កុមារីវ័យ១២ឆ្នាំពីររូប រួមគ្នារៀបកម្មវិធីសប្បុរសធម៌ ក្រោយពួកគេរៀនមុខវិជ្ជាសីលធម៌-ពលរដ្ឋ

ជាតិ

សង្គមជាតិ

កុមារីវ័យ១២ឆ្នាំពីររូប រួមគ្នារៀបកម្មវិធីសប្បុរសធម៌ ក្រោយពួកគេរៀនមុខវិជ្ជាសីលធម៌-ពលរដ្ឋ

07, Apr 2018 , 11:39 pm

រូបភាព

ដោយ: ប៉ូ សាគុន

ភ្នំពេញ៖ ក្រោយពីបានរៀនមុខវិជ្ជាសីលធម៌ពលរដ្ឋនៅវិទ្យាល័យព្រះស៊ីសុវត្ថិសាលារៀនជំនាន់ថ្មីមក កុមារីពីរូបដែលទើបតែមានអាយុ១២ឆ្នាំ បានផ្ដួចផ្ដើមគំនិតរៀបចំកម្មវិធី សប្បុរសធម៌មួយទៅខេត្តកំពង់ស្ពឺ។ កុមារី សុភក្តិ វឌ្ឍនាទេពី និងកុមារី ជ័យ អានីកា ឱ្យដឹងថានេះជាការអនុវត្តផ្ទាល់ នៃការសិក្សាមុខវិជ្ជាពលរដ្ឋវិទ្យា។ ពួកគេនិយាយថា ការសិក្សតែទ្រឹស្តីហាក់ងាយស្រួល តែការអនុវត្តផ្ទាល់ពិតជាពិបាក។ ទោះជាយ៉ាងណាក្ដី វឌ្ឍនាទេពី និង អានីកា មានជំនឿយ៉ាងមុតមាំ ថាពួកគេពិតជាអាចធ្វើបានជោគជ័យ។

ទើបតែរៀនថ្នាក់ទី៧ នៃសាលារៀនជំនាន់ថ្មី កុមារី វឌ្ឍនាទេពី និង អានីកា បានសហការគ្នាផ្ដួចផ្ដើមធ្វើកម្មវិធីសប្បុរសធម៌ ដើម្បីយកសម្ភារសិក្សាមួយចំនួនទៅចែកជូនគ្រូនិងសិស្ស ក្នុងសាលាបឋមសិក្សាវត្តពោធិវង្ស ស្ថិតក្នុងស្រុកភ្នំស្រួចខេត្តកំពង់ស្ពឺ នៅខែឧសភាខាងមុខ។ សុភ័ក្ដិ វឌ្ឍនាទេពី បានប្រាប់សារព័ត៌មានថ្មីៗថា ក្រុមរបស់នាងមានគំនិតរៀបចំកម្មវិធីសប្បុរសធម៌នេះឡើង បន្ទាប់ពីគ្រូប្រាប់ថាមានសាលាមួយនៅខេត្តកំពង់ស្ពឺ កំពុងត្រូវការជំនួយ។

កុមារីម្នាក់ទៀតជាសមាជិកក្រុម គឺ ជ័យ អានីកា បានបញ្ជាក់មូលហេតុបន្ថែមប្រាប់សារព័ត៌មានថ្មីៗថា៖ «មុខវិជ្ជាសីលធម៌ពលរដ្ឋផ្ដោតសំខាន់ទៅលើការសិក្សាពីសង្គមទូទៅ ពីការទំនាក់ទំនងគ្នា និងការចេះជួយគ្នាទៅវិញទៅមក ដូច្នេះទើបបានជាពួកខ្ញុំរៀបចំកម្មវិធីនេះឡើង ដើម្បីចូលរួមសកម្មភាពសង្គម»។

នៅក្នុងកម្មវិធីនេះ នឹងមានការចែកសម្ភារសិក្សាដូចជា ខ្មៅដៃ ប៊ិក សៀវភៅ បន្ទាត់ ជ័រលុប និងប្លាស្ទិកដាក់ឯកសារជាដើម ជូនគ្រូ និងសិស្សនៅសាលាវត្តពោធិ៍វង្ស ដែលមានគ្រូ៤នាក់ និងសិស្ស២៧៥នាក់។ ក្រៅពីផ្ដល់ជាសម្ភារ ពួកគេក៏រៀបចំលំហាត់រកភាពឆ្លាតវៃ សម្រាប់សិស្សថ្នាក់ទី១ផងដែរ។ នេះបើតាម កុមារី អានីកា ដែលបានឱ្យដឹងថា ប្រាក់ដែលយកទៅទិញសម្ភារសិក្សាទាំងនេះ គឺប្រមូលបានពីសិស្ស និងគ្រូនៅក្នុងសាលារៀនជំនាន់ថ្មី។

ជាលើកទី១សម្រាប់ក្រុមដ៏វ័យក្មេងនេះ គឺពិតជាលំបាកណាស់ក្នុងការរៀបចំកម្មវិធីសប្បុរសធម៌។ គ្រាន់តែរៀបចំគម្រោងកម្មវិធី ពួកគេទាំង២ ចំណាយពេលដល់ទៅ១ សប្តាហ៍ឯណោះ និងមានការណែនាំ ផ្តល់យោបល់ពីគ្រូរបស់ពួកគេផង។ ទោះយ៉ាងណា កុមារីទាំង២ សង្ឃឹមថា កម្មវិធីសប្បុរសធម៌របស់គេ នឹងជោគជ័យ៕