោយ thmeythmey.com