ខេត្តព្រៃវែងសង់«ទូកង»វែងជាងគេ ដើម្បីបំបែកឯតទគ្គកម្មពិភពលោក

ជាតិ

ខេត្តព្រៃវែងសង់«ទូកង»វែងជាងគេ ដើម្បីបំបែកឯតទគ្គកម្មពិភពលោក

09, Apr 2018 , 7:30 am

រូបភាព

រូបភាពពីហ្វេសប៊ុក លោក ងិន បាណាល់

ដោយ: ញឹក ស្រីល័ក្ខ (Nhek Sreyleak)

ព្រៃវែង៖ អាជ្ញាធរខេត្តព្រៃវែង បានចាប់ផ្តើមសាងសង់«ទូក ង» វែងជាងគេ ដើម្បីបំបែកឯតទគ្គកម្មពិភពលោក។ លោក ងិន បាណាល់ អនុប្រធានគណៈកម្មការផលិតទូកខ្នាតវែង ប្រាប់សារព័ត៌មានថ្មីៗថា «ទូក ង»នេះ មានបណ្ដោយប្រវែង ៨៥ម៉ែត្រ និងទទឹងប្រវែង ១, ៥៧ម៉ែត្រ ដែលផ្ទុកចំណុះទូកចំនួន ១៧៩នាក់។

ពិធីក្រុងពលីសាងសង់«ទូកង»វែងជាងគេ ដើម្បីបំបែកឯតទគ្គកម្មពិភពលោក បានរៀបចំធ្វើនៅព្រឹកថ្ងៃទី៨ ខែមេសានេះ។ លោក ងិន បាណាល់ អនុប្រធានគណៈកម្មការផលិតទូកខ្នាតវែង ថ្លែងប្រាប់សារព័ត៌មានថ្មីៗតាមទូរសព្ទថា មូលហេតុនៃការសង់«ទូក ង» ខ្នាតវែងជាងគេបំបែកឯតទគ្គកម្មពិភពលោកនេះ ដោយសារខេត្តព្រៃវែង ជាខេត្តនៅជាប់ទន្លេ និងជាខេត្តដែលធ្លាប់ផលិតទូកងខ្នាតវែងដែរ។

«ការផលិត«ទូក ង»ខ្នាតវែងនេះ ក៏ជួយលើកកិត្តិនាមខេត្តផងដែរ»។ នេះជាបន្ថែមរបស់លោក ងិន បាណាល់ ដែលបានបន្តបញ្ជាក់ថា «ទូកង» នេះធ្វើពីឈើគគីម្សៅ មានបណ្តោយប្រវែង៨៥ម៉ែត្រ និងទទឹង១,៥៧ម៉ែត្រ ផ្ទុកចំណុះទូកចំនួន១៧៩នាក់ ព្រមទាំងក្បូរក្បាច់រចនាដ៏ប្រណិតរបស់ខ្មែរផងដែរ។ ការសាងសង់ គ្រោងចំណាយពេល៦០ថ្ងៃ និងមានមេជាងជំនាញចំនួន ២៥នាក់៕