ពីនេះ ពីនោះ
គួរឈប់ប្រើប្រាស់រថយន្តរដ្ឋ និងអង្គការ សម្រាប់បម្រើផលប្រយោជន៍ផ្ទាល់ខ្លួន!
× ភ្នំពេញ៖ បុគ្គលដែលមានតួនាទីអាចប្រើប្រាស់រថយន្តរដ្ឋ ឬរថយន្តអង្គការបាន សុទ្ធតែជាអ្នកដែលមានសមត្ថភាព ក្នុងការបំពេញការងារជូនអង្គការ និងជូនរដ្ឋ។ ប៉ុន្តែអ្វីដែលមិនត្រឹមត្រូវនោះ គឺនៅត្រង់ថា បុគ្គលមួយចំនួន បានយកសម្ភាររបស់រដ្ឋ និងរបស់អង្គការ ទៅបម្រើផលប្រយោជន៍បុគ្គលខ្លួនឯង ឬគ្រួសារទៅវិញ។
បុគ្គលមួយចំនួនដែលប្រើប្រាស់សម្ភាររបស់រដ្ឋ ឬរបស់អង្គការ បានប្រើប្រាស់សម្ភារទាំងនោះត្រឹមត្រូវតាមគោលការណ៍របស់រដ្ឋហើយ។ ប៉ុន្តែ បុគ្គលមួយចំនួន បានលួចកេងប្រវ័ញ្ចសម្ភាររបស់រដ្ឋ ឬរបស់អង្គការ យកមកប្រើប្រាស់ ដើម្បីជាប្រយោជន៍ផ្ទាល់ខ្លួន ឬជាប្រយោជន៍គ្រួសារទៅវិញ។ រថយន្តរបស់រដ្ឋ ឬរបស់អង្គការមួយចំនួន ត្រូវបានគេសង្កេតឃើញជារឿយៗថា បានប្រើប្រាស់ខុសគោលដៅរបស់រដ្ឋ និងរបស់អង្គការ ដោយបុគ្គលមិនគោរពគោលការណ៍មួយចំនួន។
បុគ្គលមួយចំនួននោះ បានប្រើប្រាស់រថយន្តរបស់រដ្ឋ ឬរបស់អង្គការដើម្បីបម្រើប្រយោជន៍ផ្ទាល់ខ្លួន ឬប្រយោជន៍គ្រួសារទៅវិញ។ ពួកគេមួយចំនួននោះ សប្បាយចិត្តនឹងអាចទាញប្រយោជន៍ពីរដ្ឋ និងអង្គការបាន ទោះបីជាពួកគេបានដឹងថា អ្វីដែលពួកគេកំពុងធ្វើនោះ ខុសនឹងគោលការណ៍ក៏ដោយ។
ការធ្វើយ៉ាងដូច្នេះ គឺធ្វើឲ្យរដ្ឋ និងអង្គការខាតបង់ថវិកា។ ម្យ៉ាងទៀត ទង្វើនេះ គឺជាទង្វើដែលប្រព្រឹត្តិឡើងខុស ទៅនឹងឆន្ទៈរបស់ស្ថាប័នទាំងស្រុង។ អ្នកប្រព្រឹត្តិខុសគោលការណ៍របស់ស្ថាប័ន, តើអ្នកមានបានដឹងទេថា ខ្លួនឯងកំពុងប្រព្រឹត្តខុសនោះ?
© រក្សាសិទ្ធិដោយ thmeythmey.com