កម្ពុជា ថៃ ឡាវ និង​វៀតណាម ឯកភាព​លើ​រូបមន្ត​បង់​វិភាគទាន​ថវិកា ដើម្បី​អភិវឌ្ឍ​អាង​ទន្លេមេគង្គ​
ជាតិ
កម្ពុជា ថៃ ឡាវ និង​វៀតណាម ឯកភាព​លើ​រូបមន្ត​បង់​វិភាគទាន​ថវិកា ដើម្បី​អភិវឌ្ឍ​អាង​ទន្លេមេគង្គ​
05, Apr 2018 , 3:49 pm        
រូបភាព
រូបពីទីភ្នាក់ងារសារព័ត៌មានជាតិកម្ពុជា AKP
រូបពីទីភ្នាក់ងារសារព័ត៌មានជាតិកម្ពុជា AKP
​ភ្នំពេញ​៖ គណៈកម្មការ​ទន្លេមេគង្គ បាន​ឯកភាពគ្នា លើ​រូបមន្ត​បង់​វិភាគទាន ដើម្បី​ទប់ស្កាត់​បញ្ហា និង​ពង្រឹង​ការអភិវឌ្ឍ​អាង​ទន្លេមេគង្គ​។ ការសម្រេច​នេះ ធ្វើឡើង​នៅក្នុង​កិច្ចប្រជុំ​កំពូល​គណៈកម្មការ​ទន្លេ​មេគង្គ លើក​ទី​៣ នៅ​ខេត្តសៀមរាប នា​ថ្ងៃទី​៥ មេសា​។



​ក្នុង​កិច្ចប្រជុំ​កំពូល​លើក​ទី​៣ នេះ  គណៈកម្មការ​ទន្លេមេគង្គ​មានការ​យល់ដឹង​កាន់តែ​ប្រសើរ អំពី​កាលានុវត្តភាព (​ឱកាស​)​នៃ​ការអភិវឌ្ឍ និង​បញ្ហា​ប្រឈម​ក្នុង​អាង​ទន្លេមេគង្គ​។ កាលានុវត្តភាព​នៃ​ការអភិវឌ្ឍ ដែល​គណៈកម្មការ​ទន្លេ​មេគង្គ សង្កេតឃើញ​រួមមាន វា​រី​អគ្គិសនី​ទន្លេ​មេ និង​ដៃទន្លេ​, ធារាសាស្ត្រ ,​ជលផល ,​នាវាចរណ៍ ,​ការគ្រប់គ្រង​គ្រោះទឹកជំនន់ និង​គ្រោះរាំងស្ងួត និង​ទេសចរណ៍​។

​ចំណែកឯ​បញ្ហា​ប្រឈម ដែល​ត្រូវ​ទប់ស្កាត់​រួមមាន កំណើន​នៃ​តម្រូវការ​ទឹក​ស្បៀង និង​ថាមពល ការបាត់បង់​ធនធានបរិស្ថាន​និង​ជលផល ,​គ្រោះទឹកជំនន់ និង​គ្រោះរាំងស្ងួត និង​ហានិភ័យ​ជីវចម្រុះ គួបផ្សំ​និង​ផលប៉ះពាល់​បណ្ដាលមកពី​ការប្រែប្រួល​អាកាសធាតុ​ផងដែរ​។ ទាំងនេះ​ជា​បញ្ហា​គណៈកម្មការ​ទន្លេមេគង្គ កំពុង​គិត​រក​វិធានការ​ដោះស្រាយ​។​

​តាមរយៈ​កិច្ចប្រជុំ​នេះ គណៈកម្មការ​ទន្លេមេគង្គ ដែល​កម្ពុជា ថៃ ឡាវ និង​វៀតណាម បាន​ឯកភាពគ្នា​លើ​ការប្រើ​រូបមន្ត​វិភាគទាន​ថវិកា​របស់​ប្រទេស​ជា​សមាជិក ដើម្បី​ឈានដល់​គោលដៅ​នៃ​ភាពម្ចាស់ការ​ផ្នែក​ហិរញ្ញវត្ថុ​ទាំងស្រុង ដោយ​គណៈកម្មការ​ទន្លេ​មេគង្គ​នៅ​ឆ្នាំ​២០៣០​។

