ជាតិ
អគ្គលេខាធិការអាស៊ាន សរសើរការដឹកនាំរបស់សម្ដេច ហ៊ុន សែន
× ភ្នំពេញ៖ អគ្គលេខាធិការអាស៊ាន សរសើរការដឹកនាំរបស់រដ្ឋាភិបាលកម្ពុជា ដែលបាននាំភាពរីកចម្រើនយ៉ាងឆាប់រហ័ស ដល់ប្រជាជន និងប្រទេសជាតិ ក្នុងរយៈពេលប៉ុន្មានឆ្នាំចុងក្រោយនេះ។
អគ្គលេខាធិការអាស៊ាន លោក Dato Lim Jock Hoi បានលើកពីចំណុចវិជ្ជមាន ក្នុងអភិវឌ្ឍន៍ប្រទេសកម្ពុជា ពិភាក្សាជាមួយសម្ដេច ហ៊ុន សែន កាលពីថ្ងៃទី៤ មេសា។ ថ្លែងក្នុងជំនួបនេះ លោក Dato Lim Jock Hoi បាននិយាយថា កម្ពុជា ជាប្រទេសមួយ ដែលកំពុងមានការអភិវឌ្ឍរីកចម្រើន ក្នុងចំណោមប្រទេសអាស៊ាន ទាំងផ្នែកសេដ្ឋកិច្ច និងការអភិវឌ្ឍសង្គម។
តាមរយៈការចុះផ្សាយរបស់ហ្វេសប៊ុក ASEAN បានចុះផ្សាយសម្ដីរបស់រដ្ឋលេខាធិការអាស៊ាន ដូច្នេះថា៖«ជាការកត់សម្គាល់ដំណើរការរបស់ប្រទេសកម្ពុជា ឃើញថា មានការអភិវឌ្ឍសេដ្ឋកិច្ចសង្គម ហើយកម្ពុជាកំពុងចាប់ផ្ដើមរីកចម្រើនខ្លាំង រួមទាំងការបង្កើននូវកម្រិតជីវភាពរបស់ប្រជាជន»។
បន្ថែមនេះអគ្គលេខាធិការអាស៊ាន បានពិភាក្សាពីរឿងអាស៊ាន ជាមួយនាយករដ្ឋមន្ត្រី ហ៊ុន សែន ផងដែរ។ ជាការឆ្លើយតបសម្ដេច ហ៊ុន សែន បានស្នើសុំឲ្យលោក Dato Lim Jock Hoi អគ្គលេខាធិការអាស៊ានថ្មីនេះ ពិចារណាធ្វើយ៉ាងណាជំរុញពន្លឿនកិច្ចការទាំងឡាយណា ដែលថ្នាក់ដឹកនាំកំពូលបានព្រមព្រៀងគ្នានោះ យកចិត្តទុកដាក់ជាអាទិភាព ចំពោះកិច្ចការសមាហរណកម្មរអាស៊ានតែម្ដង។ ព្រោះកិច្ចការទាំងនោះជាអទិភាពរបស់កម្ពុជា និងបណ្តាប្រទេសអាស៊ានផងដែរ៕
© រក្សាសិទ្ធិដោយ thmeythmey.com