​សេចក្តីថ្លែងការណ៍​ក្រុង​សៀមរាប ស្តីពី​ការលើកកម្ពស់​កិច្ចខិតខំ​ប្រឹងប្រែង​រួមគ្នា និង​ភាពជា​ដៃគូ ដើម្បី​សម្រេចបាន​នូវ​គោលដៅ​អភិវឌ្ឍ​ប្រកបដោយ​ចីរភាព​ក្នុង​អាង​ទន្លេមេគង្គ បានបញ្ជាក់​ដូច្នេះ​ថា​៖«​យើង​ទទួលស្គាល់ និង​សូម​កោតសរសើរ​ចំពោះ​សមិទ្ធិផល​សំខាន់ៗ ដែល​គណៈកម្មការ​ទន្លេ​មេគង្គ​សម្រេចបាន ចាប់តាំងពី​កិច្ចប្រជុំ​លើក​ទី​២ ក្នុង​ឆ្នាំ​២០១៤​។ សមិទ្ធិផល​ទាំងនេះ រួមមាន ការបញ្ចប់​ការសិក្សា​របស់​ក្រុមប្រឹក្សា ការអនុម័ត និង​ការអនុវត្ត​យុទ្ធសាស្ត្រ​អភិវឌ្ឍ​អាង និង​ផែនការ​យុទ្ធសាស្ត្រ ឆ្នាំ​២០១៦-២០២០ ការបន្ត​អនុវត្ត​នីតិវិធី​ប្រើប្រាស់​ទឹក និង​ការកែទម្រង់​ស្ថាប័ន​គណៈកម្មការ​ទន្លេមេគង្គ ដោយ​រាប់បញ្ចូល​វិភាគទាន​ប្រចាំឆ្នាំ​ថ្មី ដើម្បី​សម្រេច​និរន្ត​ភាព​ហិរញ្ញ​វត្ថ​ត្រឹម​ឆ្នាំ​២០៣០»​។​

​បន្ថែម​ពីនេះ គណៈកម្មការ​ទន្លេមេគង្គ នឹង​ជំរុញ​លើកកម្ពស់​កិច្ចខិតខំ​ប្រឹងប្រែង​រួមគ្នា និង​ភាពជា​ដៃគូ​ដើម្បី​ចាប់យក​ឱកាស​នៃ​ការអភិវឌ្ឍ និង​ដោះស្រាយ​នូវ​បញ្ហា​ប្រឈម​នានា តាមរយៈ​កិច្ចដំណើរការ​មាន​លក្ខណៈ​ចម្រុះ​រួមគ្នា និង​ពហុ​វិស័យ ក្នុង​កម្រិត​អាង​ទាំងមូល ដោយ​លើកកម្ពស់​នីតិវិធី​ប្រើប្រាស់​ទឹក ផែនការ​យុទ្ធសាស្ត្រ និង​ផែនការ​ចង្អុល​ទិស​ថ្នាក់ជាតិ ការពង្រឹង​វិមជ្ឈការ​លើ​សកម្មភាព​តាមដាន​ត្រួតពិនិត្យ និង​ការបន្ត​កិច្ចសហប្រតិបត្តិការ​ជាមួយ​ដៃគូ​សន្ទនា ដៃគូ​អភិវឌ្ឍន៍ និង​ដៃគូ​ផ្សេងៗ​ទៀត​។

«​យើង​សូម​អះអាង​សារជាថ្មី នូវ​ការ​សាមគ្គីភាព និង​ការប្ដេជ្ញាចិត្ត និង​ការគាំទ្រ​ផ្នែក​នយោបាយ​កម្រិត​ខ្ពស់បំផុត​របស់​យើង ដើម្បី​ប្រសិទ្ធភាព​នៃ​ការអនុវត្ត​កិច្ចព្រមព្រៀង​មេគង្គ​ឆ្នាំ​១៩៩៥»​។ នេះ​ជាការ​បញ្ជាក់​របស់​គណៈ​កម្ម​ការ​ទន្លេមេគង្គ ក្នុង​សេចក្តីថ្លែងការណ៍​រួម​៕



Tag:
 មេគង្គ​
  កម្ពុជា
 ​ថៃ
 ​ឡាវ​
  វៀតណាម​
© រក្សាសិទ្ធិដោយ thmeythmey.com